Read lugbara Luka 24 Bible Online

Luka 24 - lugbara bible

Luka 24

¹O’biti drio drio o’du sabatoni okorisi, yi eca gule tia, ajinguru yini edeleri ejiria.

²Yi isu oni gu i gule tiarisi ra,

³Yi fi ra, te yi isuni Opi Yesu ma avu ku.

⁴Eri nga eca ’dini, yini abaria e’yo ’disi, mi ndre, ’ba iri oso pa yi ageia bongo emve ndrindriru be;

⁵urini yi biria azini yini yi mile suria va, yi ’yo yi tia, Emi ’ba idriruri nda ’ba draza eselia a’disi ya?

⁶Eri ’doa yo, te eri enga ’bo; emi ega e’yo erini ’yole emi tia de eri Galiliari,

⁷kini yi ma fe Mvi ’bani ’ba onzi ’yepi ’diyi ma dria, ma di eri pati alaza ruaa, te o’du nasi eri ma enga dika.

⁸Yi nga di e’yo erini ega ra,

⁹yi emvi gule tiarisi, mu e’yo ’diyi olu dria ’ba mudri drini alu ’diyi ma tia, ’ba azini ’diyi be dria.

¹⁰Oku nde yi Mariamu Magadaleni pi, Yoana pi, Mariamu Yakobo andri pi, oku azini ovupi yi be ’diyi pie dria, yi olu e’yo ’diyi ’ba ti opele ’diyi ma tia;

¹¹te e’yo ’diyi ovu yi ma milia kile e’yo tokole, yi a’ini e’yo yini ku.

¹²Te Petero enga, nzuzu gulea; eri avu va, nga kiri bongo emveru ndre a’dule; eri ko dri mvi aku inia, i asini osuria e’yo ’dirini i ’yelerisi.

¹³Mi mire, o’du nde ’dasi ’ba iri yi ma eselia ’diyi mu aku alu omvele Emau’iria, aku nde pi ma esele Yerusalemu be ekile mailo azirile.

¹⁴Yi ovu de e’yo dria yi ’yepi ’diyi nzeria yi ma eselia.

¹⁵Eri nga eca ’dini, yini e’yo nzeria azini e’yo oziria yi eselia ’dini, Yesu ma ngulupi eca yi vu ogogo, muzu yi be geria.

¹⁶Te yi mile obi yi ci yi kazu eri nizu ku.

¹⁷Eri ’yo yi tia, E’yo emini nzele emi eselia emini aciria ’diniri a’di e’yoni ya? Yi oso pa ciri, mile be candiru.

¹⁸’Ba alu yi eselia, runi Kiliopa’i, nga e’yo omvi ’yo eri tia, ’Ba lapi Yerusalemua omuru e’yo i ’yepi o’du ’diyisiri nipi kuri alu mi’i ya?

¹⁹Eri ’yo yi tia, A’di e’yoni ya? Yi ’yo eri tia, E’yo Yesu Nazaretiarini, eri ’ba nabiru okporo azisi azini e’yo,yozasi Mungu ma milia ’ba dria be,

²⁰te ’ba ’wara kuhaniru ’diyi pi ’ba ama dri cepi ’diyi be, yi fe eri ’ba e’yo lipiri dri dra lizu drinia, yi di eri pati alaza ruaa.

²¹Te ama ’ba ndra ama asi e’yo ’diri ma dria, kini, eri ’ba ngapi Israeli onzepiniri’i. Te e’yo ’diri ma dria dria, andru eri o’du na e’yo ’dirini i ’yezu ’bori ma vutia.

²²Azini vini indi, oku azini ama eselia yi fe ama osu tu, a’disiku yi ka mu gulea angu trasi,

²³ka avuni isu ku, yi emu ’yo kini malaika e’da yi yi ma milia, ’yo kini eri idriru.

²⁴’Ba azini ama eselia fu mu gulea, yi isu e’yo ovu kile oku ndeni olule yi tiarile; te yi ndreni eri ku.

²⁵Eri ’yo yi tia, Emi ’ba ondua kokoru e’yo dria nabini ’yoleri a’ipi emi asia mbele ku ’diyi la!

²⁶Eri onyiruni Kristo ma ecandi i e’yo ’diyisi raka’i eri nga di fi diza ini ma alia ndo ku ya?

²⁷Eri nga di e’do Musasi nabi be dria, nga e’yo sile i ma ngulupi ma e’yosi ’diyi ma efi ece yi dri, e’yo siza dria ma alia.

²⁸Yi ’ba eca aku yini muzuri vu ogogo. Eri e’da ekile eri ’ye aga agale,

²⁹te yi omi eri okporu kini, Mi ovu nga ama be, te ondre eca ogogo, etuni ’ye ’de ’di. Eri fi ovu yi be.

³⁰Eri nga eca ’dini, eri ka ri va yi be nyaka nyazu ’bo, eri ’du mikate, eri fe asi ndriza drinia, eri anyo aleni fezu yi dri.

³¹Yi mile zi yi ra, yi ni eri ra; te eri nga afi yi milia ra.

³²Yi ’yo yi eselia kini, Ama asi veni te ama alia erini e’yo ’yoria ama tia geria, erini e’yo siza ma efi eceria ama dri ku ya?

³³Etu nde ’dasi yi enga ra, mvi Yerusalemua, nga ’ba mudri drini alu ’diyi isu okuzaru tualu, ’ba ovupi yi be ’diyi pie;

³⁴’ba ’dayi kini, Opi enga ndi ndi, eri ece i Simoni ma milia ’bo!

³⁵Yi nga e’yo i ’yepi gerrari olu, e’yo yini eri nizu erini mikate ma ale anyolerisiri be.

³⁶Yini e’yo nderi ’yoria, Yesu ma ngulupi so pa yi eselia, nga ’yo yi tia, Asi anzuru ma ovu emi vu!

³⁷Te yi rua ’ye ciri, yi ’ye erisi urisi, yi osu kini yi orindi ndre.

³⁸Eri ’yo yi tia indi, Emi asini oti a’disi ya? Emi e’yo ega emi asia ’dini a’disi ya?

³⁹Emi ndre ma dri ma pa be, emi ma ni ’do ma’i; emi va ma rua emi drisi, emi ndre indi; te orindi ovuni ’kalanya be, azini fala be, ekile emini ndrele mani ovuzu yi berile ku.

⁴⁰Eri ka e’yo ’diri ’yo ’bo, eri nga i dri ece yi dri i ma pa be.

⁴¹Yini nga a’iria ayiko dri kuria,azini yini osule osurisi, eri ’yo yi tia, Afa nyaza emi vu ’dia indi ya?

⁴²Yi nga e’bi osizaru ma esele azini pi fe drinia,

⁴³eri nga ’du, nya yi milia.

⁴⁴Eri ’yo yi tia, E’yo ndra mani olule emi tia de ma ovu emi be indiri eri ’di’i, kini e’yo dria sile masi azita Musani pi ma alia nabi pie, zaburi pie dria ’diyi ma ’ye yi yi paria.

⁴⁵Eri nga asisile yini zi e’yo siza vazu,

⁴⁶eri ’yo yi tia, E’yo ovu sizaru ’dini, kini Kristoni nga candi nya, eri nga enga dika ’ba draza ma eselia o’du nasi,

⁴⁷azini yi nga asi ojaza e’yo onzi wuzu aniri ma e’yo olu eri ma rusi suru dria ma tia, e’dozu Yerusalemua.

⁴⁸Emi ovu ’ba e’yo ’diyi ma eti nzepiriru.

⁴⁹Mi ndre, ma aziza ma Atini azileri ma ti epe emi dria; te emi ma te aku amborua de nga emi suni okpo engapi ’buari emi ruaa ku.

⁵⁰Eri ji yi amve cazu Betani vu ogogo; eri enga i dri uru, fe asi ndriza yi dri.

⁵¹Eri nga eca ’dini, erini asi ndriza feria yi dri, eri awa di i esele yi be, ovu ’duzaru ’bua.

⁵²Yi inzi eri, nga mvi Yerusalemua layiko amboru be;

⁵³yi nga ovu hekalua indikindi Mungu inzizu.