Read lugbara Luka 13 Bible Online

Luka 13 - lugbara bible

Luka 13

¹Etu nde ’dasi ’ba azini indi yi nga ’ba Galilia yi ma ari Pilatoni osale edeta yini be ’diyi ma e’yo oju eri tia.

²Eri nga e’yo omvi ’yo yi tia, Emi ega emi asia kini ’ba Galilia ’diyi ovu ’ba onzini aga ’ba Galilia azini ’diyi dria ra, yini candi ’diri isulerisi ya?

³Ma ’yo emi tia, ’Dini ku; te emi ka emi asi oja ku, emi dria nga dri ja ’dini.

⁴Kani ’ba mudri drini aro jo izuru Siloamuarini i asuzu yi dria yi ofuzu ’dayi, emi ega kini yi ’ba mari beni aga ’ba ovupi Yerusalemua ’diyi dria ra ya?

⁵Ma ’yo emi tia, ’Dini ku; te emi ka emi asi oja ku, emi dria nga dri ja ’dini.

⁶Eri nga e’yo o’beza ’diri olu indi: Agu alu ovu elio pati be sale nga erini ma alia; eri emu efini ndru ruania, te eri isuni ku.

⁷Eri ’yo ’ba pati raza edepiri ma tia, Mi ndre, ma emu eli nani ’disi efi ndruzu elio ’diri ma ruaa, te ma isuni ku. Mi ga eri va; eri angu eza toko a’disi ya?

⁸Erini e’yo omviria eri nga ’yo eri tia, Opi, mi ku nga eri eli ’disi indi, de nga ma ofuni etini wara ’bazu ku.

⁹Eri ka efi ’ya vilerisi, onyiru; ka ku, mi nga eri ga va ndo.

¹⁰Eri ovu ’ba imbaria pari ’bani yi okuzu ’diyi ma azi alua o’du sabatonisi.

¹¹Mi ndre, oku indi ovupi orindi eri ’bapi okpo kokoruri be eli mudri drini arori; eri otra i nguluru, econi erini i ejuzaru uru aluni ku.

¹²Yesu ka eri ndre ra, eri nga eri omve ra, nga ’yo tinia, Oku, ma tru mi azo mini ovuzu okpo kokorurisi ’bo.

¹³Eri nga dri ti ruania; oku nde nga i eju kilili coti, nga Mungu inzi.

¹⁴’Ba ’ba dri cepi pari ’bani yi okuzuriari nga ovu di adrasi Yesuni ’ba rua etile o’du sabatonisirisi, eri nga e’yo omvi ’yo ’ba ongulumuru ma tia, O’du azia ’bani ani azi ngazu yi alia ’diyi indi; ka’dini emi emu o’du ’diyisi emi rua atizu, te emi emu etu sabatonisi ku.

¹⁵Te Opi nga e’yo omvi eri tia, Emi ’ba lokiri be ’diyi! ’Ba dria alu alu emi eselia adrini ti erini kani akanya tru licoasi eri jizu yi mvuzu o’du sabatonisi ku ya?

¹⁶Oku Iburahimu ma zaaru, Satanini ombele, mi ndre, eli mudri drini aro ’diri, onyiru yi ma tru eri ombeza eri ma ruaa ’dirisi o’du sabatonisi ku ya?

¹⁷Erini e’yo ’diyi ’yoria, drinza nga ’ba te agata gapi eri be ’diyi bi dria; te ’ba ongulumuru dria ovu ayikosi e’yo inzizaru dria erini ’yele ’diyisi.

¹⁸Eri di ’yo ani, Suru Munguni eri ovu kile a’dile ya? Ma nga eri o’bi a’di afale ya?

¹⁹Eri kile haradali efi aguni e’dule ’bele nga ini ma aliarile; eri zo ra, nga ca patiru, aria ’bua ’diyi nga jorovu si eri ma arakalaa.

²⁰Eri ’yo dika, Ma nga suru Munguni o’bi a’di afale ya?

²¹Eri ovu kile akufi okuni e’dule zile nganufura afazu na ma alia, de nga pini dria kurile.

²²Eri aci aku ambo ambo ’diyi pi ma eselia aku were ’diyi be, ’ba imbazu, erini muria drile Yerusalemua.

²³’Ba azini ’yo eri tia, Opi, ’ba yi opapi ’diyi yi were ya? Eri nga ’yo yi tia,

²⁴Emi o’bi asi driasi fizu jotile luruarurisi; te ma ’yo emi tia, ’ba kakau nga le fi ra, te ngani eco ku.

²⁵Jo e’i ka enga uru, ka jotile opi ’bo, emi ka nga ’ba pa oso amve, jotile kpozu, kini, Opi, mi zi ama dri fo; eri nga e’yo omvi, nga ’yo emi tia, Ma nini pari emini engazuri ku.

²⁶Emi nga di ’ba ’yo, Ama nya ndra, ama mvu ndra mi milia, mi imba ndra ’ba gboko amani ma alia.

²⁷Te eri nga ’yo, Ma ’yo emi tia, ma nini pari emini engazuri ku; emi da emi ma vurisi ra, emi ’ba azi onzi ’yepi ’diyi dria!

²⁸’Dale awu pi nga ovu indi, si nyaza be, emi ka nga Iburahimu pi ndre, Isaka pie, Yakobo pie, nabi pie dria suru Munguni ma alia, de o’be emi ngulupi amve ’bo.

²⁹Yi nga enga geri etuni efurialeruri piarisi, etuni ’derialeruri pie, andraleruri pie, uruleruri pie dria, yi nga ri va suru Munguni ma alia.

³⁰Te mi ndre, ’ba ovupi vile ’diyi ma azi nga ovu ’ba drileru, azini ’ba ovupi drile ’diyi ma azi nga emvi ’ba vileru.

³¹Etu nde ’darisi ’ba Farisaini azini nga emu, ’yozu eri tia, Mi efu ’diarisi, mi mu, Herodeni lele mi fulerisi.

³²Eri nga ’yo yi tia, Emi mu ’yo obalako ’dari ma tia, Mi ndre, andru dru indi, ma orindi onzi ofu amve, ma ’ba rua ati indi, te o’du nasi ma nga azi mani de teketeke i paria ra.

³³Te ti, ma ma mu geri mania andru, drusi, drozi; te econi nabini drazaru pari azinia amve ku, pe kiri Yerusalemua a’dule.

³⁴Yerusalemu, Yerusalemu, nabi ofupiri, azini ’ba yini tini pele vunia ’diyi o’bepi onisiri la! Ma le ndra anzi mini okuzu ma vu ekile a’u andrini i ma anzi okule opile ini ma etiarile ’dini pale si ya, te emi leni ku!

³⁵Mi ndre, jo mini fi di mi dri andruru. Te ma ’yo emi tia indi, Emi ngani ma ndre ku, de nga emi ’yoni ku, ’Ba emupi Opi ma rusiri ma ovu inzizaru!