Read lugbara Luka 15 Bible Online

Luka 15 - lugbara bible

Luka 15

¹’Ba musoro okupi ’diyi ’ba onzi ’diyi be dria, etru yi ogogo eri vu eri ma e’yo erizu.

²Te ’ba Farisaini piyi ’ba waraga sipi ’diyi be nga ono eri ma ruaa ’yozu kini, ’Ba ’diri ’ba onzi a’i, eri nya indi yi be.

³Eri ’yo e’yo o’beza ’diri yi tia, kini

⁴’Ba emi eselia a ’di’i kabilo be tururi, yi ma azi alu ka avi eri dri ra, eri ngani kabilo kali oromi drini oromi ’diyi ku roko dria ku ya, muzu te avipiri ndruzu de eri isuni ku?

⁵Eri ka isu ra, eri ’ba eri ombetia ayikosi.

⁶Eri ka eca akua, eri nga agyi erini piyi omve ’ba eri ma jo ejelea ’diyi be tualu pari alua, eri nga ’yo yi tia, Emi ma ovu di ayikosi ma be, mani kabilo mani avipiri isule rarisi.

⁷Ma ’yo emi tia, ekile ’dinile ayikoni nga ovu ’bua ’ba onzi aluni i asi ojalerisi aga ’ba kililiru kali oromi drini oromi lepi asi ojapi ku ’diyi ma e’yosiri ra.

⁸Kani oku ngori ovupi silingi be mudriri, silingi alu ka avi eri dri ra, eri ngani tala i, ngani jo ale ko ku ya, ndruzu asi driasi de nga eri isuni eri ku?

⁹Ka eri isu ra, eri nga i agyi pi omve ’ba i jo ejelea ’diyi be tualu pari alua, nga ’yo, Emi ma ovu di ayikosi ma be, mani silingi mani avipiri isule rarisi.

¹⁰Ekile ’dinile, ma ’yo emi tia, ayikoni nga ovu malaika Munguni ma milia ’ba onzi aluni i asi ojalerisi.

¹¹Eri ’yo, Agu alu ma agupianzi iri;

¹²mva vileri nga ’yo i ati ma tia, Ata, mi fe ma dri afa mini ma esele ngapi ovupi maniruri. Eri awa di afa ini yi dri ra.

¹³O’du were ma vutia, mvi osipi vileri nga afa dria oku tualu, nga dri ko mu angu ziria; ’daa eri eza afa erini teketeke erini ovule saarurisi.

¹⁴Eri ka eza dria ’bo, liki okporu nga ’de angu ’dari ma alia; eri nga e’do ota afaakosi.

¹⁵Eri nga di mu fi azi ngazu ’ba angu ’da ma e’ipi ’diyi ma azi alu dri; eri pe tini muzu ezo ocezu angu erini ma alia.

¹⁶Eri le tu i ma ale ma tra afa o’borokoru ezoni nyalerisi; te ’ba afa fepi erinini yo.

¹⁷Te eri ka ondua isu i ma ngulupisi eri ’yo, ’Ba azi ngapi ma ati dri, nyakani dri fuzu yi dri yini nyale tiri ’diyi yi karakarau, te ma’i, ma di dra abirisi ’do!

¹⁸Ma nga enga ra, ma nga mu ma ati vu, ma nga ’yo eri tia, Ata, ma eza di kpere ’bua, mi milia indi;

¹⁹sini ma ’bani ngazu ma omvezu mvi miniru dika ku; mi ’ba ma ovuzu ’ba azi mini ngapi ’diyi ma azi alule.

²⁰Eri nga di ra, mu i ati vu. De erini ovuria re, ati ndre eri ra, yiki fu eri erisi, eri nga nzu ra, nga eri o’de ombelea, nga o’bolo ndru avasi.

²¹Mvi ’yo eri tia, Ata, ma eza kpere ’bua, mi milia indi; sini ma ’bani ngazu ma omvezu mvi miniru dika ku.

²²Te ati nga ’yo ati’ba erini ma tia, Emi e’du bongo onyi be agapi driari mbelea, emi su ruania; emi su driadriamva eri dria, emi su enyiriko eri ma paa indi;

²³emi eji ranyaa ngupi tu ’dari, emi li, ama nya di, ama ma ovu ayikosi;

²⁴a’disiku mva mani ’diri dra ndra ra, te eri enga idriru dika; avi ndra ra, te yi isu eri ’boo Yi ’ba di ovu ayikosi.

²⁵Isu de mvi erini okori ovu amvua; eri ka eca jo ageia ogogo, eri nga o’di pi ma o’duko eri ongo tuza be.

²⁶Eri omve ati’bo alu i vu, eri zi tinia e’yo ’diyi ’dini a’di e’yoni ya.

²⁷Eri ’yo tinia, Adripi mini eca ’bo; te mi ati li ranya ngupi turi, erini eri isule rua ala berisi.

²⁸Te eri ovu adrasi tu’i leni fi ku. Ati nga di efu asini omizu,

²⁹te eri nga e’yo omvi ’yo i ati ma tia, Mi ndre, ma nga azi mi dri ati’bole eli kakau ’dipi ti, e’yo mini azileri ma gani nga aluani ku; te ma drini mi feni nga ndriagoa, amani ani ovuzu ayikosi ma agyi be aluni ku.

³⁰Te mvi mini afa mini ezapi teketeke oku saaru ’diyi be ’diri ka emu ra, mi li eri dri kojamva nguzani!

³¹Eri ’yo eri tia, Mva mani la! mi adri ovu ma be o’du! dria, afa dria mani ’diyi yi mini.

³²Te onyiruni ama ma ovu ayikosi nyona be, te adripi mini ’diri dra ndra ra, te eri ovu idriru dika; avi ndra ra, te yi isu eri ’bo.