Read lugbara Marako 9 Bible Online

Marako 9 - lugbara bible

Marako 9

¹Eri nga ’yo yi tia kini, Ma ’yo emi tia ada, ’ba emini azini pa sopi ’doa ’diyi, ngani dra ma aji ’bi ’de ku, de nga yi ndreni suru Mungunini emuria okpo be ku.

²O’du azia ma vutia Yesu nga Petero pi Yakobo pie Yohana pie ji i be oni izuru ma dria a’dule; wura erini nga ovu ojazaru ndu yi milia;

³bongo erini nga ovu dizaru emvendrindriru tu, econi ’ba bongo ojipi nyaku dri driarini ojizaru ’dini ku,

⁴Eliya pi Musa be nga ovu e’dazaru yi dri; yi ovu e’yo nzeria Yesu be.

⁵Petero nga e’yo omvi, nga ’yo Yesu tia kini, ’Ba ’ba Imbapiri, e’yo amani ovuzu ’doari onyiru tu; ama ma si boroko na, alu mini, alu Musani, alu Eliyani.

⁶Te eri nini e’yo erini ngale omvileri ku, yini ovule uri be turisi.

⁷Iriti nga emu yi a’buzu ci, o’duko enga iriti nde alia kini, ’Di Mvi-mani lele turi’i; emi ma eri e’yo erini.

⁸Coti yini angu luria yi ageia, yi ndreni ’ba azini dika ku, pe alu Yesu a’dule yi be.

⁹Yini siria oni dria va, eri nga yi azi okposi, kini yi ma olu ’ba azini tia afa yini ndreleri aluni ku, de nga Mvi ’bani engani ’ba draza eselia ku,

¹⁰Yi nga e’yo ’diri ma ta mba, e’yo ozizu yi ma eselia kini engata ’ba draza eseliari, efini bani ngoni ya?

¹¹Yi nga zi tinia kini, Karani piyi ’yo kini Eliya ma emu oko raka a’disi ya?

¹²Eri nga ’yo yi tia, Eliya emu oko ada, eri nga di afa dria ’ba yi paria; yi si ndra Mvi ’bani ma e’yo ngoni, kini yi nga eri ecandi e’yo karakarausi, yi nga eri ’ba ’ba tokole ya?

¹³Te ma ’yo emi tia Eliya emu di ’bo, yi ’ye di afa yini leleri eri be ’bo indi, yini ndra sile eri ma e’yosirile.

¹⁴Yi ka emu ’ba erini imbale ’diyi vu, yi ndre ’ba ongulumuru amboru yi ageia, karani piyini e’yo oziria yi tia.

¹⁵’Ba ongulumuru dria, coti yini eri ndreria, yi nga osu osu ambo, yini nzuria vunia yi nga eri zi ci ci.

¹⁶Eri nga zi yi tia kini, Emi a’di e’yo ozi yi tia ya?

¹⁷’Ba alu ’ba ongulumuru ma eselia nga e’yo omvi eri tia kini, ’Ba ’ba Imbapiri, ma eji mva mani ’doa mi yu, eri ovu orindi ndindiru be;

¹⁸ka avu pari, ngoa, eri ka eri bi ra, eri di eri o’be va; eri kafuto emi tilenia, eri si nya, eri eca okpo kokoru; ma ’yo te ’ba mini imbale ’diyi ma tia yi ma ofu eri amve, te econi yini ku.

¹⁹Eri nga e’yo omvi yi tia kini, Anzi a’ita kokoru la! ama nga ovu emi be ewu ngopi ya? Ma nga e’yo emini ku ’dani ewu ngapi ya? Emi eji eri ma vu.

²⁰Yi nga eri eji vunia; eri ka eri ndre ’bo, orindi anzi nga eri rua osi tu, eri nga e’de va nyakua, nga i agu ogu kafuta emizu tilenia.

²¹Eri zi ati tia kini, Eri ovu ’dini ewu ngapi ya? Eri nga ’yo ra, Drio, gbu mvasi.

²²Pale kakau eri o’be eri aci alia, azini yi alia, eri dri jazu; mi ka eco e’yo azini ’yezaru, mi asi ma ndri ndri, mi ko lama aza fo!

²³Yesu nga ’yo tinia kini, Mi ka eco ra, ’dini! E’yo dria eco ’ba a’ipiri dri ra.

²⁴Coti mva ati nga oyu uru, kini, Ma a’i ra mi ko a’itaako mani ma aza!

²⁵Yesu ka ndre ’ba treni nzuria tualu, eri nga ega orindi onziri dria, kini, Mi orindi ndindiru e’yo eripi kuri, ma azi mi okporu, mi efu eri aliasi ra, mi fi alenia dika ku.

²⁶Erini oyuria uru, erini eri osiria teketeke ’boria, eri nga ani, mva nga ovu ’ba avule; ’ba kakau nga ani ’yo ra kini, Eri dra ’bo.

²⁷Te Yesu nga eri ma dri bi, nga eri enga uru, eri nga pa so ani.

²⁸Eri ka fi joa ’bo, ’ba erini imbale ’diyi nga zi tinia erini ovuria a’dule, kini, Econi amani eri drozaru ku a’disi ya?

²⁹Eri ’yo yi tia kini, Suruti ’dori, econi yini fuzaru e’yo azinisi aluni ku, pe alu Mungu zizasi.

³⁰ Yi nga fu ’dasi, nga aga geri Galiliarisi. Eri leni ’ba azini ma ni ku;

³¹a’disiku eri imba ’ba erini imbale ’diyi, eri ’yo yi tia kini, Mvi ’bani ma ovu fezaru ’ba dri, yi nga eri ’di ra; yi ka eri ’di ’bo, o’du na ma vutia eri nga enga ra.

³²Te yi vani e’yo erini ’yole ’diri ku, yi ru zizu tinia.

³³ Yi nga eca Kaperinaumua; erini ovuria joa eri nga zi yi tia kini, E’yo te emini ozile geriari ngoni ya?

³⁴Yi nga ovu ciri; yini te agata gale yi eselia geria, kini a’dini amboru aga rani yarisi.

³⁵Eri nga ri va, eri nga ’ba mudri drini iri ’diyi omve i vu; eri nga ’yo yi tia kini, ’Ba azini ka le ovu ’ba okoriru, eri ma ovu ’ba dria ma vutiariru, azini ’ba dria ma aza kopiriru.

³⁶Eri nga mva gaaru ’du dria, eri ’ba eri yi eselia; erini eri ’duria wua, eri ’yo yi tia kini,

³⁷’Ba azini ka anzi ’diyi ma azi alu a’i ma rusi, eri a’i ma ra; ’ba azini ka ma a’i ra, eri a’ini ma’i ku, te eri ’ba ma ti epepiri a’i’i,

³⁸Yohana ’yo tinia kini, ’Ba ’ba Imbapiri, ama ndre ndra ’ba azinini orindi onzi droria mi rusi; ama oga eri si, erini ama vuti bile kurisi.

³⁹Yesu ’yo ra kini, Emi oga eri ku; ’ba azini ka tali ’ye ma rusi, econi erini ma ru o’dazaru onzi mbele ku.

⁴⁰’Ba ama dri arupi kuri eri di ovu ama be tualu fo!

⁴¹’Ba azini ka erejea fe emi dri yi mvuzu, ma ma rusi, emini ovule ’ba Kristonirisi, ma ’yo emi tia ndi ndi, orodri erini ngani avi eri dri ku.

⁴²’Ba azini ka anzi nyiri ma a’ipi ’diyi ma aluni fe abazu, yi ka oni amboru anya ’izuri ombe eri ombelekoa, ka eri ’be miri alia, ’yeke.

⁴³I dri ka fe mi aba aba, mi li eri va; mini fizu idri ma alia dri otrulu be, ’diri onyiru aga mini muzu dri iri be jehanumaa, ad inyukokoruri ma aliari ra;

⁴⁴pari eriagani drazu kuria, acini inyuzu kuria.

⁴⁵Mi pa ka fe mi aba aba, mi li eri va; mini fizu idri ma alia acozaruri onyiru aga yini mi ’bezu pa iri be jehanumaari ra;

⁴⁶pari eriagani drazu kuria, acini inyuzu kuria.

⁴⁷Mi mile ka fe mi aba aba,mi nze eri ra; mini fizu suru Mungunia mile alu beri, ’di onyiru aga yini mi ’bezu mile iri be jehanumaari ra;

⁴⁸pari eriagani drazu kuria, acini inyuzu kuria,

⁴⁹Yi nga a’i aciniri ’ba ’ba dria ma ruaa.

⁵⁰A’i eri onyiru; te a’i ma si ka fu ra, emi nga sini ede a’di afasi ya? Emi ma ovu a’ri be emi alia, te emi ovu asi anzuru be emi eselia.