Read lugbara Luka 7 Bible Online

Luka 7 - lugbara bible

Luka 7

¹Eri ka de e’yo erini oluzu ’ba ma bilia dria ’bo, vilerisi eri fi Kaperinaumua.

²Isu asikari amboru asikari turu alu ma driliari ma ati’bori azoru, eri ’ye dra dra, te eri le eri tu.

³Eri ka e’yo Yesuni eri ra, eri pe ’ba ’wara Yahudini ma ti eri vu, eri zizu eri ma emu ati’bo erini pazu.

⁴Yi ka emu Yesu vu ’bo, yi nga matu ’ba eri vu asi driasi, kini, Eri ’ba onyi beni, si te mini e’yo ’diri ’yezu eri dri ra,

⁵a’disiku eri le suru amani ra, eri ma ngulupi si jo ’bani yi okuzuri ama dri indi.

⁶Yesu mu yi be. Eri ka ca ogogo jo nde vu ’bo, ambo asikari turu alu ma driliari pe agyi erini ti eri vu, ’yozu eri tia kini, Opi, mi ecandi mi ku, ma funi dri mini fizu jo mania ku;

⁷e’yo ’disi ma egani vini ma fu dri emuzu mi vu ra ’dini ku. Te mi ’yo lu e’yo’i, ati’bo mani ma ruani nga ati ani.

⁸’Dini ma’i indi ma inzita fe ambo ma driliari dri, asikari indi yi inzita fe ma dri: ma adri ’yo ’ba aluri tia, Mi mu, eri mu ra ’ba aziniri ma tia, Mi emu, eri emu ra; ati’bo mani ma tia, Mi ’ye ’diri, eri ’ye ra.

⁹Yesu ka e’yo ’diyi eri ra, eri nga osu erisi, nga i oja ’ba ongulumuru i vuti bipi ’diyi vu, nga ’yo yi tia, Ma ’yo emi tia, ma isuni nga a’ita amboru ’donile ku, e, ka tro Israeli ma eselia ti.

¹⁰’Ba ti pele ’diyi ka mvi joa, yi isu ati’bo ma rua ati de ’bo.

¹¹Eri nga eca ’dini, o’du ’diri ma vutia were, eri nga mu aku omvele Naini’iria; ’ba erini imbale’diyi mu eri be tualu ’ba ongulumuru be kakau.

¹²Eri ka eca aku nde ma kali tia ogogo, mi ndre, yi mva andrini tile ilipiliruri ma avu aro ji sazu, te andrini awuzini; ’ba kakau aku ndea ’diyi mu eri be indi.

¹³Opi ka eri ndre ra, yiki nga eri fu erisi, eri ’yo tinia, Mi wu ku.

¹⁴Eri nga si ogogo, nga aro avu ’duzuri ma rua do; ’ba eri jipi ’diyi yi oso pa. Eri ’yo, Karilau, ma ’yo; mi tia, mi enga uru.

¹⁵Avu enga di, ri urulesi, eri ’ba e’yo ’yo indi. Eri fe eri andri dri.

¹⁶Uri bi ’ba dria, yi inzu Mungu kini, Nabi amboru enga ama eselia ’bo azini kini, Mungu andri ’ba erini ’bo

¹⁷E’yo erini ’diri ku angu Yudiani ma alia dria, azini angu ageiniaria dria, Yohana baputizi jepirini ojiou ti pezu

¹⁸’Ba Yohanani imbale ’diyi olu e’yo ’diyi dria eri tia.

¹⁹Yohana omve ’ba erini imbale ’diyi iri i vu, pe yi ti Opi vu, kini, Mi ’ba emupiri’i ya, kani ama ’ba azini te?

²⁰’Ba nde ka eca eri vu, yi ’yo ra, Yohana ’ba baputizi fepiri pe ama ti mi vu, ’yozu, Mi ’ba emupiri’i ya, kani ama ’ba azini te?

²¹Etu ’dasi eri ati azo ’ba ruaa kakau, dra ndu ndu pie, orindi onzi pie, eri fe ’ba mileefi odraza be ’diyi kakauni angu luzu dika,

²²Eri nga e’yo omvi, ’yo yi tia, Emi mu afa emini ndrele azini erile ’diyi ma e’yo olu Yohana tia: ’ba mileefi odraza ’diyi angu lu dika, ’ba acozaru ’diyi ad aci, ’ba ofu be ’diyi ma rua eca alaru, ’ba bile dirinyaru yi e’yo eri, ’ba odrapi ’diyi enga idriru, yi e’yo bari olu ’ba alioru ma tia.

²³’Ba abapi ma e’yosi kuri eri drilebaru.

²⁴Ojiou Yohanani ka di mu ’bo, eri ’ba e’yo Yohanani ’yo ’ba ongulumuru ma tia ’dini kini: Emi fu mu angu roko dria a’di afa lu ya? Ozu i oyapi olisiri ya?

²⁵Te emi fu mu la’di afa ne ya? Emi mu agupi bongo menemene supiri ndre ya? Mi ndre, ’ba bongo ndriza supi afa aluza nyapi ’diyi adri ovu opi ma akua.

²⁶Te emi fu mu a’di afa ne ya? Emi fu nabi ndre ya? Awa’dini, ma ’yo emi tia, emi fu agu ’ba nabiru ’diyi agapiri ndre.

²⁷’Ba ’diri eri ’ba yini e’yoni sile ’bori’i, kini, Mi ndre, ma pe ojiou mani ma ti mi milia, eri nga geri mini ede mi drilia.

²⁸Ma ’yo emi tia, ’ba dria okuni josile ’diyi ma eselia, ’ba Yohanani agapini yo; te ’ba werearu tu suru Munguniari aga eri ambosi ra.

²⁹’Ba ongulumuru dria ka eri ’bo, ’ba musoro okupi ’diyi be,yi a’i kini Mungu eri kililiru ra, yini baputizi Yohanani feleri bilerisi.

³⁰Te ’ba Farisaini piyi ’ba azita imbapi ’diyi be, yi ga yi ma ngulupisi e’yo amaza Munguni a’ikokoru si, yini baputizi Yohanani bile kurisi.

³¹Ma nga ’ba a’bianziru ’diyi o’bi eceta ngonilesi ya? Yi ovu a’di afale ya?

³²Yi ovu kile anzi ripi pari afa ozizuria yi agyi omvepi ’diyile, yi ’yo kini, Ama vu ejeleko emi dri, te emi tuni ongoni ku; ama ga lulu, te emi owuni ku.

³³Te Yohana baputizi fepiri eca ra, nyani enya ku, mvuni patiefi ma su ku indi; te emi ’yo, Eri orindi onzi be.

³⁴Mvi ’bani eca ra, nya ra, mvu ra; te emi kini vini, Mi ndre, agu anyamgboloru patiefi ma su mvupi turi’i, eri agyi ’ba musoro okupi ’diyi pini ’ba e’yo onzi ’yepi ’diyi be!

³⁵Te ondua ovu ecezaru kililiru anzi ini driasi.

³⁶’Ba Farisaini alu zi eri tia eri ma nya i be. Eri fi di ’ba Farisaini ma joa, nga ri va nyaka tia.

³⁷Te mi ndre, oku onziri indi aku nde ma alia; eri ka ni ra kini eri ri nyaka tia ’ba Farisaini ma joa, eri eji odu aji be arikariru lu’bu emveru ma alia,

³⁸erini pa soria eri ngukua panialeru awu be, eri ’ba mindre osu eri ma pa dria, nga ini dribi i ma driarisi, nga pani ndru, efizu odu aji be arikariru nderisi.

³⁹Te ’ba Farisaini eri omvepiri ka ndre ra, eri ’yo i asia kini, ’Ba ’diri ka te nabini, eri te ni ra kini oku i ma rua elopiri eri a’di’i ya, azini eri oku ngonini ya, te eri oku onzini.

⁴⁰Yesu nga e’yo omvi ’yo eri tia, Simoni, ma ovu e’yo azini be ’yozu mi tia. Eri kini, ’Ba ’ba Imbapiri, te di mi ’yo.

⁴¹’Ba iri nya ’ba azini ma afa mariru; aluri nya silingi turu towi, aziniri nya silingi kali towi.

⁴²Afani ovule yi dri mari omvizu yorisi, eri nga mari nde ti adi yi dri iri tro. ’Ba iri ’diyi ma eselia a’dini nga ani eri le tunini ya?

⁴³Simoni nga e’yo omvi, nga ’yo ra, Ma ega ’ba erini mari ti adizu eri dri turi’i. Eri ’yo eri tia, Mi li e’yo ’yeke.

⁴⁴Erini i ojaria oku vu, eri ’yo Simoni tia, Mi ndre oku ’diri ra ya? Ma fi jo minia, te mi feni yi ma dri ma pa ojizu ku, te eri osu mindre ma pa dria, ini yi i dribisi.

⁴⁵Mi zini ma ndrutasi ku, te eri’i, engazu mani efiria ’daa, kuni ma pa ndruzaru ku.

⁴⁶Mi efini mizeitu odu ma dria ku, te eri efi ma pa odu aji be arikarirurisi.

⁴⁷E’yo ’disi ma ’yo mi tia, ezata erini ovupi karakarau ’diyi ovu wuzaru, te eri le ma tu; te ’ba yini e’yo onzi wule drinia wereri, eri le were.

⁴⁸Eri di ’yo oku ma tia, E’yo onzi mini ovu di wuzaru.

⁴⁹’Ba ripi eri be nyaka tia ’diyi ’ba e’yo ’yo yi asia, Agu nde e’yo onzi wupi ’diri a’di’i ya?

⁵⁰Eri ’yo oku nde ma tia, A’ita mini pa mi ’bo; mi mvi asi anzuru be.