Read lugbara Luka 4 Bible Online

Luka 4 - lugbara bible

Luka 4

¹Yesu ga tre Orindi Alatararusi, ka emvi Yoridaniasi ’bo, Orindi ji eri muzu angu roko driaria,

²o’du kali su obezaru ’ba asu supiri dri. O’du ’dayisi eri nyani ndra afa ku, te o’du ’dayi ka yi de ra eri ovu abiri be.

³’Ba asu supiri ’yo eri tia, Mi ka ovu Mungu Mvi’i, mi ma ’yo oniefi ’diri ma tia, ma ofu enyaru.

⁴Yesu nga e’yo Omvi, ’yo eri tia, E’yo si i ’bo kini, ’Ba econi ovu idriru enyasi a’dule ku.

⁵’Ba asu supiri ji eri uru, ece eri dri suru wudrikuruni dria mbelekocici;

⁶’ba asu supiri ’yo eri tia, Ma fe mi dri okpo ’diri dria, diza yini be; a’disiku fe yi ma dri ra, ’ba mani lezu fezu driniari dri ma fe ra,

⁷E’yo ’disi mi ka kumuti osi va ma drilia ma inzizu, afa ’diri dria nga ovu mini.

⁸Yesu omvi e’yo eri tia, E’yo si i ’bo kini, Mi ma inzi Opi Mungu mini, mi ma nga azi eri dri a’dule.

⁹Eri ji eri Yerusalemua, ’ba eri pa sozu hekalu ma karia dria uru, nga ’yo eri tia, Mi ka ovu Mungu Mvi’i, mi ’be mi ’diarisi va;

¹⁰te e’yo si i ’bo kini, Eri nga malaika erini azi e’yo

¹¹azini, Yi nga mi ’du uru dri yinisi, mi kazu mi pa sizu oni dria ku.

¹²Yesu nga e’yo omvi ’yo eri tia, Eri ovu ’yozaru ’dini, Mi obe Opi i Mungu mini ku.

¹³’Ba asu supiri ka obeta de kinakina ’bo, ku anga eri were.

¹⁴Yesu nga emvi Galilia okpo Orindinisi; e’yo erini nga ku angu ageiniaria dria wakaka.

¹⁵Eri imba ’ba pari yini yi okuzuria, eri ovu inzizaru ’ba driasi.

¹⁶Eri mu Nazareti pari erini zozuria; nga fi pari ’bani yi okuzuria o’du sabatonisi, kile erini adrile ’yelerile. Eri nga pa so uru e’yo lazu;

¹⁷yi fe eri dri buku nabi Isayani.Eri ka buku zi ’bo, eri isu pari yini sile ’diniri,

¹⁸Orindi Opini ovu ma dria, erini odu osule ma dria e’yo baru oluzu ’ba alioru ’diyi ma tiarisi. Eri pe ma ti e’yo otruzani oluzu ’ba ovupi ombezaru aruru ’diyi ma tia, azini e’yo yini angu luzu dikari oluzu ’ba mileefi draza be ’diyi ma tia, ’ba rua be nyozaru ’diyi ti pezu truzaru,

¹⁹eli Opini a’ileri ma e’yo oluzu indi.

²⁰Eri tra buku ra, omvi eri ’ba azi ngapiri dri, nga ri va; ’ba dria ovupi pari ’bani yi okuzuria ’diyi osu mile eri ruaa.

²¹Eri ’ba ’yo yi tia kini Andru e’yo siza ’diri ’ye i i paria emi bilia ’bo

²²’Ba dria yi nze e’yo eti erisi, yi osu tu e’yo anzutiriru efupi eri tilia ’diyisi; yi ’yo ra, ’Ba ’diri eri Yusufu mvi’i ku ya?

²³Eri ’yo vini yi tia, Adaru emi nga e’yo o’beza ’diri ’yo ma tia i ’dini, Ojou, mi ati mi ngulupi ma rua’i; e’yo amani erile mini ’yele Kaperinaumua ’diyi, mi ma ’ye ’doa angu mi vileria alu indi.

²⁴Eri ’yo ra, Ma ’yo emi ria ndi ndi, Nabi ovupi a’izaru angu i vileriari aluni yo.

²⁵Te ma ’yo emi tia ada, Ndra ewu Eliyani ovuzurisi, ewu ’buni ovuzu ecizaru eli na drinia mba azia, tiki amboruni ovuzu oro drisi driarisi, awuzi yi karakarau ’ba Israelini ma eselia;

²⁶te ti, peni Eliya ma ti ’ba aluni yi ma eseliari vu ku pe lu oku alu awuziruri vu, kpere aku Sarepeta Sidoniaria.

²⁷Azini ewu nabi Elisani ovozurisi, ’ba ofu be yi kakau Israeli ma eselia; te yi ma azi aluni atini ku, alu Naamani Surioururi ati uri.

²⁸’Ba dria ovupi pari ’bani yi okuzuria ’diyi ka e’yo ’diyi eri ra, aoko ti yi asia tre.

²⁹Yi nga enga uru eri ’bezu akuarisi amve, yi ’ye eri ji oni aku yinini ovuzu driniari ma tia, yi ma ’be eri va ombe dria ani beni.

³⁰Te eri aga yi eselesi, mu ra.

³¹ Eri si va Kaperinaumu aku Galilinia. Eri ovu yi imbaria saba tosi;

³²yi osu tu imbata erinisi a’disiku e’yo erini oluleri ovu okpo be.

³³Pari ’bani vi okuzuria, isu agu alu indi ovopi orindi onzi alata kokoruri be eri aliari; eri oyu o’duko urusi,

³⁴Wa wo! E’yo amani mi be ngoni ya, mi Yesu ’ba Nazaretiari la? Mi emu di ama dri ja ya? Ma ni mi ra, mi ’Ba Alatararu Munguni.

³⁵Yesu nga ega drinia kini, Mi adri ciri, mi efu eri ma aliasi! Orindi onzi ka eri ’be va yi ma eselia ’bo, eri efu eri ma alia i coti, te kuni eri ma rua onzi ku.

³⁶Yi dria ovu osutasi, yi nga e’yo ’yo yi eselia kini, ’Dini ’diri a’di e’yoni ya? A’disiku eri azi orindi onzi ondiru ’diyi ecoza be azini okpo be, yini fuzu ani.

³⁷E’yo erini nga di ku pari dri dria angu ma lagela ra.

³⁸Eri nga enga uru, fu pari ’bani yi okuzuriasi, nga fi Simoni vile joa. Isu rua driza amboru bi Simoni ma idrinini, yi nga eri zi eri ma e’yosi.

³⁹Eri so pa drilenia, nga ega rua driza nde ma dria; azo nga eri ku ani ra; coti eri nga enga uru azi ’yezu yi dri,

⁴⁰Etuni caria ’bile tia ogogo, ’ba dria ovupi ’ba yini azoru azo ndu ndusi ’diyi be ’diyi nga yi eji eri vu; eri nga dri ti yi dria alu alu, eri ati yi rua dria ra.

⁴¹Orindi onzi fu ’ba kakau ma ruaa, yini oyuria uru ’yoria kini, Mi Mvi Munguni! Te eri ega yi dria, eri a’ini yi dri e’yo ’yozu ku, yini nile kini eri ovu Kristo’irisi.

⁴²Angu ka ati ra, eri fu amve mu roko dria. ’Ba ongulumuru nga eri nda, nga emu eri vu, yi le eri oga si, eri kazu yi kuzu ku;

⁴³te eri ’yo yi tia, Ma ma olu e’yo baru suru Mungunirini aku azini ma tia indi; a’disiku epe ma ti e’yo ’disi.

⁴⁴Eri ovu e’yo oluria Galilia pari ’bani yi okuzuria.