Read lugbara Luka 11 Bible Online

Luka 11 - lugbara bible

Luka 11

¹Eri nga eca ’dini, erini Mungu ziria pari azinia, ka de zizu ’bo, ’ba erini imbale ’diyi ma azi alu nga ’yo eri ria, Opi, mi imba ama Mungu zizasi, ekile Yohanani ndra ’ba erini imbale ’diyi imbalerile.

²Eri ’yo yi ria, Emi ka Mungu zi, emi ’yo ’dini: Ata, ru mini ma ovu inzizaru. Suru mini ma emu.

³Etu vusi etu vusi mi fe ama dri nyaka o’du andruniri;

⁴mi ku e’yo onzi amani, te ama’i indi, ama ku mari ’ba dria alu alu mari nyapi ama vurini; mi ji ama obeta ma alia ku.

⁵Eri ’yo yi ria, ’Ba emi eselia a’di’i, ovupi agyi beri, agyi nde ka nga eca eri vu iniaayi, ka nga ’yo eri ria, Ma agyi, mi fe ma dri enya olemiru na toboru;

⁶te ma agyi engapi aciari eca ma vu, te afa mani ngale fele eri driri aluni yo;

⁷eri nga e’yo omvi geri jo aliarisi ’dini ya, kini, Mi ecandi ma ku; ma opi lotile ’bo, azini anzi mani yi ovu ma be pari dria; econi mani ngazaru fezu mi dri ku?

⁸Ma ’yo emi ria, Eri ka enga fezu eri dri erini ovule eri agyirisi ku ti, te erini zile dika dikarisi eri nga enga ra, eri nga afa erini a’ile ’diyi fe eri dri ra.

⁹Ma ’yo emi ria indi, Emi zi, eri nga ovu fezaru emi dri; emi ndru, emi nga isu ra; emi kpo, eri nga ovu zizaru emi dri.

¹⁰A’disiku ’ba dria alu alu afa zipiri eri a’i ra, ’ba afa ndrupiri eri isu ra, ’ba kpopiri dri yi nga zi ra.

¹¹’Ba emi eselia ovupi ataru, mva erini ka enya olemi a’i eri dri, ngapi eri dri oni fepi’iri a’di’i ya?

¹²Eri ka nga a’ugbe a’i, eri nga di eri dria otunukua fe’i ya?

¹³Ka’dini emi ’ba onziru ’diyi ka ni afa onyiru fezu emi anzipi dri ra, Ata emini ’buari ngani Orindi Alatararu fe ’ba eri zipi ’diyi dri aga rakuya?

¹⁴Eri ovu de orindi onzi ndindiruri droria. Eri nga eca ’dini, orindi onzi ka fu amve ’bo, ’ba ndindiru ’ba e’yo ’yo; ’ba ongulumuru yi nga osu ani osu osu.

¹⁵Te ’ba azini yi eselia ’yo ra, Eri orindi onzi odro Beelizebuli opi orindi onzi ma i driliari ma okposi;

¹⁶te ’ba azini, yini eri o’biria, nga eceta engapi ’buari ndru eri vu.

¹⁷Te eri’i, erini asisile yini nile rarisi, nga ’yo yi tia, Suru nyaza dria yi esele opi ombasi ceni ’diyi nga dri ja ra, aku indi ka i esele co ceni eri nga i eza ra.

¹⁸Satani ka i esele co ceni, suru erini nga pa so ngoni ngoni ya? A’disiku emini ’yole ma nze orindi onzi okpo Beelizebulinirisi.

¹⁹Te ma ka orindi onzi odro okpo Beelizebulinisi, anzi emini yi di yi odro a’di ma okposi ya? E’yo ’disi yi nga ovu ’ba e’yo emini lipi ’diyiru.

²⁰Te ma ka orindi onzi odro drileju Mungunisi, awa’dini suru Munguni eca emi vu ’bo.

²¹’Ba okpo be i osupi afa ombanisiri ka i ma aku agei te, afa erini dria yi nga ovu ’yeke;

²²te ’ba okpo be eri agapi rari ka nga emu ’ba nderi ma dria eri agazu, eri nga afa ombani erini asi ’bazu drinia egale kini i nga i pa ani ’diyi o’du dria, nga di afa erini opale ombaa ’diyi awa ra.

²³’Ba ovupi ma be kuri eri ovu ’ba ma dri arupiri, azini ’ba afa okupi ma be tualu kuri eri ere saaru.

²⁴Orindi ondiru ka efu ’ba aliarisi ’bo, eri aga pari yi kokorua, erini ande liza ndaria; te eri ka isu ku eri ’yo, Ma nga dri atri mvizu jo ndra mani efuzuria.

²⁵Eri ka eca ra, eri isu ko jo ale ’bo, ede eri ra.

²⁶Eri nga di mu orindi azini aziri eri agapi onzisi ra ’diyi oku i vu, yi nga fi ovu ’daa; ’dini agu nderi ma e’yo vileri nga eca onzi aga okori ra.

²⁷Eri nga eca ’dini, erini e’yo ’diyi ’yoria, oku alu ’ba ongulumuru ma eseliari nga oyu o’duko urusi, nga ’yo eri tia, Opojo mi ojipiri ovu ’drilebaru, ba mini ndruleri be.

²⁸Te eri ’yo ra, Kani bani ’ba e’yo Munguni eripi, tani mbapi ’diyi, yi drilebaruni!

²⁹ ’Ba ongulumuru ’diyini yi okuria eri vu, eri ’ba ’yo kini, ’Ba a’bianziru ewu ’dosi ’diyi yi ’ba onzini; yi eceta nda, te eceta ngani ovu fezaru yi dri ku, pe lu eceta Yonani a’dule.

³⁰Mvi ’bani eri ovu ecetaru a’bianzi ewu ’dosi ’diyi drini, ekile ndra Yonani ovule ecetaru ’ba Ninevea ’diyi dririle.

³¹Oku melekiru engapi angu uruleruari nga enga etu e’yo lizurisi a’bianzi ewu ’dosi ’diyi be, eri nga yi nde e’yo lizasi ra; erini ndra engale angu ma kalatini asizuria ondua Sulemanini erizurisi; te emi ndre, agu Sulemanini agapi rari eri ’doa ci.

³²Etu e’yo lizurisi ’ba Ninevea: ’diyi nga pa so a’bianzi ewu ’dosi ’diyi be, yi nga yi nde e’yo lizasi ra; yini yi asi ojale e’yo Yonani olulerisirisi; te emi ndre, ’ba Yonani agapi rari ’doa ci.

³³’Ba aluni tala ’ipi eri ’bapi pari zizarua, kani acalaka etiani yo, te eri nga eri ’ba pari tala ’bazuri ma dria, ’dini ’ba fipi ’diyi ma ndre ani dizani beni.

³⁴Tala mi ruani eri mi mileni; te mi mile ka ovu alaru, rua mini dria nga ga dizasi tre; te mi mile ka ovu onzi, mi ruani nga ga angu bizasi tre indi.

³⁵Ka’dini mi lu onyiru diza ovupi mi aliari kazu ovuzu bizaru ku.

³⁶Mi rua dria ka ga dizasi tre, ’dini esele aluni ka ovu bizaru ku, eri nga ovu diza be tre, ekile talani angu emvele mi dri diza erinisirile.

³⁷De erini e’yo ’yoria, ’ba Farisaini nga eri omve nyaka nyazu i be; eri nga fi, ri nyaka tia.

³⁸Te ’ba Farisaini ka ndre ra, asi erini osu tu a’disiku Yesuni nyaka nyale ’dani rua ojikokorurisi.

³⁹Opi nga ’yo eri tia, Te di emi ’ba Farisaini, emi adri ejea pi ma nguku amveleruri oji ko’biani be’i, te alialeru emi ga tre afa opaza pisi e’yo onzi be.

⁴⁰Emi ’ba azazani! ’Ba nguku amveleruri edepiri edeni alialeruri indi ku ya?

⁴¹Emi fe afa ovupi alenia ’diyi afa fezaru; te mi ndre, afa dria nga ofu alaru emi dri ani.

⁴²Te candi emi dri, emi ’ba Farisaini! emi adri tibi ma esele mudriniri fe ra, afa arikariruri pi, mondrokolo pi, tibi be dria, te emi adri e’yo liza onyiruri pi ku ja leta Munguni be; te onyiru emi ka ndra e’yo ’diyi ’ye, e’yo azini ’diyi kuzu ku indi ’yeke.

⁴³Candi emi dri ’ba Farisaini! emini oguna drileru pari ’bani yi okuzuriari pi lele zita cuua ’diyi berisi.

⁴⁴Candi emi dri emini ovule ekile nyadri i e’dapi ku ’diyilerisi, te ’ba acipi yi ma dria ’diyi nini ku.

⁴⁵’Ba azita imbapi ’diyi ma azi alu nga e’yo omvi, ’yo eri tia kini, ’Ba ’ba Imbapiri, mini e’yo ’diri ’yoria mi di ama onzo indi.

⁴⁶Eri nga ’yo, Caridi emi dri indi, emi ’ba azita imbapi ’diyi la! emini teri nzizaru ’bani ’dule ewasi ’diyi o’bale ’ba driarisi, de te emi ngulupi eloni afa nzizaru nde ’diyi drianzi emini ma azi alunisi ku.

⁴⁷Candi emi dri! emini nabi ma nyadri silerisi, de te emi a’bipi ofu ndra yini.

⁴⁸’Dini emi ovu ’ba e’yo eti nzepi ’diyiru, azi emi a’bipini ’yeleri a’izu; yiruni yi ofu yi ra, te emi’i, emi si yi ma nyadrini.

⁴⁹E’yo ’disi ondua Munguni ’yo indi, Ma nga nabi piyi ti pe ’ba ti opele ’diyi be yi vu, yi nga azini ’diyi ofu ra, azini ’diyi inza ra,

⁵⁰’dini yi nga nabi dria ma ari ’bani adale engazu nyaku tini e’dozurisiri-ma arioti a’i a’bianzi ewu ’dosi ’diyi vu,

⁵¹engazu ari Habilinisi ecazu kpere ari Zakariani vu, agu nde yini fule pari edeta edezuri pi ma eselia jo Munguni beri’i. Ada, ma ’yo emi tia, eri nga ovu a’izaru a’bianzi ewu ’dosi ’diyi vu.

⁵²Candi emi dri, ’ba azita imbapi ’diyi la emini fungua onduani palerisi; emi ma ngulupi fini ku, te emi oga ’ba ’yepi fipi ’diyi fiko si.

⁵³Eri ka efu ’daarisi ’bo, karani piyi ’ba Farisaini be yi nga ’ba ozo eri dria okposi, yi fe eri dri e’yo ’yozu e’yo o’biru ma dria,

⁵⁴e’yo erini mbazu, yi ma isu e’yo azini efupi eri ma tiliari ani.