Read lugbara Luka 2 Bible Online

Luka 2 - lugbara bible

Luka 2

¹Eri nga eca ’dini o’du ’dayisi, Kaisari Augusito azi azita kini ’ba wudrikuru dria ’diyi ma ru ma ovu sizaru,

²Ru siza ’diri eri sile oko Kurinioni opi nyazu gavenaru Suria ma driliarisiri’i.

³’Ba dria mu ndra yi ru osizu, ’ba kinakina muzu aku yi vileria.

⁴Yusufu indi efu Galilia engazu aku Nazaretiasi, nga etu angu Yudiaa fizu aku Daudini omvele Betelehemu’iria, eri ma suruni engale Daudi ma ori ma aliarisi,

⁵ru yini osizu Mariamu aliria erini be, de eri ovu okporovuru.

⁶Eri riga di eca ’dini, de yini ovuria ’dale o’du erini mva osizuri eca ra.

⁷Eri nga aliriamva erini osi agimvaru, eri nga eri ombe bongo mva ombezurisi, eri nga eri la oguru tini afa nyazuri ma alia, a’disiku pari yini omujoarini ovule yorisi,

⁸’Ba kabilo ocepi ’diyi ovu angu ndea lazu nyamukoa, kabilo yini o’biru ’diyi agei teria ini be rra.

⁹Malaika Opini nga pa so yi vu, diza Opini nga di yi ma ageia, yi nga ru ani tu.

¹⁰Te malaika ’yo yi tia, Emi ru ku; mi ndre, ma olu emi tia e’yo baru ayikoru tu ovupi ’ba dria driri,

¹¹kini, andru osi emi dri aku Daudinia ’Ba ’ba Papiri, eri Kristo Opi’i.

¹²E’yo ’diri nga ovu emi dri ecetaniriru: emi nga odekua isu ombezaru bongo mva ombezurisi erini laria oguru tini afa nyazuri ma alia.

¹³Coti malaika ongulumuru engapi ’bua ’diyi ovu malaika ’diri be, yi ru Munguni inzu ambo, kini,

¹⁴Diza ma ovu Mungu vu uru ’bua, azini nyakua asi anzuru ma ovu ’ba Munguni ovuzu yi vu ayikosi ’diyi vu.

¹⁵Eri nga eca ’dini, malaika ka yi ku mvizu ’bua ’bo, ’ba kabilo ocepi ’diyi nga e’yo ’yo yi eselia ’dini kini, Ama mu di curu’do Betelehemua, e’yo i ’yepi te Opini ecele ama dri ’dori ndrezu.

¹⁶Yi nga mu mbele mbele, nga Mariamu pi isu Yusufu pie, odekua lapi oguru tini afa nyazuriari be.

¹⁷Yi ka eri ndre ’bo, yi ece e’yo ovupi ’yozaru yi tia mva ’diri ma e’yosiri;

¹⁸’ba dria e’yo ’di eripi ’diyi osu tu e’yo ’ba kabilo ocepi ’diyini ’yole yi tiarisi.

¹⁹Te Mariamu mba e’yo ’diyi ma ta dria i asia, asisile drozu drinia.

²⁰’Ba kabilo ocepi ’diyi mvi, ru Munguni inzizu diza fezu eri dri indi, e’yo dria yini erile azini ndrele, ekile erini ovule oluzaru yi ma tiarilerisi.

²¹O’du aro ka yi de ’bo eri agele lizu, yi ’da ru erini Yesu’i, ’di ru malaikani ’dale de nga eri ovuni andri ma alia kuri’i.

²²O’du yini yi rua ’bazu alaru ’diyi ka yi de ra azita Musanini ’yolerile, yi eji eri uru Yerusalemua, fezu Opi dri

²³(yini sile azita Opini ma aliarile ’dini, ’Ba nga aliriaanzi agupianziru opojo ma tile zipi oko ’diyi dria alu alu omve alatararu Opi dri)

²⁴edeta fezu indi, yini sile azita Opini ma aliarile, angaraka iri kani a’balau o’buru ma anzi iri.

²⁵Isu ’ba alu indi Yerusalemua runi Simeoni’i, agupi ’diri eri ’ba kililini, Mungu ma e’yo va eri tu, eri asi omiza Israelini te; Orindi ’Alatararu ovu eri ma dria.

²⁶Te orindi Alatararu ece eri dri ’dini, kini eri ngani dra ndre ku de nga eri ndreni Kristo Opini ku.

²⁷Eri fi Orindisi hekalua; te ’ba eri tipi ’diyi ka odekua Yesuni ofi hekalua, yini ’yezu ani eri vu azitani ’yolerile,

²⁸eri nga mva amvu i ma rua, riga Mungu ma ru inzi kini,

²⁹Opi, curu’do mi fe ati’bo mini ma mvi asi anzuru be, mini ’yolerile;

³⁰a’disiku mile mani ndre para mini

³¹mini edele ’ba dria ma miliari ’bo;

³²angu ’izu ’ba jururu ’diyi vu, azini diza ’ba mini Israelini diyini ecezu.

³³Ati pi andri be osu osu e’yo ’yole eri ma e’yosirisi;

³⁴Simeoni nga asi ndriza fe yi dri, nga ’yo andri Mariamu ma tia, Mi ndre, mva ’diri yi ’ba eri ’dini ’ba Israelini kakau yini yi ecozu va, azini yini engazu uru, azini eceta ’bani ngale 0’daleriru;

³⁵te seini nga mi ngulupi ma orindi so indi; asisile ’ba kakau ma asia ’diyi ma ovu ecezaru ani beni.

³⁶Nabi okuru runi Ana, Fanueli zi’i, eri ndra indi (eri ovu eli be kakau, ka zi ’bo eri adri ndra agupi erini be eli aziri,

³⁷erini ovuria awuziru eli o’de eri dria kali aro drini su ’bo), Ana nde kuni hekalu ku Mungu inzizu nyaka ’dazasi, zita zizu etu be ini be dria.

³⁸Erini ecaria etu ’dasi eri fe lawa’difo Mungu dri, nga vini e’yo erini ’yo ’ba onzeta Yerusalemuni tepi ’diyi ma tia dria.

³⁹Te yi ka e’yo dria azita Opinini ’yolerile ’diyi ede ’bo,yi mvi Galilia aku yi ma ngulupi Nazaretiaria.

⁴⁰Mva zo ra, rua erini eca okpo be, ondua ga asinia tre; ’yeta anzutiri Munguni ovu eri ma dria.

⁴¹’Ba eri tipi ’diyi adri mu eli vusi eli vusi Yerusalemua omu agaza ’ba drilesiri nyazu.

⁴²Eli erini ka ca mudri drini iri, yi mu uru yini adrile mule omu nyazurile;

⁴³yi ka o’du omuni ’diyi de ’bo, ’yini mviria, agimva Yesu nga awi vile Yerusalemua. Te ’ba eri tipi ’diyi nini ku;

⁴⁴yini egaria kini eri ovu ’ba acipi tualu geria ’diyi ma eselia, yi mu geria o’du alu pi, yi nga eri nda ori’ba yini ma eselia azini ’ba yini nile ’diyi ma eselia indi;

⁴⁵yi ka eri isu ku, yi nga mvi Yerusalemua eri ndruzu.

⁴⁶Eri nga eca ’dini, o’du na ka yi de ra yi isu eri hekalu ma alia, erini riria ’ba e’yo imbapi ’diyi ma eselia, e’yo yini eriria, e’yo ziria yi tia indi;

⁴⁷’ba dria eri eripi ’diyi osu tu e’yo vaza erini pisi e’yo omviza erini be.

⁴⁸Yi ka eri ndre ’bo, yi nga osu tu; andrini nga ’yo eri tia, Mva, mi ’ye ama be ’dini a’disi ya? Mi ndre, ama nda mi mi ati be candisi.

⁴⁹Eri ’yo yi tia kini, Emi nda ma a’disi ya? Emi i nini ku kini ma ma ovu ma Ata ma e’yo ma alia ku ya?

⁵⁰Te yi vani e’yo erini ’yole yi tiari ku.

⁵¹Eri si yi be, nga ca Nazaretia, nga e’yo yini inzi ra; te andri erini mba e’yo ’diyi ma ta dria i asia ci.

⁵²Yesuni zoria eri zo ondua be azini rua be,’yeta anzuturi be dria Mungu vu azini’ba vu ndi.