Read lugbara Luka 17 Bible Online

Luka 17 - lugbara bible

Luka 17

¹Eri ’yo ’ba erini imbale ’diyi ma tia, E’yo kumuru ’bani ani abazu ’diyi ngani ece emukokoru ku; te candi ’ba fepi e’yo nde ma emuri dri!

²Yi ka oni amboru anya ’izuri ombe eri ma ombelekoa, ka eri ’be miria ’yeke, ’di eri dri orodriru aga erini fezu anzi nyiri nyiri ’diyi ma azi aluni abazuri ra.

³Emi te emi ngulupi ma agei; adripi mini ka eza ra, mi ega eri dria, ka i asi oja, mi ku e’yo onzi erini ma avi ra.

⁴Eri ka eza mi vu o’du alusi pale aziri indi, ka emvi mi vu pale aziri ’yozu kini, Ma oja ma asi; mi ma ku di e’yo onzi erini ma avi ra.

⁵’Ba erini opele ’diyi nga ’yo Opi ma tia, Mi fe a’ita amani ma ezu!

⁶Opi ’yo ra, Emi ka ovu a’ita be ekile haradali efile, emi eco te ’yo elio ’diri ma tia, Mi nze mi ola be pi, mi mu mi sa miri ma alia; eri te nga e’yo emini inzi ra.

⁷Te ’ba emi eselia ovupi ati’bo be nga ’yaria kani kabilo oceria ’yopi tinia, erini efiria engazu ngaarisi, Mi emu mbele mbele, mi ri nyaka nya-ri a’di’i ya?

⁸Eri ngani ’yo tinia kini, Mi mu afa mani,nyaleri ede, mi anzu mi opile ayua ’yezu ma dri, kpere mani nyaria azini mvuria ’boria; vilerisi mi nga mi vileri nya azini mvu ndo--’dini ku ya?

⁹Eri adri awa’difo fe ati’bo ini dri erini afa te ini azile eri dri ’diyi ’yelerisi ya?

¹⁰Kile ’dinile emi alu indi, emi ka afa dria yini azile emi dri ’diyi ’ye de ’bo, emi ma ’yo, Ama ati’ba orodri fepi ku ’diyi, ama ’ye kiri azi fele ama ma ’yeri’i a’dule.

¹¹Eri nga eca ’dini, yini muria geri Yerusalemuaria, eri aga trei Samaria pi ma aliasi Galili be.

¹²Erini firia aku azinia, ’ba ofu be mudri ’diyi fu dri eri be, nga pa so re ’dani,

¹³yi oyu o’duko urusi kini, Ambo Yesu la! mi ’ba yiki ama vu.

¹⁴Eri ka yi ndre ra, eri ’yo yi tia, Emi mu emi rua ece ’ba kuhaniru ’diyi vu. Eri nga ecea ’dini, yini muria, yi rua nga ati alaru.

¹⁵’Ba alu yi eseliari, ka ndre i ovu atizaru, eri atri dri vile, nga Mungu inzi o’duko urusi;

¹⁶nga i eco o’bukuru va eri ma palaa, erini awa’difo feria eri dri. Te eri ovu ’ba Samariani.

¹⁷Yesu nga e’yo omvi ’yo kini, ’Ba mudri nde ’diyi atini te alaru ku ya? Te ’ba oromi ’diyi ngoa ya?

¹⁸’Ba azini aluni dri atripi diza fezu Mungu drini yo, pe lu ani’bo ’dori’i ya?

¹⁹Eri nga ’yo eri tia, Mi enga uru, mi mu mi letia; a’ita mini pa mi ’bo.

²⁰’Ba Farisaini ka eri zi ra kini, Suru Munguniri nga emu a’dungare ya, eri omvi e’yo ’yo yi tia, Suru Munguni emuni eceta ’bani ndrele milesiri be ku;

²¹yi ngani vini ’yo kini, Mi ndre, eri ’doa kani ’Daa! ’dini ku, te mi ndre, suru Munguni eri emi alia.

²²Eri ’yo ’ba erini imbale ’diyi ma tia, O’duni nga eca ra, o’du ’dasi emi nga le o’du Mvi ’banini ’diyi ma azi alu ndre ra, te emi ngani ndre ku.

²³Yi nga ’yo emi tia, Mi ndre, ’daa! Mi ndre, ’doa! Emi ma fu mu yi vuti bizu ku.

²⁴Te ekile ovini galerile, ka ga ’bu ma kala aluria eri nga di kpere ’bu ma kala aziniria indi, Mvi ’banini nga ovu ’dinile o’du erinisi.

²⁵Te okorisi eri ma nya candi inzata kakausi, azini a’bianzi ewu ’dosi ’diyi ma ga eri si.

²⁶E’yoni i ’yele ewu Noanisirile, eri nga i ’ye trotro o’du Mvi ’bani vileria.

²⁷Yi adri ndra nya, yi mvu, yi oku la, yi oku fe agupia ’dani, ecazu kpere o’du Noani fizu maburua, yi tiza amboruni emuzu yi dri jazu driaria.

²⁸’Ye i vini ’dinile ewu Lotinisi-yi adri ndra nya, yi mvu, yi adri ndra afa je, yi afa ozi, yi afa sa, yi jo si indi,

²⁹te o’du Lotini efuzu Sodomuarisi, aci pi ’di yi dria ozoole baruti be ’bua, ja yi dri dria ra-

³⁰ekile ’dinile, e’yoni nga i ’ye trotro o’du Mvi ’banini i ecezurisi.

³¹O’du ’darisi ’ba ovupi jo karina dria, eri ma afani ovuzu joari, ma si va yi o’duzu ku; ’dinile indi ’ba ovupi ngaari ma da dri vile ku.

³²Emi ma ega oku Lotini ma e’yo.

³³’Ba lepi idri ini ma ta mbapi i ma ngulupisiri, idri eriniri nga avi eri dri ra, te ’ba idri ini avipi rari nga idri ini ma ta mbani.

³⁴Ma ’yo emi tia, ini ’dasi agupi iri yi nga la gbolo alu ma dria; aluri nga ovu ’duzaru, te aziniri nga ace ’de.

³⁵Oku iri nga ovu anya ’iria tualu; aluri nga ovu ’duzaru, te aziniri nga ace ’de.

³⁶Agupi iri yi nga ovu ngaa; aluri nga ovu ’duzaru, te aziniri nga ace ’de.

³⁷Yi nga e’yo omvi ’yo eri tia, Ngoa ya, Opi? Eri ’yo yi tia, Roko yi nga yi oku tualu pari afa avuni ovuzuria.