Read lugbara Luka 1 Bible Online

Luka 1 - lugbara bible

Luka 1

¹Ba kakau yini dri ’bale e’yo ovupi ’yezaru yi paria ama eselia ’diyi otizu waraka ma alia kililirurisi,

²ekile ’ba e’yo nde ndrepi milesi engazu okokele e’yo ma azi ngapi ’diyini idrile ama vurile,

³e’yo ’disi ma ndre eri onyiru ma ma si ani waraka e’yo alu alu ecezu mi dri indi, ambo Teofilo, mani e’yo dria ma vuti drole kililiru engazu driorisi;

⁴mi ma ni e’yo yini mi imbazuri ma ada ani.

⁵Ewu Herodeni ovuzu opiru Yudiaarisi, ’ba edeta edepiri ndra indi runi Zakaria’i, amutini Abiya vileri’i eri vile okuri ezoanzi Aronini ’diyi ma azi, ma ru Elizabeti’i.

⁶Yi iritro ovu ’ba kililiru Mungu ma milia, yi aci azita azini e’yo Opini azile ’diyi ma alia e’yo onzi kokoru.

⁷Te mva yini yo, Elizabetini ovule ondonirisi, yi iri tro ’ba dezani.

⁸Eri nga eca ’dini, erini azi kuhanini ovupi pezaru eri driri ngaria amuti erini ma alia Mungu milia,

⁹ekile kubanini adrile ’yele rile, pe eri fizu Opi vile hekalua afa aji be arikariruri vezu.

¹⁰Te etu ’bani afa aji be arikariruri vezuria, ’ba dria yi okupi nguluru ’diyi yi yini de Mungu a’iria amve.

¹¹Malaika Opini pa sopi pari afa aji be arikariruri vezuri ma dri ndiriari nga i e’da eri ma milia.

¹²Zakaria erini ndreria asi erini nga ori oti, urini nga eri bi ci.

¹³Te malaika ’yo eri tia, Mi ru ku, Zakaria, a’disiku zita mini ovu erizaru ’bo, oku mini Elizabetini nga mva ti mi dri, mi nga runi ’da Yohana’i.

¹⁴Mi nga ovu ayikosi nyona be, ’ba kakau yi nga ovu ayikosi osiza erinisi indi;

¹⁵eri nga ovu amboru Opi ma milia, te eri ngani patiefi ma su pi mvu ewa draza be ku; Orindi Alatararuni nga ga eri asia tre, kpere erini efuria andri ma opojo ma aliarisi.

¹⁶Eri nga anzi Israelini oja kakau Opi Mungu yini vu.

¹⁷Eri nga mu eri drilia orindi azini okpo Eliyanirisi, atipi ma asi ojazu anzi yini vu, fezu ’ba e’yo gapi ’diyini acizu ondua ’ba kililiru ’diyini ma alia; suru ’bazu edezaru ngonde Opi dri beni.

¹⁸Zakaria nga ’yo malaika tia, Ma nga di e’yo ’di ni e’yo ngosi ya? Ma ’ba dezani, oku maniri ’ba dezani indi.

¹⁹Malaika nga e’yo omvi kini, Ma Gabiraeli, pa sopi Mungu miliari’i; pe ma ti e’yo ’yozu mi be, e’yo baru ’diyi oluzu mi tia.

²⁰Mi ndre, mi nga ovu ndindiru, mi ngani eco e’yo ’yozaru ku de nga etu e’yo ’diyini yi ’yezuri ecani ku, a’disiku mini e’yo mani ’yoleri a’ile kurisi, te yi nga yi ’ye yi paria ewu yini ka nga eca raria.

²¹’Ba nde yi ri ndra Zakariani te, yi osu tu erini i dri icile hekalu ma aliarisi.

²²Erini efuria econi erini e’yo ’yozaru yi tia ku yi nga ni ani kini eri ndre afa ndreza hekalu ma alia; eri nga e’yo e’da yi dri drisi, eri awi ndindiru ’dani.

²³Eri nga eca ’dini, etu erini azi ngazuri ka i de ra, eri nga mvi akua.

²⁴O’du ’diyi ma vutia oku erini Elizabeti nga mva isu i ma alia, nga i zi mba towi, kini,

²⁵Opi ’ye ma be ’dini ’bo o’du erini ma ndrezu, drinza mani nzezu ’ba ma eseliarisi.

²⁶Mba aziasi Mungu pe malaika Gabiraeli ma ti aku Galilia omvele Nazareti’iria,

²⁷aliria agu Daudi ma oriru omvele Yusufu’irini e’dole jeleri vu; aliria ma ru Mariamu’i.

²⁸Malaika emu eri vu, nga ’yo ra, zi mi ci, mi ’ba ’yeta anzutiri a’ipi turi, Opi eri mi be!

²⁹Te e’yo ’dirisi asini nga oti oti, eri nga i zi ceni kini, ziza ’diri eri ziza ngoni ngori.

³⁰Malaika ’yo eri tia kini, Mi ru ku, Mariamu, mi isu ’yeta anzutiri Mungu vu ’bo.

³¹Mi: ndre, mi nga mva isu mi alia, mi nga agimva ti, mi nga eri ru ’da Yesu’i.

³²Eri nga ovu ’ba amboru, yi nga eri omve Mungu ovupi Uru Turi ma Mvi; Opi Munguni nga eri dri oguna a’bi erini Daudiniri fe,

³³eri nga opi nya suru Yakoboni ma drilia ’dani ’dani; opi nyaza erini ngani i de ku.

³⁴Mariamu nga ’yo malaika tia, E’yo ’diri nga ovu ngoni ya, de isu ma lani nga agupi be ku ka?

³⁵Malaika nga e’yo omvi, nga ’yo eri tia, Orindi Alatararu nga emu mi dria, okpo Mungu ovupi Uru Turini nga ovu mi drilia endrilendrile; e’yo ’disi afa nde alaru mini mule tileri, yi nga eri omve Mvi Munguni.

³⁶Mi ndre, mi amvi Elizabeti, eri ka tro de ’bo ti, te eri isu mva i ma alia indi; mba ’diri eri mba o’depi oku ndra omvele ondoniri ma dria aziari’i.

³⁷A’disiku e’yo aluni ngani ovu ecokokoru Mungu vuni ku.

³⁸Mariamu kini, Mi ndre, ma ati’bo Opini; e’yo ma ’ye i ma vu mini ’yolerile. Malaika nga di eri ku ra.

³⁹Mariamu enga o’du ’dayisi, mu angu uru oni driaria mbele, ca aku Yudania,

⁴⁰nga fi Zakaria vile joa, nga Elizabetini zi ra.

⁴¹Eri nga eca ’dini, Elizabeti ka zita Mariamuni eri, coti mva mbu eri alia; Orindi Alatararu ga Elizabeti ma asia tre,

⁴²eri nga oyu o’duko urusi, nga ’yo kini, Mi ovu asi ndriza be oku azini ma eselia, azini afa mi opoari eri asi ndriza be indi!

⁴³E’yo ’diri ’ye i ma vu ngoni ya, Opi mani ma andrini ecazu ma vu ’donini ya?

⁴⁴Mi ndre, o’duko mini ma zizuri ka eca ma bilia ra, mva mbu ma alia ayikosi.

⁴⁵Te ’ba a’ipiri ovu drilebaru; e’yo nde Opini ’yole tiniarini ngale ovule ’yezarurisi.

⁴⁶Mariamu nga ’yo ra, Asi mani eri e’yo Opini inzi,

⁴⁷orindi mani ovu ayikosi Mungu ma Papirisi,

⁴⁸a’disiku eri ndre ati’bo zanaro erini ma candi ’bo. Te emi ndre, engazu curu’do a’bianzi dria yi nga ma omve drilebaru;

⁴⁹a’disiku ’ba ovupi okpo be turi ’ye ma vu e’yo amboni, te ru erini ovu alatararu.

⁵⁰Yiki erini nga eca ’ba eri rupi ’diyi ma dria a’bianzi vusi a’bianzi vusi.

⁵¹Eri ’ye e’yo okporu eri ma wusi, eri ere ’ba afu be ’diyi asisile yi ma asiarisi ’bo,

⁵²eri onze opi oguna driarisi ra, eri ’ba ’ba ele ’diyi uru;

⁵³eri fe ’ba abiri be ’diyini trazu afa onyirusi ’bo, te eri dro ’ba afa e’ipi ’diyi mvizu pirini.

⁵⁴Eri ko ati’bo erini Israeli ma aza, ’dini eri ma ega yiki ani,

⁵⁵ekile ndra erini olule a’bi amani ma tia, ada, Iburahimu pi ma tia ori erini be ’dani ’danirile.

⁵⁶Mariamu ovu eri be kile mba nale, nga di mvi aku inia ndo.

⁵⁷Etu Elizabetini mva osizuri eca ra, eri osi agimvani,

⁵⁸’Ba eri ma jotilea ogogo ’diyi pi ori’ba erini pie, yi eri kini Opi ’ba yiki ini eri vu amboru, yi nga ovu ayikosi eri be.

⁵⁹Eri nga eca ’dini, 0’du arorisi yi mu mva ma agele lizu; yi ’ye eli omve Zakaria i ati ma ru vusi,

⁶⁰te andrini nga e’yo omvi kini, ’Dini yo; te yi nga runi ’da Yohana’i.

⁶¹Yi ’yo eri tia, Ori’ba mini ma azi ’bani runi omvele ’dinini yo.

⁶²Yi nga atini aku drisi lezu eri le ’ba ma omve mva ma ru ngoni yari nizu.

⁶³Eri omve bau e’yo sizu driniari, eri nga si kini, Ru erini Yohana’i. Yi dria nga osu tu.

⁶⁴Tileniri nga ovu zizaru coti, andreni nga ovu ayuzaru indi, eri nga e’yo ’yo Mungu inzizu.

⁶⁵Uri eca ’ba dria ovupi yi ma jo ejelea ’diyi vu. E’yo ’diyi nga ku wakaka kpere angu Yudiaa oni dria ururia dria;

⁶⁶’ba dria eripi ’diyi ’ba e’yo ’diyi yi asia ci, kini, Mva ’diri nga di ofu ’ba ngoniruni ya? A’disiku dri Opini ovu eri be.

⁶⁷Orindi Alatararu nga ga ati Zakaria ma asia tre, eri nga e’yo ondri ’yozu kini,

⁶⁸Ru Opi Mungu Israelinirini ma ovu inzizaru, erini ’ba erini andrile azini azi ’ba onzezuri ’yele yi dririsi,

⁶⁹erini o’yu pataniri engale uru, ama dri ati’bo erini Daudi ma joarisi,

⁷⁰(ekile erini ’yole nabi erini alatararu ovupi ndra drio ’diyi ma tisirile)

⁷¹pata nde erini ama pazu ama juru dri, azini ’ba ama ngupi onzi ’diyi dri driari’i;

⁷²yiki ’bazu ama a’bipi vu, aziza erini alatararuri egazu,

⁷³oyo nde ndra erini sole a’bi amani Iburahimu vuri’i,

⁷⁴kini eri pa ama juru amani dri ama ma nga azi erini uri kokoru beni,

⁷⁵o’du amani ovuzuria dria, e’yo alatararuri pisi eri ma milia e’yo kililiruri be.

⁷⁶Te mi indi, mvaa, ’ba yi nga mi omve Mungu ovupi Uru Turi ma nabi’i; mini ngale mule Opi ma drilia leti erini edezurisi,

⁷⁷fezu suru erini ma ni e’yo patani i erini ezata yini wulerisi,

⁷⁸asi ndriza yikiru Mungu amanirinisi, asi ndriza ndesi angu atiza ibi esi ’bua eca ama andrizu

⁷⁹diza fezu ’ba ripi angu iniciciru dra ma endrilendriari ma alia ’diyi dri, ama dri cezu pa ’bazu geri asi anzuruniria.

⁸⁰M va co ra, orindi erini eca Okporu, eri ovu angu didia de nga o’du erini i ecezu Israeli vuri ecani ku.