Read lugbara Luka 3 Bible Online

Luka 3 - lugbara bible

Luka 3

¹Eli mudri drini towi Tiberio Kaisarini suru nyazurisi, de isu Pontio Pilatoni gavenaru Yudia ma drilia, de Herodeni opiru Galilia, eri ma adri Filiponi de opiru angu Ituriari pi ma drilia Trakoniti be, de Lusaniani opiru Abilenea,

²de Anasi pi Kaifa be yini kuhani amboru ma azi ngaria, e’yo Munguni eca Yohana Zakaria mvi vu roko dria;

³eri mu angu Yoridani ma ageiaria dria, baputizi asi ojazani e’yo onzi wuzu aniri ma e’yo oluzu.

⁴Kile e’yo nabi Isayani sile buku ma aliarile, O’duko ’ba oyupi roko driarini: Emi ede geri Opini, emi ’ba leti erini kililiru.

⁵E’buti kinakina nga ga nyakusi tre tre, yi nga oni izuru ’diyi pi osi oni were ’diyi be dria ele, angu ovupi goligoliru ’diyi nga eca kililiru, otukutu otukutu ’diyi nga eca seresere;

⁶’ba rua ari be ’diyi dria nga pata Munguni ndre.

⁷Eri ’yo ’ba ongulumuru tia ani, yini muria baputizi biria eri vu, Emi anzi uriohuluni! A’di ece emi dri apazu adra emupirisini ya?

⁸E’yo ’disi emi ma ’ya ani efi yi sipi asi ojaza be ’diyi, azini emi ma ’ba ’yo emi asia kini, A’bi amani eri Iburahimu’i, ’dini ku; te ma ’yo emi tia kini, Mungu eco oniefi ’diyi engazaru Iburahimu dri anziru ra.

⁹Te curu’do ogara ’ba i pati oja vu i ogogo ’bo; te ’ba yi adri pati dria efi ’yapi onyiru ku ’diyi ga va, ’bezu acia,

¹⁰’Ba ongulumuru zi eri tia kini, Ka’dini ama nga a’di ’ye ya?

¹¹Eri omvi e’yo yi tia, ’Ba ovupi koti iri beri ma fe aluri ’ba koti kokoruri dri; ’ba ovupi nyaka beri ma ’ye ’dinile indi.

¹²’Ba musoro okupi ’diyi nga di eca eri vu baputizi bizu, nga ’yo eri tia kini, ’Ba ’ba Imbapiri, ama nga a’di ’ye ya?

¹³Eri ’yo yi tia, Emi ma oku musoro aga yini azile emi tiarile ku.

¹⁴Asikari nga zi eri tia alu indi, ikini, Te ama’i, ama di nga a’di ’ye ya? Eri ’yo yi tia, Emi ma opa afa ’bani okposi ku, emi ma su asu ’ba ’ruaa inzosi ku, oya emini ma fu dri emi Ina milia.

¹⁵’Bani e’yo teria azini ’ba driani e’yo egaria yi asia e’yo Yohananisi kini, kani eri Kristo’i ’yani,

¹⁶Yohana nga e’yo omvi ’yo vi tia dria, Ma’iruni, ma baputizi fe emi dri yisi; te ’ba ma agapi Okposiri eri emu ’ai, mani dri fuzu enyiriko eri ma paari ma baka ayuzu kuri’i; eri nga emi dri baputizi fe i Orindi Alatararu pisi aci beni,

¹⁷Eri kobi erini be eri dria, akuma erini ’bazu alaru, anyani okuzu ero erini alia; te eri nga anya drileko ve aci i inyupi kurisi.

¹⁸Eri olu e’yo bari ’ba ma tia, yi asi omizu e’yo azini kakausi.

¹⁹Te eri ega opi Herode ma dria, erini Herodiasi i adripi ma oku bilerisi, azini e’yo dria erini ’yele onzirisi;

²⁰te Herode nga e’yo ’di o’ba e’yo ’diyi dria ma dria ’dini, eri ombe Yohanani arujoani.

²¹Eri nga di eca ’dini, ’ba dria ka baputizi bira, Yesu indi ka baputizi bi ’bo, isu erini ziria, ’bu zi i mgboru,

²²Orindi Alatararu si va eri dria, e’da rua be kile a’balau ruale, o’duko enga ’bua kini, Mi Mvi mani lele turi’i; ma ovu ayikosi tu e’yo minisi.

²³ Yesu ma ngulupi ma eli ka ca kali na ’bo, eri ’ba di ’ba imba ndo; ’ba ega eri ovu Yusufu mvi’i, mvi Elini,

²⁴Matatini, Levini, Melikini, Yanaini, Yusufuni,

²⁵Matatiani, Amosini, Nahumini, Esilini, Nagaini,

²⁶Maatini, Matatiani, Semeini, Yosekini, Yodani,

²⁷Yoanani, Resani, Zerubabelini, Sealitielini, Nerini,

²⁸Melikini, Adini, Kosamuni, Elimadamuni, Erini,

²⁹Yesuni, Eliezerini, Yorimuni, Matatini, Levini,

³⁰Simeonini, Yudasini, Yusufuni, Yonamuni, Eliakimuni,

³¹Meleani, Menani, Matatani, Natanini, Daudini,

³²Yeseni, Obedini, Boazini, Salimonini, Nasonini,

³³Aminadabuni, Arinini, Hezironini, Perezini, Yudani,

³⁴Yakoboni, Isakani, Iburahimuni, Terani, Nahorini,

³⁵Serugini, Reuni, Pelegini, Eberini, Selani,

³⁶Kainanini, Arifakisadini, Semini, Noani, Lamekini,

³⁷Metuselani, Enokani, Yaredini, Malalelini, Kainanini,

³⁸Enosini Setini, Adamuni, Munguni.