Read lugbara Luka 22 Bible Online

Luka 22 - lugbara bible

Luka 22

¹Omu mikate akufi kokoru nyazuri eca ogogo, omvele Agaza ’ba drilesiri’i.

²’Ba wara kuhaniru ’diyi pi ’ba azita sipi ’diyi be yi nda geri eri fuzuri; te yi ru ’bani.

³Satani nga fi Yudasi omvele Isikarioti’iri ma alia, eri’i ’ba mudri drini iri ’diyi ma eseliari,

⁴Eri nga mu e’yo ’yozu ’ba wara kuhaniru ’diyi pi be, opi asikari ma drilia ’diyi pie, geri ndazu eri fezu yi dri.

⁵Yi ovu ayikosi, yi azi silingi fezu eri dri.

⁶Eri a’i ra, nga geri nda eri fezu yi dri de ’ba ongulumuru yi yo.

⁷ O’du mikate akufi kokoruni eca ra, o’du ndesi yi adri kabilo agaza ’ba drilesiriniri li.

⁸Eri pe Petero pi ma ti Yohana be, ’yozu kini, Emi mu agaza ’ba drilesiri edezu ama dri, ama ma nya.

⁹Yi ’yo eri tia, Mi le ama ma ede ngoa ya?

¹⁰Eri ’yo yi tia, Mi ndre, emini firia aku amboria, emi nga dri fu agupi yilemvu beri be; emi la vutini kpere jo erini fizuria,

¹¹emi ’yo jo e’i ma tia, ’Ba ’ba Imbapiri ’yo mi tia, omuni, pari mani ngazu agaza ’ba drilesiri nyazu alenia ’ba mani imbale ’diyi beri ngoa ya?

¹²Agu nderi nga emi dri jo aliza amboru uruleruri ece edezaru afa dria be; emi ’ba afa ngonde ’daa.

¹³Yi mu ra, yi isu ekile erini ’yole yi tiarile; yi nga di agaza ’ba ’drilesiri ede ani.

¹⁴Etu ka eca ra, eri ri va ’ba erini ti opele ’diyi be.

¹⁵Eri ’yo yi tia indi, Ma le omu agaza ’ba drilesi ’diri nyazu emi be avasi tu, de nga yi ecandini ma ku;

¹⁶te ma ’yo emi tia, ma ngani eri nya dika ku, de nga eri ’yeni i i paria suru Munguniria ku.

¹⁷Eri nga okele ’du, ka awa’difo fe ’bo, eri ’yo, Emi ’du ’diri, awa emi eselia;

¹⁸te ma ’yo emi tia, engazu curu’do ma ngani efi zabibuni ’yaleri ma su mvu dika ku, de nga suru Munguni ecani ku.

¹⁹Eri ’du mikate ra, eri ka awa’difo fe ’bo, eri anyo aleni, awa fe yi dri, kini, ’Di rua mani, fele emisiri. Emi ’ye ’dri ma egazu.

²⁰Nyaka ma vutia eri nga okele ’du ’dinile indi, kini, Okele ’diri eri e’yo aziza o’diru ari mani rapi emisiri ma aliari.

²¹Te mi ndre, ’ba ma o’di nyapiri ma dri ovu maniri be mesa dria.

²²Te adaru Mvi ’bani mu di geri edele eri dri driori ma alia ra; te candi agu eri ma o’di nyapi ’dari dri!

²³Yi ’ba e’yo ozi yi eselia, kini yi eselia a’dini ’ye e’yo ’diri ’yeni ya.

²⁴Yi’ba agata ga yi eselia, kini ’ba yi eselia egale amboru tori eri a’di’i ya.

²⁵Eri ’yo yi tia, Opi ’ba jururu ’diyini adri yi drilia opiru okposi; azini omve ’ba yi drilia azita fepi okposi ’diyi ma ru, ’Ba azi ’yepi onyiru ’diyi.

²⁶Te emi ma ovu ’dinile ku; te ’ba amboru agapi ra emi eseliari ma ovu ekile osipi vilerile, azini ’ba ’ba dri cepiri ma ovu ekile ’ba ’ba aza kopi azisirile.

²⁷Te ngori aga ra, kani ’ba ripi mesa tiari’i, kani ’ba ’ba aza kopi azisiri’i ya? Eri ’ba ripi mesa tiari’i ku ya? Te ma ovu emi eselia ekile ’ba ’ba aza kopi azisirile.

²⁸Te emi ovu ’ba adripi tepi ma be tualu obeta mani ma alia ’diyi;

²⁹ekile ma Atini suru nyaza azile ma dririle,

³⁰’dinile ma azi emi dri emi ma nya, emi ma mvu, mesa mani ma tia suru nyaza mani ma alia, emi ma ri vini oguna ma dria suru Israelini mudri drini iri ’diyi ma e’yo lizu.

³¹ Simoni la, Simoni la, mi ndre, Satani a’i emi o’bizu, emi ndrizu ko’bisi anyale.

³²te ma’i, ma zi i Mungu matusi misi ’bo, ’dini a’ita mini ma de i ku beni; te mi’i, mi ka mi oja dika ’bo, mi ’ba di mi adripi ma asi okporu.

³³Eri ’yo eri tia, Opi, ma ovu ngonde muzu mi be arujoa, kpere dra vu indi.

³⁴Eri ’yo ra, Petero, ma ’yo mi tia, de nga a’nata ’beni cere andru ku, mi nga ma ga si pale na, kini mi nini ma ku.

³⁵Eri ’yo yi tia, Ma ka ndra emi ti pe ovuzu okporo kokoru, jurua kokoru, enyiriko paari kokoru, afa azini ma alio nde ndra emi ra ya? Yi kini, Yo.

³⁶Te eri ’yo yi tia, Te curu’do okporo e’i ma ’du di iniri, jurua e’i ma ’ye ’dinile indi. ’Ba sei kokoruri ma ozi bongo ’beza erini, ma je sei ani.

³⁷Te ma ’yo emi tia kini e’yo yini sile ’diri ma ’ye i ma ruaa, ’yozu kini, La eri ’ba ezapi ’diyi ma aziru; te e’yo sile masiri ovu ’yeza ini i pariari be.

³⁸Yi ’yo ra, Opi, mi ndre, sei iri yi ’doa. Eri ’yo yi tia, Fu dri ra.

³⁹ Eri efu amve, mu oni Mizeituniri ma dria erini adrile ’yelerile; ’ba erini imbale ’diyi nga eri vuti bi indi.

⁴⁰Eri ka eca pari nderia eri ’yo yi tia, Emi zi Mungu emi kazu fizu obeta ma alia ku.

⁴¹Eri nze i esele yi be were, ekile ’bani ecole oni ’bezu rarile, eri nga kumuti osi va Mungu zizu,

⁴²kini, Ata, mi ka le ra, mi ’du okele ’diri ma vurisi ra; te e’yo mani leleri’i ku, te e’yo mini leleri ma ’ye’ini.

⁴³Malaika engapi ’buari e’da i eri vu, okpo fezu eri dri,

⁴⁴Erini ovuria candisi amboru, eri zi asi driasi aga okori ra; ondi erini oja i ekile ari i olipi otipi va nyakuarile.

⁴⁵Eri ka enga erini Mungu zizu ’boria, eri emu ’ba erini imbale ’diyi vu, nga yi isu o’du koria candisi;

⁴⁶eri ’yo yi tia, Emi o’du ko a’disi ya? Emi enga uru; emi zi Mungu, emi kazu fizu obeta ma alia ku.

⁴⁷Erini nga e’yo ’yoria, mi mire, ’ba ongulumuru eca, de agu ’bani omvele Yudasi’i, ’ba mudri drini iri ’diyi ma azi aluri, ce yi ma drini. Eri, esi Yesu vu inyia, o’boloni ndruzu;

⁴⁸te Yesu ’yo eri tia, Yudasi, mi Mvi ’bani fe ari’ba dri o’bolo ndruzasi ya?

⁴⁹’Ba eri ma ageia ’diyi ka e’yo ngapi i ’yepiri ndre, yi ’yo ra, Opi, ama ma oga yi seisi ya?

⁵⁰’Ba alu yi eseliari ga ati’bo ’ba kuhani agapirini, li bini dri ndiari va.

⁵¹Te Yesu nga e’yo omvi ’yo ra, Mi ku nga ’dipi! Eri nga bini elo, nga eri ati ra.

⁵²Yesu nga ’yo ’ba ’wara kuhaniru ’diyi pi ma tia, ambo asikari ma drilia hekalua ’diyi pie, ’ba ’wara be, emupi eri vu ombasi ’diyi, kini, Emi efu sei pi emi dria abeleku pie, ekile oguou bizurile ya?

⁵³Mani ovuria emi be hekalua etuzu, emi ejuni dri ma bizu ku. Te ’diri eri etu emini, azini okpo ininiri indi.

⁵⁴Yi bi eri ra, ji eri ofizu kuhani agapiri vile joa. Te Petero nga eri vuti bi re.

⁵⁵Yi ka ad edu aku ma eselia agadua, yi ka ri va tualu, Petero ri yi eselia indi.

⁵⁶Zana alu ndre erini riria aci diza ma tia, nga eri ni ’dani, eri ’yo ra, ’Ba ’diri ovu eri be indi.

⁵⁷Te eri ga si, kini, Oku, ma nini eri ku.

⁵⁸Vutinia were ’ba azini ndre eri ra, nga ’yo ra, Mi indi, mi ’ba yini. Te Petero nga ’yo, Agu la, ma ’ba yini yo.

⁵⁹Ekile sawa alu ma vutia, ’ba azini ’yo ti mbazasi kini, Adada, ’ba ’diri indi ovu te eri be; erini ovule ’ba Galilianirisi.

⁶⁰Te Petero nga ’yo, Agu la, ma nini e’yo mini ’yoleri ku. Perepere erini nga e’yo ’yoria, a’nata nga cere o’be.

⁶¹Opi oja i, nga Peteroni lu. Petero ega e’yo Opini ’yole i tia kini, De nga a’nata ’beni cere andru ku, mi nga ma ga si pale na-ri ra.

⁶²Eri fu amve, eri wu candisi, mindre be tu.

⁶³’Ba Yesuni bipi ’diyi onzi eri, nga eri co indi;

⁶⁴yi anzu eri mile bongosi, yi zi eri kini, Mi ondri e’yo ’diri nabile! A’di gba mini ya?

⁶⁵Yi o’yo e’yo azini karakarau eri ruaa eri o’dazu.

⁶⁶Angu ka ati ra, ’ba ’wara ’ba drilia ’diyi pi nga yi oku tualu ’ba wara kuhaniru ’diyi pie, ’ba azita sipi ’diyi pie dria, nga eri ji ’ba yini e’yo amapi ’diyi vu, kini,

⁶⁷Mi ka ovu Kristo’i, mi olu amani, Te eri ’yo yi tia, Ma ka olu emini ti, emi ngani ma a’i aluni ku;

⁶⁸ma ka emi zi ra ti, emi ngani e’yo omvi ku.

⁶⁹Te engazu ewu ’dirisi Mvi ’bani nga ri okpo Munguni ma dri ndiria.

⁷⁰Yi dria ’yo ra, Ka’dini mi di Mungu Mvi’i ya? Eri ’yo yi ria, Emi ’yo ’bo; ma eri’i.

⁷¹Yi ’yo ra indi, Ama di kiri ’ba e’yo eti nzepi ’diyi le ’dani a’disi ya? Te ama ngulupi eri e’yo efupi eri tiliari ’bo.