Read lugbara Luka 18 Bible Online

Luka 18 - lugbara bible

Luka 18

¹Eri ’yo e’yo o’beza yi tia, yi imbazu yi ma zi Mungu ’dani ’dani, ma ande ku;

²kini, ’Ba e’yo lipiri indi aku azinia, eri runi Mungu ku, erini vini ’ba ma e’yo ku indi;

³awuziou alu aku nde ’daria indi, eri adri emu eri vu ’yozu, Mi li e’yo mani ari’bo mani beri onyiru fo!

⁴O’du kakau eri ga si; te vilerisi eri ’yo i asia, Ma ka tro Mungu ru ku,; azini e’yo ’bani eri ku ti,

⁵te oku ’dirini ma ecandilerisi, ma nga di e’yo erini li onyiru ra, eri kazu fezu ma andezu kai erini emule dika dikarisi ku.

⁶Opi nga ’yo ra, Emi eri e’yo ’ba e’yo lipi kililiru ku ’dirini ’yoleri.

⁷Mungu ngani e’yo li ’yeke ’ba erini opele owupi etusi inisi i vu ’diyi dri ku ya? Eri ngani yi eri asi e’yeresi ku ya?

⁸Ma ’yo emi tia, eri nga e’yo yini li onyiru mbele mbele. Ka’dini ti, Mvi ’bani ka emu ra, eri nga a’ita isu nyakua ra ya?

⁹Eri nga vini e’yo o’beza ’diri olu ’ba azini yi ma ngulupi ma e’yo a’ipi kini yi ovu ’ba kililiruni, te ’ba azini ndrepi dria ’ba tokole ’diyi ma tia:

¹⁰Agupi iri tu hekalua Mungu zizu, aluri ’ba Farisaini, aziniri ’ba musoro okupiri.

¹¹’Ba Farisaini nga pa so zizu i ma ngulupisi kini, Mungu, ma ’yo awa’difo mi tia mani ovule ’ba azi ’diyile kurisi, ’ba afa opapi ’diyile, ’ba kililiru ku ’diyile, ’ba ali o’bapi ’diyile, kani ’ba musoro okupi va ’dirile kurisi.

¹²Ma adri nyaka ’da sabato alu ma alia pale iri; ma adri afa dria mani isule mudri ’diyi ma esele aluri fe ra.

¹³Te ’ba musoro okupiri so pa re ’dani, eri ga mile engako ’bua si, te eri nga i agati di, kini, Mungu, mi ovu yikisi ma vu, ma’i ma ’ba azi onzi ’yepiri!

¹⁴Ma ’yo emi tia, ’ba ’diri si mvi jo inia erini ovuria kililiru Mungu ma milia agu nde ’dari agazu; te ’ba dria alu alu i ma ngulupi ’bapi uru ceniri, yi nga eri omvi ele; te yi nga ’ba i ma ngulupi omvipi ele ceniri ’du ’ba uru.

¹⁵Yi eji vini anzi odekuaru yini eri vu, eri ma elo yi rua ani; te ’ba erini imbale ’diyi ka ndre ra, yi nga ega yi dria.

¹⁶Te Yesu nga yi omve i vu, kini, Emi ku anzi nyiri nyiri ma emu ma vu, emi ma oga yi ku; te suru Munguni ovu ’ba ’dinile ’diyini.

¹⁷Ma ’yo emi tia ndi ndi, ’ba azini ka ngoni ti, ka suru Munguni a’i mva gakandiarule ku, eri ngani fi alenia aluni ku.

¹⁸’Ba ambo alu zi eri tia ’dini kini, ’Ba ’ba Imbapi bari, ma nga ’ye ngoni mani idri ’dani ’dani isuzu ya?

¹⁹Yesu nga ’yo eri tia, Mi omve ma ’ba baru a’disi ya? ’Ba baruni yo, kiri alu Mungu’i.

²⁰Mi ni azita ra: Mi ’ba ali ku, Mi ’di ’ba ku, Mi ogu ku, Mi nze e’yo eti inzoru ku, Mi inzi mi ati pi mi andri be.

²¹Eri ’yo ra, Ma mba e’yo ’diyi ma ta dria gbu mvaasi.

²²Yesu ka eri ra, eri ’yo eri tia, Afa azini alu ece nga mi dri ’yekokoru. Mi fe afa dria mini ovuzu yi be ’diyi ozi ra, mi awa ’ba alioru ’diyi dri, mi nga ani lonyi isu ’bua; mi emu di ma vuti bi ndo.

²³Te eri ka e’yo ’diri eri ra, eri ’ba ovu candisi tu, erini ovule ’ba afa e’iru turisi,

²⁴Yesuni eri ndreria ’yo ra, ’Ba afa e’iru ’diyini fizu suru Munguniria ewani ’doni!

²⁵Ngamiani fizu sindani ma talaasiri bani ewa kokoruni aga ’ba afa e’iruni fizu suru Munguniari ra.

²⁶’Ba eripi ’diyi ’yo ra, Ka’dini a’di eco i pazaruni ya?

²⁷Te eri ’yo, E’yo ecopi ’basi ku ’diyi eco Mungusi ra.

²⁸Petero ’yo ra, Mi lu, ama ku afa ama vile ’diyi ra, mi vuti bizu.

²⁹Eri ’yo yi tia, Ma ’yo emi tia ndi ndi, ’ba jo pi kupi suru Munguniri ma e’yosi, oku pie, adripi pie, ’ba yi tipi ’diyi pie, anzi pie dria ’diyi ma aluni

³⁰ngani ece afa isuzu parinia pale karakarau ewu ’dorisi ku, eri nga vini ovu idri ’dani ’daniri be ewu ngapi emupirisi indi.

³¹ Eri oku ’ba mudri drini iri ’diyi i vu, nga ’yo yi tia, Mi ndre, ama tu uru Yerusalemua, azini e’yo dria nabini sile Mvi ’bani ma e’yosi ’diyi nga yi ’ye ra.

³²Te eri nga ovu fezaru ’ba jururu dri, yi nga eri ede ogutasi, yi nga drinza fe eri dri, yi nga cucu wu eri ruaa;

³³yi nga eri co ninisi, yi nga eri fu kai ra, te o’du nasi eri nga enga dika.

³⁴Te yi vani e’yo ’diyi ma azi aluni ku; e’yo ’yoza ’diri ovu zizaru yi dri, yi nini e’yo erini ’yole ’diyi ku.

³⁵Eri nga eca ’dini, erini ecaria Yerikoa ogogo, ’ba alu mileefi odraza beri de ri geri tia afa a’izu,

³⁶eri ka ’ba ongulumuru eri yini agaria, eri zi e’yo ’diri a’di e’yoni ya.

³⁷Yi nga olu eri tia, kini, Yesu ’ba Nazaretiari agani.

³⁸Eri oyu o’duko urusi kini, Yesu, Daudi mvi la, mi ’ba yiki ma vu fo!

³⁹’Ba mupi drilenia ’diyi ega eri dria kini ma adri ciri; te eri tre o’duko urusi aga ra, Daudi mvi la, mi ’ba yiki ma vu fo!

⁴⁰Yesu so pa ci, nga ’yo kini ma eji eri i vu; eri ka eca ogogo, eri zi tinia ’dini,

⁴¹Mi le ma ma ’ye mi vu a’dini ya? Eri nga ’yo ra, Opi, ma le te angu ndre fo!

⁴²Yesu ’yo eri tia, Mi ndre angu ki! A’i,a mini pa mi ’bo.

⁴³Perepere eri ’ba angu ndre, nga eri vuti bi, diza fezu Mungu dri; ’ba ongulumuru ka ndre ra, yi nga inzita fe Mungu dri indi.