Read lugbara Luka 12 Bible Online

Luka 12 - lugbara bible

Luka 12

¹’Ba ongulumuru alifu kakau yini yi okuria tualu, ri ani yi ma pa otu otu, etu ’dasi eri e’do okoni e’yo ’yo ’ba erini imbale ’diyi ma tia kini, Emi te emi agei akufi ’ba Farisainirisi, akufi nderi lokirini.

²Te afa aluni ovupi a’buzaru ngapi i ecepi kuni yo, te afa aluni ovupi zizaru ngapi ovupi nikokoruni yo.

³E’yo ’disi e’yo emini ’yole angu iniari, eri nga ovu erizaru angu emvea, azini e’yo emini ndrole ’ba bilia jo aliza alialeruriari, yi nga oyu jo dria uru.

⁴Ma ’yo emi ma agyiru ’diyi ma tia, emi ma ru ’ba ’ba rua fupi ra, te ecopi afa azini ’yepi vutinia ku ’diyi ku.

⁵Te ma nga ’ba emini ngale ruleri ece emi dri: emi ma ru ’ba ovupi okpo be ’ba rua fuzu raka ’ba ’bezu miri acia ndori’i; ada, ma ’yo emi tia, emi ma ru eri’i!

⁶’Ba jeni burua sente irisi towi towi ku ya? Te yi ma eselia aluni avini Mungu dri ku.

⁷Te ka tro dribiefi emini ti, kalafeni ovu dria lazaru. Emi ma ru di ku: aje emini aga aje burua kakauniri ra.

⁸Te ma ’yo emi tia, ’Ba dria alu alu ma e’dapi ’ba miliari, Mvi ’baniri nga eri e’da malaika Munguni ma; milia indi;

⁹te ’ba ma gapi ’ba! miliari, eri nga ovu gazaru malaika Munguni ma milia indi.

¹⁰’Ba azini ka e’yo onzi ’yo Mvi ’bani ma ruaa, yi nga e’yo nde ku ja; te ’ba ka Orindi Alatararu o’da’i, yi ngani e’yo erini ku aluni ku.

¹¹Yi ka emi eji pari ’bani yi okuzuria, ’ba opiru ’diyi pi ma milia, ’ba ’wara be, asi emini ma oti e’yo emini ngale omvilerisi kani ’yolerisi ku;

¹²etu nde ’dasi Orindi Alatararuri nga emi imba e’yo emini ngale ’yolerisini.

¹³’Ba alu ’ba ongulumuru ma eseliari nga ’yo eri tia, ’Ba ’ba Imbapiri, mi azi ma adripi tia eri ma awa afa ama atini kuleri ama dri eri be.

¹⁴Te eri ’yo tinia, Agu, a’di ’ba ma ovuzu e’yo lizu kani afa awazu emi drini ya

¹⁵Eri ’yo yi itia, Emi ndre onyiru, emi te emi agei emi kazu li ’bazu afa ’ba azininisi ku; idri ’banini ovule afa erini ovuzu yi be kakau ’diyi ma alia kurisi.

¹⁶Eri nga e’yo o’beza olu i yi tia kini, ’Ba afa e’iruri ma amvua, afa ka tu;

¹⁷eri nga ani e’yo ega i asia kini, Ma nga ’ye ngoni, pari mani nyaka ’bazurini ovule yorisi ya?

¹⁸Eri nga ’yo ra, Te di ma nga ’ye ’dini: ma nga ero mani anzu ra, ma nga azini amboru agapi ra ’diyi co ra; ma nga anya mani pi oku alenia afa mani onyiru ’diyi be dria.

¹⁹Ma nga di ’yo ma orindi tia, Orindi mani la, mi ovu afa mini onyiru ’diyi be kakau mini tani mbale, ngapi dri fupi eli kakausi ’diyi; mi li di ande, mi nya, mi mvu, mi ovu ayikosi.

²⁰Te Mungu ’yo eri tia, Mi ’ba azazani! ni ’dorisi ma nga orindi mini a’i mi dri; afa dria mini edele ’diyi nga ovu a’dini ya?

²¹Awa’dini ’ba lonyi ma ta mbapi eri ngulupi dri, te ovupi afa e’iru Mungu vu kuri, eri ’dini.

²²Eri nga ’yo ’ba erini imbale ’diyi ma tia, E’yo ’disi ma ’yo emi tia, emi asi ma oti idri emini ma e’yosi ku, kani emi nga a’di nya ya; kani rua emini ma e’yosi, emi nga a’di su ya ’dini ku.

²³Te idri eri aga nyaka ra, rua aga vini afa suza ra.

²⁴Emi ega e’yo kurekeni: yi rini ori ku, yi loni ku, pari yini nyaka ta mbazuri yo, ero vini yo, te Munguni yi dri nyaka feni. Aje emini aga aria ma aje tu!

²⁵Te ’ba emi esela ecopi i erezaru zozu dika wuale alusi eri asini otilerisiri; a’di’i ya?

²⁶Ka econi emini e’yo gakandiaru ’dinileri ’yezaru ku, emi asini oti e’yo acepi ’diyisi a’disi ya?

²⁷Emi ega e’yo ojofu asea ’diyini, yini coria; yi ngani azi ku, pini baka ku indi; te ma ’yo emi tia, ka tro Sulemani ma ngulupi diza erini be dria ti, suni afa i ruaa ekile ojofu ’diyi ma azi alule ku.

²⁸Te Mungu ka afa suza fe iribi aseari dri ’dini, iribi nde ovupi andru indi te drusi ’bele aciari, agapiri eri ngani afa suza fe emi dri ku ya, emi ’ba a’ita be were ’diyi la?

²⁹Emi nda afa emini ngale nyaleri ku, kani mvuleri ku indi, emi asi ma ombu ombu saaru ku.

³⁰Te afa ’diyi dria suru nyakua ’diyi nda’i; te Ata emini ni kini emi ma ovu afa ’diyi be ra.

³¹Te emi ma nda suru Munguni’i, afa ’diyi ma nga ovu fezaru emi dri ereniru.

³²Emi ma ru ku, emi kabilo were: yi okupi nguluru ’diyi, te eri onyiru emi Ati ma milia suru nderi fezu emi dri.

³³Emi ma ozi afa emini ovuzu yi be ’diyi ra, emi ma fe alio dri; emi ma ci emi dri okporo ngapi depi ku ’diyi, lonyi ovupi ’dani ’buari’i, pari oguouni ecazu ogogo ku, azini odukoduni ezazu kuria.

³⁴’Dini pari lonyi eminini ovuzuria, ’daa asi emini nga ovu indi.

³⁵ Enyi emi opiliari ma ovu anzuzaru kirikiri, tala emini ma ovu ’izaru indi,

³⁶emi ngulupi ma ovu kile ’ba opi yini ma dri tepi ’diyile, erini emviria engazu omu oku bizaniria, ’dini erini ecaria, kporia, yi ma zi eri dri perepere zi zi beni.

³⁷Ati’ba opini ngazu emuzu yi isuzu yini eri ma dri teria ’dayi ovu drilebaru; ma ’yo emi tia ndi ndi kini eri nga i opile anzu, eri nga yi ’ba rizu va nyaka nyazu, eri nga emu nyaka fe yi dri.

³⁸Eri ka emu enyaacio’dua, kani iniayii, eri ka yi isu ’dini, ati’ba ’diyi yi ovu drilebaru.

³⁹Te emi ma ni ’diri kini, jo e’i ka ndra etu oguouni ngazu emuzuri ni ra, te’do econi ndra erini yi kuzaru jo erini ma eti luzu ku.

⁴⁰Emi ma ovu di ngonde indi; a’disiku Mvi ’bani emu etu emini e’yoni egazu kuria.

⁴¹Petero nga ’yo ra, Opi, mi ’yo e’yo o’beza ’diri ama ma e’yosi, kani ’ba dria ma e’yosi ya?

⁴²Opi ’yo ra, ’Ba afa agei tepi asi adasi azini ondua be, eri ma opini ngale ’bale ’ba jo erinia ’diyi ma drilia nyaka o’bizu awazu yi dri etunini ecaleri vusiri, eri a’di’i ya?

⁴³Ati’bo ’dari nga ovu drilebaru, opi erini ka nga eca eri isuzu ’yeria ’dini.

⁴⁴Ma ’yo emi tia ada ada kini, eri nga eri ’ba amboru afa erini ma drilia dria.

⁴⁵Te ati’bo ’dari ka ’yo i asia, Opi mani eri i dri ici ici, emuni mbele ku; ’dini eri ka e’do ’ba ati’ba agianziru ’diyi pi ocozu ati’ba ezoanziru ’diyi be, ka e’do vini nyazu, mvuzu, azazu ewasi indi,

⁴⁶isu ati’bo ’dari ma opini nga eca etu erini e’yoni egazu kuria, sawa nde erini nile kuria, eri nga eri co okposi, nga afa ma esele fele eriniri ’ba ’ba ovupi asi adarusi ku ’diyi be.

⁴⁷Ati’bo e’yo opini leleri nipi ra te afa edepi ngonde ku, e’yo opini leleri ’yepi ku ’dari, yi nga eri co tu.

⁴⁸Te ’ba e’yo nipi kuri, ka tro e’yo dri fupi cotasi ra ’diyi ’ye ti, yi nga eri co ani were. ’Ba yini afa fele drinia turi dri, yi nga afa a’i tu; te ’ba yini afa kakau fezu tani mbazu eri vuri dri, yi nga ani afa kakau agapi ’diyi a’i ra.

⁴⁹Ma emu aci adazu nyaku ma dria; ka ti ko ’bo are, ma le di a’dini ya?

⁵⁰Te baputizi mani indi, te ma ma bi eri ra; asi mani ovu nzizaru tu de nga erini i ’yeria i paria kurisi!

⁵¹Emi ega emi asia kini ma emu asi anzuru fezu nyaku dria? Ma ’yo emi tia ra, ovuni ’dini ku, te ma emu bani awata fezu ovuzu nyakua;

⁵²engazu curu’do ’ba towi jo alua ’diyi nga awa awa, ’ba na nga awa ’ba iri ’diyi be, iri na ’diyi be;

⁵³yi nga yi awa, ata pi mvi be, mvi pi i ati be, andri pi i zi be, zi pi i andri be, edra pi i edri be edri pi i edra be.

⁵⁴Eri nga ’yo ’ba ongulumuru ma tia, Emi ka iriti ndre engaria etuni ’derialeru, emi adri ’yo mbele mbele, Ozooni emuni; te eri nga eca ’dini.

⁵⁵Emi ka oli ndre liria engazu woko uruleruria, emi adri ’yo, Oli drizani nga emu ra; eri nga eca ’dini indi.

⁵⁶Emi ’ba lokiri be! Emi ni nyaku pi ma mile amazu ’bu beri ra; te emi amani ewu ’diri ma e’yo ku a’disi ya?

⁵⁷Emi lini e’yo kililiru ondua emi ngulupinisi ku a’disi ya?

⁵⁸Mini muria ’ba e’yo lipiri ma milia ’ba mi topiri be, mi ma o’bi asi driasi e’yo edezu eri be letia, eri kazu mi sezu okposi ’ba e’yo lipiri ma milia, ’ba e’yo lipiri kazu mi fezu asikari dri, asikari kazu mi ’bezu arujoa ku.

⁵⁹Ma ’yo mi tia, mi ngani fu ’daa aluani ku de nga mi ofeni sente vile asizuri ku.