Read lugbara Luka 10 Bible Online

Luka 10 - lugbara bible

Luka 10

¹ E’yo ’diyima vutia, Opi nga ’ba kali aziriazini ’diyi ope,ngayi ti pe iri iri muzu i drilia aku azini pari dria alu alu i ma ngulupini ’yezu muzuria.

²Eri nga ’yo yi tia, Anya kaza ka tu, te ’ba azi ngapi ’diyi were; e’yo ’disi emi ’ba matu Opi anya kaza ma e’i vu, eri ma pe ’ba azi ngapi ’diyi ma ti anya kaza erini ma alia.

³Emi mu leti eminia; emi ndre, ma pe emi ti ’balau eselia ekile kabiloanzile.

⁴Emi ma su okporo ku, jurua ku, enyiriko paari ku; azini emi ma zi ’ba ci ci geria aluni ku.

⁵Emini ngaria firia jo ngonini ma alia, emi ’yo okoni, Asi anzuru ma ovu jo ’diri ma dria!

⁶Mva asi anzuru beri ka ovu ’daa indi, asi anzuru eminiri nga ri eri dria; te ka ku, eri nga emvi emi vu dika.

⁷Emi adri jo ’diri ma alia, afa yini fele emi dri ’diyi nyaria, mvuria, te ’ba azi ngapiri fu dri oya a’izu ra; emi mu ovuzu jo vusi jo vusi ku.

⁸Aku nde emini fizu, yini emi a’izuria, emi ma nya afa ’bani ’bale emi miliari ra;

⁹emi ati ’ba azoru angu ndea ’diyi ra, emi ’yo yi tia indi, Suru Munguni eca emi vu ogogo ’bo.

¹⁰Te aku emini fizu yini emi a’izu kuria, emi fu mu gboko aku ndeniri ma alia, emi ’yo,

¹¹Irifura nde ovupi aku eminia i ebipi ama pa ageleari, ama ewe e’yo eti nzezu emi dria; ka dini ti, emi ni ’diri, kini, suru Munguni eca emi vu ogogo ’bo.

¹²Ma ’yo emi tia, O’du ’darisi e’vo lizani nga ovu ewaru tu aku ’dari dria aga Sodomu driari ra.

¹³Candi mi dri, Korazini candi mi dri, Betesaida! tali okpo be ovupi ’yezaru emi ma alia ’diyi ka ovu ndra ’yezaru Turoa azini Sidonia, te’do yi oja yi asi ndra drio, koliba suzu yi ruaa orizu of uta alia candisi,

¹⁴Te e’yo liza ma alia e’yoni nga ovu ewaru tu emi dria aga Turo pi ma dria Sodomu beri ra.

¹⁵Mi’i Kaperinaumu la, yi nga mi ’du ’ba uru kpere ’bua ya? Mi nga si va kpere Pari ’ba drazaniri ma alia

¹⁶’Ba e’yo emini eripiri eri e’yo mani eri ra, ’ba emi gapiri eri ma ga, azini ’ba ma gapiri eri ’ba ma ti epepiri ga’i.

¹⁷’Ba ndraka kali aziri ’diyi nga emvi ayiko be, kini, Opi, ka tro orindi onzini ti, yi e’yo amani eri mi rusi ra!

¹⁸Eri ’yo yi tia, Ma ndre Satanini e’deria ’bua ekile ovini galerile.

¹⁹Mi ndre, ma fe emi dri okpo erinu pa tuzu uri pi ma dria otunukua be ’bo, azini vini okpo okpo dria juruniri agazu; afa azini aluni emi ’yepi onzini yo.

²⁰Ka’dini ti, emi ovu ayiko be e’yo ’dirisi, kini orindi nde yini e’yo emini erilerisi, ’dini ku; te emi ma ovu ayiko be emi runi ovule sizaru ’bua ’borisi.

²¹Etu nde ’dasi eri ovu ayiko be Orindi Alatararusi, eri nga ’yo, Ma mi inzi tu, Ata, mi Opi ’bu pini nyaku beri, mini e’yo ’diyi ozile ’ba onduaru pi ma milia ’ba e’yo vapi kililiru ’diyi be ra, yi ecezu ’ba odekuaru ’diyi dririsi; e, Ata, ’yezu ’diniri ovu onyiru mi milia.

²²Ma Ati fe afa dria ma dri ’bo; azini ’ba aluni nini Mvi eri a’di’i yari ku pe Ata’i a’dule, azini ’ba aluni nini Ata eri a’di’i yari ku pe Mvi’i a’dule, azini vini ’ba Mvini lele Atani ecezu eri driri’i.

²³Erini ti coria ’ba erini imbale ’diyi vu, eri nga ’yo yi tia oyokolosi, Mileefi afa emini ndrele ’diyi ndrepiri ovu drilebaru!

²⁴Te ma ’yo emi tia kini, nabi kakau meleki pie, yi le ndra afa emini adrile ndrele ’diyi ndre, te ndreni ku; yi le afa emini erile ’diyi eri indi, te erini ro.

²⁵ Mi ndre, ’ba azita imbapiri alu nga pa so uru, eri o’bizu kini, ’Ba ’ba Imbapiri, ma ma ’ye ngoni ka, mani idri ’dani ’dani isuzu awitaru ani ya?

²⁶Eri ’yo eri tia, Si ndra azita ma alia e’yo ngoni ya? Mi la ngoni ya?

²⁷Eri nga omvi ’yo kini, Mi ma le di Opi Mungu mini mi asi driasi, mi orindi driasi, mi okpo driasi, mi asisile driasi; mi ma le ’ba ovupi mi jo ejeleari mini mi ngulupi lelerile.

²⁸Eri ’yo eri tia, Mi omvi e’yo ’yeke; mi ’ye ’dini, mi nga di ovu idri be ani.

²⁹Te eri’i, erini lele i ngulupi ecezu onyirusi, nga ’yo Yesu tia, Te ’ba ovupi ma jo ejeleari a’di’i ya?

³⁰Yesu nga e’yo omvi, ’yo ra kini, Agu azini enga Yerusalemua esi muzu Yerikoa; nga dri fu oguou afa opapi ’diyi be. ’Ba nde ’diyi otru bongo erini, co eri, mu di ra, ku eri de eri ’ye dra dra.

³¹Isu eri eca ’dini, ’ba kuhaniru alu nga si leti andraleru ’dasi; ka eri ndre ra, eri ali leti kalaarisi.

³²’Ba Levini ’ye trotro ’dini indi, eri ka eca pari ’daria, ka eri ndre ra, eri nga aga leti kalaarisi.

³³Te ’ba Samariaari alu erini aciria, nga eca eri vu; ka eri ndre ra, yiki nga eri fu erisi,

³⁴eri emu vunia ogogo, nga odu pi osu patiefi ma su be bile erini ma milia, nga ombe bongosi; eri nga eri ’ba akanya iniri ma dria, nga eri eji jo ’ba acipi ad ’diyini Lazoria, eri nga eri agei teo

³⁵Dru ’dini eri nze silingi iri, fezu jo e’i dri, ’yozu kini, Mi te di eri ma agei ci; afa mini ezale silingi ’diyi ma driari, mani emviria ma nga ariotini omvi mi dri ma’i.

³⁶Ka’dini ’ba na ’diyi ma eselia, mi ega a’di ovu ’ba dri fupi oguou be ’diri ma agyi jo ejeleariruni ya?

³⁷Eri nga ’yo ra, ’Ba yiki ’bapi eri vuri’i. Yesu ’yo eri tia, Mi mu ’ye ’dini indi.

³⁸Yini aciria eri fi aku azinia; oku alu runi Marita nga eri a’i jo inia.

³⁹Amvipi erini runi Mariamu’i ri Opi ma palaaleru e’yo erini erizu.

⁴⁰Te Maritani de i ecandiria azi kakausi, eri nga emu vunia, nga ’yo ra, Opi la, mi egani e’yo ma amvipini ma kuzu au ngazu a’duleri ku ya? Mi azi eri ma ko ma aza fo.

⁴¹Te Opi nga e’yo omvi, ’yo tinia, Marita, Marita, mi asini oti oti mini otaria afa kakau ma ’yezasi;

⁴²te di afa leleri ovu alu a’dule. Te Mariamu pe ini afa esele onyiru, yini ngale pale eri ma dria kuri’i.