Read lugbara Luka 21 Bible Online

Luka 21 - lugbara bible

Luka 21

¹Eri enga i mile uru, nga ’ba afa e’ipi ’diyi ndre yini afa feza yini o’beria sanduku silingi ta mbazuria;

²eri ndre vini awuziou alioru erini sente iri ’be ria ’daa indi.

³Eri ’yo ra, Ma ’yo emi tia adaru awuzi alioru ’diri ’be afa alenia aga yi dria ra;

⁴te ’ba ’diyi dria o’be afa feza yini engazu afa yini kakau ma eselia, te eri’i eri ’be alenia afa i erini adrizu ani idriruri dria engazu alio eriniri ma alia.

⁵’Ba azini yini e’yo hekaluni ’yoria, kini yi ede eri ndrizaru oni i ndrizaru ’diyi pisi afa feza be, eri ’yo ra,

⁶Afa emini ndrele ’diyi ma e’yo ’dini, o’duni nga emu ra, o’du ndesi yi ngani oni alu ku adrozaru agyi dria asukokoru va ku.

⁷Yi zi eri tia kini, ’Ba ’ba Imbapiri, e’yo ’diyi nga yi ’ye a’dungare ya? E’yo, ’diyi ka ’ba yi ’ye ra, ecetani nga ovu ngoni ya?

⁸Eri ’yo ra, Emi ovu mile be, ’ba ma ici emi ku; te ’ba kakau nga emu ma rusi ’yozu kini, Ma eri’i! azini, Ewu eca ogogo ’bo! Emi mu yi vutia ku.

⁹Emi ka e’yo a’di ’diza pini eri omba ’baza be, uri ma bi emi ani ku; te di e’yo ’diyi ma ’ye yi oko raka, te ewu asizaniri ngani nga i ’ye mbele ku.

¹⁰Eri nga di ’yo yi tia, Suruni, nga enga suru azini be, opi nyazani nga enga opi nyaza azini be, dria ombaru;

¹¹oyakia amboru yi nga ovu indi, liki pi dra muaruri be nga ovu anguasi ndu ndu, afa uriuriru ’diyi pi nga ovu indi eceta amboru, engapi ’bua ’diyi be.

¹²Te de ngai e’yo ’diyi dria ’yeni yi ku, yi nga emi obi yi drisi, yi nga emi inza, yini emi jiria pari ’bani yi okuzu ’diyi pi ma, alia, arujo pie, yini emi jiria opi pi ma milia gavena be ma rusi.

¹³Eri nga i oja emi dri e’yo eti nzezuriru.

¹⁴E’yo ’disi emi ede e’yo emi asia kini emi ma ega e’yo emini ngale omvileri oko ku;

¹⁵a’disiku ma nga emi dri ti ’yoza pi fe ondua be, ’dini e’yo nde ’diyisi ari’ba emini dria ngani eco emi dri aruzaru, kani agata gazu emi be ku.

¹⁶Te ’ba emi tipi ’divi, emi adrini pie ori’ba pie, agyi pie, nga emi fe ’ba dri, yi nga ’ba azini emi eselia ’diyi ofe dra drini;

¹⁷’ba dria yi nga emi ngu onzi ma rusi.

¹⁸Te dribiefi emi dria ’diyi ma aluni ngani dri ja ku.

¹⁹Te asi teza eminiri nga fe idri emini pani.

²⁰Te emi ka asikari ongulumuru ’ndre yini Yerusalemuni aceria, emi ma ni ani kini dri jaza erini eca ogogo.

²¹Etu ’dasi ’ba dria ovupi Yudiaa ’diyi ma apa oni ambo ambo ’diyia, azini ’ba ovupi eri ma alia ’diyi ma fu asea amve, ’ba ovupi asea ’diyi ma fi alenia ku.

²²Te ewu ’diri eri ewu e’yo lizaniri, ’dini e’yo dria ovupi sizaru ’diyini yi ’yezu yi pariari’i.

²³Candi oku okporovuru ’diyi dri, oku odekua endrupi ’o’du ’dayisi ’diyi be! A’disiku candi amboruni nga ovu angua, adrani nga ovu suru ’diri ma dria;

²⁴yi nga odra seisi, yi nga yi obi ati’baru suru dria ma alia; ’ba Jururu ’diyi nga Yerusalemuni otu yi pasi va, de nga ewu ’ba ururu ’diyiniri deni i ku.

²⁵ Eceta yi nga ovu indi etu pi ma ruaa, mba pie, ’bi’bio pie; asi otiza nga ovu nyakua indi suru ma eselia, yi nga aba mirini wulerisi adilerisi indi;

²⁶’ba yi nga eca ’ba avule urisi, azini yini e’yo ngapi ecapi angu wudrikuru ma dria ’diyi telerisi; te okpo ’bua ’diyi nga yi oya oya.

²⁷Etu ’dasi yi nga Mvi ’bani ndre erini emuria okpo be dizaru tu iriti ma eselia.

²⁸Te e’yo ’diyini ’baria yi ’yeria, emi edre emi uru, emi enga emi andreti uru indi, onzeza eminirini ecale ogogorisi.

²⁹Eri ’yo yi tia e’yo o’bezani ’dini: Emi ndre elio pati pi pati azini be dria;

³⁰yi ka-’ba bi ru ’bo, emi ka ndre ra, emi ngulupi ni indi kini ewu nyakani kazuri ecea di ogogo ’bo.

³¹Ekile ’dinile emi alu indi, emi ka ndre e’yo ’diyini yi ’yeria, emi ma ni suru Munguni eca ogogo.

³²Ma ’yo emi tia ndi ndi, a’bianzi ewu ’dosi ’diyi ngani yi de ku, de nga e’yo ’diyi dria ’yeni yi ku.

³³’Bu pi nyaku be nga yi de ra, te e’yo mani ngani yi de aluani ku.

³⁴Te emi te emi ngulupi ma, agei, emi asi kazu ovuzu nzizaru emini nyaka nyale tu azini ewa mvule turisi ku, kani emini asisile drole idri ’dori ma e’yosirisi ku indi, o’du ’dari kazu ecazu emi dria rugbu ekile gbagbale ku;

³⁵te eri nga eca ’ba ovupi angu wudrikuru drisi dria ’diyi ma dria dria.

³⁶Emi te emi agei mile be ewu dria, Mungu zizu matu be, emi ma isu okpo emini ngazu apazu e’yo dria ngapi yi ’yepi ’diyisi, azini emini ngazu pa sozu Mvi ’bani ma milia ani beni.

³⁷Etu vusi eri adri ’ba imba hekalua; ini vusi ini vusi eri fu amve, la oni yini runi omvele Mizeituniri ma dria.

³⁸’Ba dria yi emu eri vu o’biti kula kula hekalua, eri ma e’yo erizu.