Read lugbara Luka 5 Bible Online

Luka 5 - lugbara bible

Luka 5

¹Eri nga eca ’dini, de ’ba ongulumuru yini eri omiria ci ci e’yo Munguni erizu, isu eri so pa miri Genesaretini ma tia.

²Eri ndre oguru irini pa soria yi kutia; te ’ba e’bi okupi ’diyi efu oguru nde ma aliarisi ’bo, yi ovu emba yini ojiria.

³Eri tu oguru ’diyi ma azi alu Simoni vileri ma alia, eri zi eri kini ma si yi alialeru, ma ku kuti were. Eri ri va, nga ’ba ’ba ongulumuru imba de eri ovu oguru alia.

⁴Ka de e’yo oluzu ’bo, eri ’yo Simoni ma tia, Emi si yi aliru ma alialeru, emi su emba yia e’bi okuzu.

⁵Simoni omvi e’yo kini, Ambo la, ama ecandi,te ama ini be rra ti, te ama isuni afa aluni ku! Te e’yo minirisi ma nga emba su yia.

⁶Yi ka ’ye ’dini ’bo, yi oku e’bi ongulumuru kakau; emba yini ’ba yi ce ce;

⁷yi aku yi agyi yini azi ngazu yi be tualu ovupi oguru aziniri ma alia ’diyi, kini yi ma emu yi aza ko. Yi emu ra, yi ga oguru iri ’diyi ma alia tre tre, oguru nde ’diyi ’ye ’de yi alia ’de ’de ani.

⁸Te Simoni Petero ka ndre ra, eri eco i va Yesu ma kumutia, kini, Mi nga ma vurisi fo, mani ovule ’ba onzinirisi, Opi!

⁹Te eri osu tu, ’ba dria ovupi eri be ’diyi be, e’bi karakarau yini okulerisi;

¹⁰’dinile anzi Zebedayoni, Yakobo pi Yohana be, yi agyi azi ngapi Simoni be tualu ’diyi, yi osu osu indi. Yesu nga di ’yo Simoni ma tia kini, Mi ru ku; engazu curu’do mi nga ovu ’ba ’ba okupiriru.

¹¹Yi ka oguru yini ji kutia ’bo, yi ku afa dria, yi bi eri vuti.

¹²Eri nga eca ’dini, de eri ovu aku ’diyi ma azi alu ma alia, isu agupi alu indi, ofu nya eri rua kurubu; eri ka Yesuni ndre ra, eri nga i eco o’bukuru va, nga matu ’ba eri vu kini, Opi, mi ka le ra, eco mini ma rua ’bazaru alaru.

¹³Eri eju i dri, eri elo eri rua, kini, Ma le ra; mi ovu di alaru. Ofu ku di eri rua coti.

¹⁴Eri azi e’yo eri tia, eri ma ’yo ’ba azini ria aluni ku; te kini, Mi mu leti minia, mi ece mi ngulupi kuhani dri, mi ofe edeta mi ruani ecazu ’alaruri ma e’yosi kile Musani azilerile, e’yo eti nzezu yi dri.

¹⁵Te di e’yo erini ku tu aga ra; ’ba ongulumuru kakau nga yi oku tualu ani e’yo erizu, azini dra yini ma ati ani beni.

¹⁶Te eri ma ngulupi enga yi eselia, mu roko dria Mungu zizu.

¹⁷Eri nga eca ’dini, o’du ’dayi ma azinisi, de erini ’ba imbaria, ’ba Farisaini piyi ’ba azita imbapi ’diyi pie, engapi aku nyiri nyiri dria Galilia ’diyi ma alia, Yudiaa ’diyi pie, Yerusalemua be ’diyi ri eri ma ageia; te okpo Opini ovu eri be ’ba ma rua atizu.

¹⁸Te mi ndre, ’ba eji pari dria agu alu azo ’ba ruani yazu yari beri, yi nda geri eri ofizu ’bazu eri ma drilia;

¹⁹te ’ba ongulumuruni ovule trerisi, yi nda geri eri ofizu ti, yi nga tu ani jo dria uru, nga regula ma azi onze, nga eri osi va talanisi pari erini be ’ba ma eselia Yesu ma drilia.

²⁰Erini a’ita yini ndreria, eri ’yo ra, Agu la, wu e’yo onzi mini ’bo.

²¹Karani piyi ’ba Farisaini be ’ba e’yo ozi yi eselia kini, ’Ba Mungu o’dapi ’diri eri a’di’i ya? A’di eco e’yo onzi wuzaruni, pe Mungu’i a’dule ku ya?

²²Te Yesuni erini e’yo yini ozile yi asiari varia, nga e’yo omvi ’yo yi tia, Emi e’yo ozi emi asia ngoni ya?

²³Ewa kokoru turi ngori ya, ’yozu, Wu e’yo onzi mini ’bo; kani ’yozu, Mi enga uru, mi aci?

²⁴Te emini nizu ani kini Mvi ’bani ovu okpo be nyakua e’yo onzi wuzu, (eri ’yo ’ba azo ruani yazu yari beri ma tia) Ma ’yo mi tia, mi enga uru, mi ’du pari mini, mi mu mi vile joa.

²⁵Eri enga perepere yi milia uru, ’du pari ini te lazu driniari, eri ko dri mvi jo inia, ji mu Mungu ru inzi so.

²⁶’Ba dria yi osu tu, nga Mungu ru inzi; uri ga yi asia, yi ’yo ra, Andru ama ndre afa osutaru tu turi’i.

²⁷E’yo ’diyi ma vutia eri fu amve, nga ’ba musoro okupiri alu ndre, runi Levi’i, erini riria pari ’bani musoro ’bezuria; eri ’yo eri tia, Mi bi ma vuti.

²⁸Eri ku afa dria, eri enga uru, bi vutini.

²⁹Levi a’di eri dri omu amboru jo ini ma alia; ’ba ongulumuru kakau musoro okupi ’diyi ’ba azini be indi, yi ori nyaka tia yi be.

³⁰’Ba Farisaini piyi karani yini be nga no ’ba erini imbale ’diyi ma dria, ’yozu kini, Emi nya azini emi mvu ’ba musoro okupi ’diyi be tualu, ’ba e’yo onzi ’yepi ’diyi be, a’disi ya?

³¹Yesu nga e’yo omvi, ’yo yi tia, ’Ba rua be alaru ’diyi leni ojou ku, te ’ba azo be ’diyi leni;

³²ma emuni ’ba kililiru ’diyi omvezu ku, te ’ba e’yo onzi ’yepi ’diyi omvezu asi ojazu.

³³Yi ’yo eri tia, ’Ba Yohanani imbale ’diyi adri nyaka ’da pale kakau, Mungu zizu indi, ’ba Farisaini imbale ’diyi ’ye ’dinile indi; te ’ba mini yi nya, yi mvu.

³⁴Yesu ’yo yi tia ’dini, Eco emini nyaka ogazaru otala izio ma joa ’diyi dri, de nga izioni yi be indi ra ya?

³⁵Te o’du yini ngazu izioni nzezu yi ma eseliari nga eca ra, yi nga nyaka ’da o’du ’darisi ndo.

³⁶Eri nga e’yo eti o’be yi tia indi: ’Ba aluni asini bongo o’diru ecizu bongo okuri ma ruaa ku; ka ’ye ’dini, eri nga bongo o’diru asi ra, azini vini bongo eciza engapi o’diri ma aliari ngani i si okuri be ku.

³⁷’Ba aluni toni patiefi ma su o’diru enyi okuri ma alia ku; ka ’ye ’dini, patiefi suni nga enyi asi ra, patiefi suni nga i ada va, enyini nga i eza ani indi.

³⁸Te ’ba ma to patiefi su o’diru enyi o’diru ma alia.

³⁹’Ba aluni patiefi su okuri mvupiri ngani o’dini le ku; te eri ’yo ra, Okuri onyiru.