Read lugbara Luka 6 Bible Online

Luka 6 - lugbara bible

Luka 6

¹ Eri nga eca ’dini, o’du sabatonisi erini agaria amvu anya beri ma alesi, ’ba erini imbale ’diyi nga anya dri ovi, nga anya nde anyi drisi, nga di nya ndo.

²’Ba Farisaini ’diyi ma azi ’yo ra, Emi ’ye e’yo azitani ogale ’yekokoru o’du sabatonisiri a’disi ya?

³Yesu nga e’yo omvi, ’yo yi tia kini, Emi lani nga e’yo ’diri, ndra Daudini ’yele de eri ovu abirisi, eri’i ’ba ovupi eri be ’diyi pieri ku ya?

⁴Emi lani e’yo erini fizu jo Mungunia, erini enya ecetaruri ’duzu nyazu fezu ’ba ovupi eri be ’diyi dri indiri ku ya? de isu azita oga enya nde nyako si, pe lu kuhani dri a’dule.

⁵Te eri ’yo yi tia, Mvi ’bani eri Opi sabatoniri.

⁶Eri nga eca ’dini sabato azinisi, eri fi pari ’bani yi okuzuria ’ba imbazu, te agu azini indi ’dale eri ma dri ndiri ondrizaru.

⁷’Ba karaniru ’diyi pi ’ba Farisaini be, nga eri ndre okposi, kani eri nga eri ati o’du sabatonisi yani; ka’dini yi ma isu geri asu suzu eri ruaa beni.

⁸Te eri ni asisile yini ra; eri nga ’yo agu dri ondrizaruri ma tia, Mi enga uru, mi so pa agadua. Eri nga enga uru, nga pa so ra.

⁹Yesu nga ’yo yi tia, Ma emi zi, azita a’i ’ba ma nga azi onyiru etu sabatonisi’i, kani azi onzi’i ya? ’Ba pazu kani ’ba ma dri jazu ya?

¹⁰Yesu nga yi olu dria, nga ’yo agu nde ma tia, Mi eju mi dri. Eri eju ra, drini nga eca idriru coti.

¹¹Te aza fi yi asia, yi di nga e’yo ’yo yi eselia kini yi ma ’ye di Yesuni ngoni ya.

¹²Eri nga eca ’dini, o’du ’dayisi eri fu mu oni dria Mungu zizu; eri zi Mungu ini be rra.

¹³Angu ka ati ra, eri omve ’ba erini imbale ’diyi i vu, eri nga ’ba ope yi ma eselia mudri drini iri, nga yi omve ’ba ti opele ’diyi:

¹⁴Simoni erini omvele Petero’iri pi, Andarea adripi erini be, Yakobo pi Yohana be, Filipo pi Baritolomayo be,

¹⁵Matayo pi Toma be, Yakobo Alifayo mvi pi, Simoni yini omvele Zeloteri be,

¹⁶Yudasi Yakobo mvi pi, Yudasi Isikariote eri ma o’di nyapiri be.

¹⁷Eri si va yi be, eri so pa angu senderu ma dria, ’ba ongulumuru erini imbale ’diyi, azini ’ba kakau engapi angu dria Yudiani pi ma alia Yerusalemu pie, angu miri tia Turo pi ma ageia Sidoni beria ’diyi pie dria emu e’yo erizu eri vu, yi ma ovu ani atizaru azo yinisi beni;

¹⁸’ba yi ecandipi orindi onzisi ’diyi dria ovu atizaru.

¹⁹’Ba ongulumuru dria yi nda geri eri rua elozu, okponi efule eri vu yi atizu driarisi.

²⁰Eri nga i mile enga uru ’ba erini imbale ’diyi vu, nga ’yo ra: Emi drilebaru, emi ’ba alioru ’diyi, suru Mungunirini ovule eminirisi.

²¹Emi drilebaru, emi ’ba abirini fule curu’do ’diyi, emini ngale trale rarisi. Emi drilebaru, emi ’ba wupi curu’do ’diyi, emini ngale ogule ogurisi.

²²Emi drile baru, ’ba ka emi ngu onzi, yi ka emi esele co yi be ndu, yi ka drinza fe emi dri, ka emi ru ’be amve afa onzikanyarule, Mvi ’bani ma e’yosi.

²³Emi ma ovu ayikosi o’du ’dasi, emi enya emi nyonasi, te emi ndre, orodri emini eri amboru ’bua; a’bi yini yi ’ye ndra nabi vu ’dinile trotro.

²⁴Te candi emi dri, emi ’ba afa e’ipiru ’diyi la, emini asi omiza emini a’ile ’borisi.

²⁵Candi emi dri, emi ’ba trapi curu’do ’diyi la, emini ngale ovule abiri berisi. Candi emini, emi ’ba ogupi curu’do ’diyi la, emini ngale e’yo eyikile candisi azini wulerisi.

²⁶Candi emini, ’ba dria ka e’yo onyiru ’yo emisi, te yi a’bipi ’ye nabi inzoru vu ’dinile trotro.

²⁷Te ma ’yo emi ’ba eripi ’diyi ma tia, Emi ma le juru emini, emi ma ’ye onyiru ’ba emi ngupi onzi ’diyi vu,

²⁸emi ma ’yo e’yo asi ndrizasi ’oa emi tripi ’diyi ma tia, emi ma zi Mungu ’ba emi ’yepi onzi ’diyi dri.

²⁹’Ba emi o’bolo sapi aluri dri emi ’ma oja aziniri indi; ’ba bongo emini amveleru papiri dri emi ma oga alialeruri ku.

³⁰Mi ma fe ’ba dria afa a’ipi mi vuri dri; ’ba afa emini ’dupiri ma tia, mi ma zi ariotini omvizu ku.

³¹Emi ma ’ye ’ba vu ekile emini lele yi ma ’ye emi vurile.

³²Emi ka ’ba emi lepi ’diyi le tuke’i awa’difo emini ngoa ya? Ka tro ’ba onzi ri, yi adri ’ba yi lepi ’diyi le’i.

³³Emi ka ’ba emi ’yepi onyiru ’diyi ’ye tuke onyiru’i, awa’difo emini ngoa ya? Ka tro ’ba onzi ti, yi adri ’ye ’dinile ra.

³⁴Emi ka mari fe ’ba emini egale kini yi nga omvi ra ’diyi dri, awa’difo emini ngoa ya? ’Ba onzi yi adri mari fe ’ba onzi azini ’diyi dri, yi ma a’i amvizani trotro beni.

³⁵Te emi ma le emi juru, emi ma ’ye onyiru, emi ma fe mari, ka tro emi egani omvizani ku ti; orodri emini nga ovu kakau, emi nga ovu anzi Mungu ovupi Uru Turini; erini ovule onyiru ’ba awa’difo kokoru ’diyi pi vu ’ba onzi be indirisi.

³⁶Emi ma ovu asi ndriza be Ata eminirini ovule asi ndriza berile.

³⁷ Emi ku e’yo liza ja, ’ba ngani e’yo emini li ku beni; emi li e’yo i ’bani yi ndezu ku, ’ba ngani ani e’yo li emi ndezu ku; emi ku e’yo onzi ’bani, ’ba nga e’yo onzi emini ku ani;

³⁸emi ma fe afa ’ba dri, ’ba yi nga afa fe emi dri indi; yi nga o’biza onyiru, omizaru, oyazaru, drini ayipi vari fe emi dri ’duzu agatia. Te yi nga afa o’bi emi dri, o’bita emini o’bile feleri vusi.

³⁹Eri olu e’yo o’beza yi tia kini: Eco ’ba mileefi odraza berini agyi mileefi odraza beri ma dri cezaru ra ya? Yi ngani iritro o’de ’bilia ku ya?

⁴⁰’Ba imbata a’ipiri agani ’ba eri imbapiri ku, te ’ba dria, ka ovu imbazaru de ’bo, yi nga ovu ’ba yi imbapirile.

⁴¹Mi ndre pati o’boroko mi adripi ma miliari a’disi ya, dere pati ’barata mi ngulupi ma miliari mi luni ku?

⁴²Mi eco ’yozaru mi adripi tia ngoni ngoni ya, Ma adripi, mi fe ma epe pati o’boroko mi miliarisi, ka mi ndreni pati ’barata mi miliari ku ya? Mi ’ba lokiri be, mi epe pati ’barata mi miliari raka, mi nga di ndre onyiru pati o’boroko epezu mi adripi ma miliarisi ndo.

⁴³Pati onyiru efi onzikanya ’yapini yo, azini pati onzikanya efi onyiru ’yapini vini yo;

⁴⁴te ’ba pati dria alu alu ni efi ’yaza yinirisi. ’Ba tini elio efi pati oci beri ma ruaa ku, azini yi tini zabibu efi La ruaa ku.

⁴⁵’Ba onyiruni adri e’yo onyiru ofu lonyi onyiru i ma asiari ma alia, azini ’ba onzi e’yo onzi ofu lonyi,onzi ma alia; te ti ’bani eri e’yo gapi ’ba ma asia treri ’yo’i.

⁴⁶Emi ma omve Opi, Opi, a’disi ya, emi ka e’yo mani ’yoieri ’ye ku?

⁴⁷’Ba dria alu alu emupi ma vu e’yo mani eripi yi ’yepi indiri, ma nga emi dri eceta erini i sizu erileri ece:

⁴⁸eri ovu agu jo sipirile, eri ova aliru, eri ’ba jo eti kata dria; yi tiza ka emu ra, yi raza ka i da jo ’dari ma dria okposi ti, econi eri oyazaru ku, erini sile onyirurisi.

⁴⁹Te ’ba eripi ra ’yepi kuri eri ovu ’ba jo sipi nyaku dria jo eti kokorurile; yi razani nga i da jo ’dari ma dria okposi, joni nga perepere i asu va; jo ’dari ma e’dezari amboru.