Read lugbara Luka 23 Bible Online

Luka 23 - lugbara bible

Luka 23

¹ ’Ba ongulumuru yi okupi’diyi dria nga enga uru, nga eri ji Pilato vu.

²Yi ’ba asu su eri ruaa kini, Ama isu agu ’dirini suru amani ojaria onzi, azini eri oga ’bani musoro feko Kaisari dri si, azini kini i ngulupiri Kristo opi’i.

³Pilato zi eri kini, Mi Opi ’ba Yahudini ya? Eri omvi e’yo eri tia, ’yo ra kini, Mi ’yo ’di.

⁴Pilato ’yo ’ba ’wara kuhaniru ’diyi pi ma tia ’ba ongulumuru be, kini, Ma isuni ezata agu ’diri ndepiri ku.

⁵Te yi ’ba e’yo ’yo drinia okposi aga ra, kini, Eri osa ’ba ale ’ba imbazu angu Yudiaari ma alia dria, engazu Galilia ecazu kpere angu ’doria.

⁶Te Pilato ka eri ’dini, eri zi agu ’diri ’ba Galilini ya.

⁷Eri ka ni ra eri ’ba Herodeni nyaleniri, eri pe tini Herode vu; isu o’du nde ’dasi Herode ma ngulupi Yerusalemua indi.

⁸Herode ka Yesuni ndre ra, eri ovu ayikosi tu, a’disiku o’du kakau eri le eri ndre, erini e’yo erini erilerisi; eri ega i asia i nga tali erini ’yeleri ndre.

⁹Eri ozi eri e’yo kakausi; te Yesu omvini e’yo eri tia ku.

¹⁰’Ba ’wara kuhaniru ’diyi pi ’ba azita sipi ’diyi be oso pa, asu suzu ruania okposi.

¹¹Herode pi asikari erini ’diyi be inza eri dri, yi onzi eri indi; yi su mania bongo dipi ndrindriri, nga di eri ti pe mvizu Pilato vu ndo.

¹²O’du nderisi Herode pi Pilato be eci yi agyiru, te ndra okorisi yi ngu yi onzi onzi.

¹³Pilato nga ’ba ’wara kuhaniru ’diyi pi omve tualu, ’ba ’ba dri cepi ’diyi pie, ’ba be dria,

¹⁴nga ’yo yi tia, Emi eji agu ’diri ma vu kile ’ba ’ba asi ojapi onzirile; te mi ndre, mani eri ma e’yo liria emi drilia, ma isu e’yo emini asu suzu ruania ’diyi ma azi aluni eri ndepini yo;

¹⁵Herode isuni vini ku indi, a’disiku epe tini ama vu vile. Te mi ndre, eri ’yeni e’yo onzi dri fupi erini drazu ani rari ku.

¹⁶Ka’dini ma eri co imbataru raka, ma nga eri tru ndo.

¹⁷Te omu ma alia eri ma tru ’ba aruru alu yi dri.

¹⁸Te yi otre o’duko urusi dria tualu, ’yozu kini, Mi ji agu ’diri ’dale, mi tru ama dri Barabani’i!

¹⁹’Ba ndra Baraba nderi aruru erini omba ’bale aku nde ma aliarisi, azini erini ’ba fulerisi.

²⁰Pilato nga ’yo yi be dika, erini lezu Yesuni truzu;

²¹te yi nga otre uru okposi kini, Mi di eri pati ruaa! Mi di eri pati ruaa!

²²Eri ’yo yi tia pale nansi, A’disi? E’yo onzi erini ’yeleri a’di e’yoni ya? Ma isuni e’yo eri ma alia dri fupi erini drazu ani rari ku; e’yo ’disi ma nga eri co imbataru raka, ma nga eri tru ndo.

²³Te yi ’ba otre e’yo be drinia wowo o’duko urusi, ’yozu kini ma di eri pati ruaa. Otreza yini nde di eri ra.

²⁴Pilato li e’yo kini ma ’ye i yini zilerile.

²⁵Eri nga agu nde yini ’bale arujoa omba ’bazasi azini ’ba fuzasiri tru ra, ’ba taka yini a’ileri; te eri fe Yesuni, yini ’yezu eri be yi asini lelerile.

²⁶Yini eri jiria, yi nga ’ba azini runi Simoni, ’ba Kureniari, bi erini engaria amvua, yi nga pati alaza ’ba eri ma ombetia, jizu Yesu ma vutisi.

²⁷’Ba ongulumuru kakau ’diyi, oku lulu ogapi awu wupi erisi ’diyi be, nga eri ma vuti bi.

²⁸Te Yesu oja i yi vu, nga ’yo fa, Emi ezoanzi Yerusalemua ’diyi la, emi owu masi ku, te emi owu bani emi ngulupisi emi anzipi be.

²⁹Te mi ndre, o’duni nga eca yini ’yozu kini, ’Ba ondoru ’diyi pi yi drilebaru, opojo anzi tipi ku ’diyi pie, ba odekuani ndrule ku ’diyi pie!

³⁰O’du ndesi yi nga ’ba ’yo oni ambo ’diyi ma tia, Emi o’de ama dria; azini oni were ’diyi ma tia, Emi a’bu ama dri ci.

³¹Te yi ka e’yo ’diyi ’ye pati ibiru ma ruaa ’dini, a’duni nga bani i ’ye pati ’wiza ma ruaani ya?

³²Yi ji ’ba azini iri, e’yo onzi ’yepi ’diyi, dizu eri be.

³³Yi ka eca pari omvele ’Ba Dri Falaniria, yi di eri pati alaza ma ruaa ’daa, ’ba e’yo onzi ’yepi ’diyi be, alu dri ndiria, aziniri dri ejiria.

³⁴Yesu ’yo ra, Ata, mi ku e’yo onzi yini ra; yini e’yo yini ’yeleri nile kurisi. Yi nga odrisi ’be bongo erini nyazu yi eselia.

³⁵’Ba kakau nga pa oso ndrezu; te ’ba ’ba dri cepi ’diyi nga eri ma dri inza kini, Eri opa ndra ’ba azini ’diyi ra; ’ba ’diri ka ovu Kristo Munguni, erini peleri’i, ma pa i ngulupi’i!

³⁶Asikari ede eri ogutasi indi, yini emuria patiefi ma su drazaruri feria eri dri,

³⁷yi ’yo ra, Mi ka ovu Opi ’ba Yahudini, mi pa mi ngulupi!

³⁸E’yo siza eri driliari ovu ’dini, ’BA ’DIRI OPI YAHUDINIRI’I.

³⁹’Ba e’yo onzi ’yepi, dile pati alaza ruaa ’diyi ma azi alu o’da eri kini, Mi Kristo’i yo ya? Mi pa mi ngulupi ama be indi!

⁴⁰Te aziniri nga e’yo omvi, nga ega eri dria, ’yo ra, Mi runi Mungu ku, de mi vini e’yo liza nde ma alia alu indi ya?

⁴¹Te amaruni, yi li e’yo amani, ’yeke; te ama isu panga i sipi azi onzi amani beri’i; te agu ’diri ’yeni e’yo onzi aluni ku.

⁴²Eri ’yo indi, Yesu, mi ega e’yo mani mini firia suru miniria fo!

⁴³Eri ’yo tinia, Ma ’yo mi tia ada, Andru mi nga ovu ma be Paradisia.

⁴⁴Curu’do eri ovu kile etu aziale, angu nga bi inicici oro dri dria kpere etu oromi,

⁴⁵de etu dini ku; bongo hekalu ma ale alizuri nga i ale asi iri.

⁴⁶Yesu oyu o’duko urusi, kini, Ata, ma ku ma orindi tani mbazu mi dria! Ka e’yo ’diri ’yo ’bo, eri ku i avani fuzu ra.

⁴⁷Ambo asikari turu alu ma driliari ka e’yo i ’yepiri ndre ra, eri inzi Mungu, kini, Agu ’diri eri ’ba kililiruni ada!

⁴⁸’Ba ongulumuru dria yi okupi tualu e’yo amboru ’diri ndrezu ’diyi ka e’yo yi ’yepi ’diyi ndre ra, yi ri mvi agati diza be.

⁴⁹Te ’ba dria eri nipi ’diyi oso pare, oku eri vuti bipi engapi Galilia ’diyi be, e’yo ’diyi ndrezu.

⁵⁰Isu agu azini indi, runi Yusufu’i, eri ’ba e’yo amapi ’diyi ma azi, eri ’ba onyiru ’ba kililiruni indi,

⁵¹suni ndra i ti e’yo yini lileri kani e’yo yini ’yeleri ma alia ku, eri enga aku Yahudini Arimatearuria, eri indi suru Munguni ma mile gapiri’i.

⁵²Agu ’diri mu Pilato vu, Yesu ma avu a’izu.

⁵³Eri nga avuni e’du va, nga eri ombe bongo emverusi, ’ba eri gule yini gale oni alia, pari yini ’ba avu sazu alenia nga kuria.

⁵⁴O’du ’diri eri O’du afa Edezuri, o’du sabatoni eri ’ye e’do e’do.

⁵⁵Oku emupi eri be engazu Galilia ’diyi bi vutini, yi ndre gule, azini geri avuni sazuri ra;

⁵⁶yi mvi, nga ajinguru pi ede odu arikariruri be. O’du sabatonisi yi li ande kile azitani ’yolerile.