Read lugbara Luka 8 Bible Online

Luka 8 - lugbara bible

Luka 8

¹Eri nga eca ’dini o’du ’diyi ma vutia, eri nga ad aku amboru ’diyi vusi were ’diyi be, e’yo baru suru Mungunirini oluzu, ’ba erini mudri drini iri ’diyi mu eri be indi,

²oku azini ndra orindi onzi be, kani azo ndu ndu be, erini atile ’diyi pie: Mariamu omvele Magadaleni orindi onzini efuzu eri alia aziriri pi,

³Yoana, Kuza ’ba afa Herodeni ma agei tepiri vile okuri pie, Susana pie, oku azini pie kakau, adripi eri ma aza kopi afa yinisi ’diyi.

⁴’Ba ongulumuru kakau ka yi oku ra, ’ba engapi aku vusi aku vusi emupi eri vu ’diyi be dria, eri ’yo yi tia e’yo o’bezani:

⁵’Ba ori ripiri fu ori erini ri; erini riria, azini nga o’de geri tia, ’ba yi nga otu pasi, aria ’bua ’diyi nga o’du nya ra.

⁶Azini nga o’de kata dria; ori nde enga ra, nga onyu mbele mbele, nyakuni ovule anzuru kurisi.

⁷Azini o’de oci talaa; oci nga zo yi be, nga yi ondri.

⁸Azini nga o’de nyaku onyi beri ma alia, yi nga enga ra, nga efi ’ya turu alu. Erini e’yo ’diri ’yoria, eri oyu uru, ’Ba bile be e’vo erizuri ma eri ra.

⁹’Ba erini imbale ’diyi nga e’yo o’beza ’diri ma efi ngoni yari zi eri tia.

¹⁰Eri ’yo yi tia, Eri ovu fezaru emi dri suru Munguni ma e’yo zizaru ’diyi nizu; te ’ba acepi ’diyi dri yi e’yo ece e’yo o’bezasi, yini ndreria yi ma ndre ku, yini eriria indi yi ma va etini ku.

¹¹E’yo o’beza ’diri eri ’dini: Ori nde eri e’yo Munguni.

¹²’Ba geri ria ’diyi yi ’ba e’yo eripi ’diyi, te vutinia ’ba asu supiri nga emu e’yo pa yi asia, yi kazu a’izu ovuzu pazaru ku.

¹³’Ba kata dria ’diyi yi ’di yi ’ba e’yo eripi a’ipi ayikosi ’diyi, te yi ovu ola kokoru, yi a’i o’du were, te o’du obetani ka eca ra yi ku ra.

¹⁴Ori o’depi oci talaa ’diyi, yi ’ba e’yo eripi ’diyi, te yi ka mu geri yinia, asi otiza pi, lonyi pie, ayiko idri ’dirini pie nga yi ondri ra, awini di efi ’ya de dria ku.

¹⁵Ori o’depi nyaku onyi beri ma alia ’diyi, yi ’ba e’yo eripi asi lokiri kokoru onyirurisi ’diyi, yi bi e’yo nde ci, azini yi efi ’ya asi tezasi.

¹⁶ ’Ba aluni tala ’ipi tini opipi afazusi cini yo, kani ’bapi gbolo etiani yo; te yi eri ’ba afa tala ’bazuri ma dria, ’ba efipi joa ’diyi nga dizani ndre beni.

¹⁷Afa zizaru aluni ngani ovu e’dakokoru ku, afa tani mbaleri aluni ngani ovu nikokoru, fuzu mgboru kuni ku.

¹⁸E’yo ’disi emi ma ndre geri emini e’yo erizuri; ’ba afa beri dri yi nga afa fe, te ’ba afa kokoruri ma dria, yi nga afa erini egale kini eri ovu yi be indiri pa ra.

¹⁹Andri erini pi adripi erini be yi mu eri vu, te econi yini ecazaru eri vu ’ba ongulumuru dri ku.

²⁰’Ba olu eri tia, Mi andri pi mi adripi be yi so pa amve, yi le mi ndre.

²¹Te eri omvi e’yo, nga ’yo yi tia, Ma andri pi ma adripi be yi ’ba e’yo Munguni eripi ’yepi ’diyi.

²²Te eri nga di eca ’dini o’du nde ’dayi ma azinisi, eri fi oguru alia, eri ma ngulupi pi ’ba erini imbale ’diyi be, eri ’yo yi tia, Ama ma zo miri tia ’aa’dasi. Yi nga mu ra,

²³te oguruni aciria miri dria eri ’ba o’du ko. Te oli amboru nga enga li miri ma dria, yi ’ye ga oguru alia tre, yi ovu e’yo ewaru ma alia drileonziru.

²⁴Yi eca eri vu, yi oru eri ra, kini, Ambo la! Ambo la! Ama dri ja ’do fo! Eri nga enga ra, nga ega oli pi ma dria yi ombupi omburi be; yi nga pa so ndi, angu nga ndri tili.

²⁵Eri ’yo yi tia, A’ita emini ngoa ya? Te yi ovu urisi, yi osu tu, yi nga e’yo ’yo yi eselia kini, ’Ba ’diri eri ’ba ngoni ngori’i ya, erini e’yo azizu oli pi ma tia miri be, yini e’yo erini inzizu ’dini?

²⁶Yi eca angu ’ba Gerasenini, i otipi Galili beria.

²⁷Eri ka efu oguruasi erini ecazu yi kuria ’boria, agu azini engapi akua ovupi orindi onzi be eri ma aliari nga dri fu eri be; o’du kakau eri suni bongo ku, ovuni joa ku te eri adri ovu nyadri eselia.

²⁸Eri ka Yesuni ndre ra, eri oyu uru, eri eco i va eri ma drilia, nga ’yo o’duko urusi kini, E’yo mini ma be ngoni ya, Yesu mi Mvi Mungu Uru Turini? Ma matu ’ba mi vu, mi ecandi ma ku,

²⁹A’disiku eri ovu orindi onzi alata kokoruri aziria, kini eri ma fu agu nde ma alia ra. (Te eri bi eri ewu kakau; yi adri eri ombe anziriku pisi emve be eri agei tezu, te eri nga afa eri ombezu ’diyi onyo ra, orindi onzi nga eri dro angu roko dria.)

³⁰Yesu zi eri tia kini, Mi ru a’di’i ya? Eri ’yo ra, Kakau’i; lorindi onzi kakauni file eri ruaarisi.

³¹Orindi onzi nde nga matu ’ba eri vu eri ma azi yi fuzu muzu ’bilea ku.

³²Isu ezo ongulumuru kakau yini iribi nyaria oni ombetia; yi nga matu ’ba eri vu eri ma fe geri yi dri fizu ezo nde ’diyi ma alia ani. Eri nga geri fe yi dri ra.

³³Orindi onzi yi nga efu agu aliarisi ra, nga di fi ezo alia; ezo ongulumuru afi rri i nzuzu angu gulukuru ma aliarisi O’dezu miria, nga odra yisi.

³⁴’Ba yi ocepi ’diyi ka afa i ’yepiri ndre ra, yi nga apa ra, e’yo ’di oluzu aku amboru pi ma alia angu ageinia ’diyi be.

³⁵Yi efu afa i ’yepiri ndrezu, yi eca Yesuvu, yi isu agu re orindi onzini efuzu aleniari erini riria Yesu ma paaleru, bongo be ruaa, asisile be kililiru; yi ovu ani ovu.

³⁶’Ba te e’yo ’di ndrepi yi milesi ’diyi nga e’yo ’ba orindi onzi berini i pazuri olu yi tia.

³⁷’Ba ongulumuru dria angu ’ba Gerasenini ma ageia ’diyi nga zi eri tia, kini eri ma ku yi ra; te uri bi yi tu; eri nga fi oguru alia, mvi ra.

³⁸Te agu te orindi onzini efuzu aleniari ’ba matu eri vu, kini i ma ovu eri be; te eri pe tini mvizu, kini,

³⁹Mi mvi jo minia, mi ece e’yo amboru Munguni ’yele mi beri. Eri mu ra, eri nga di e’yo amboru Yesuni ’yele eri beri olu aku amboru ma alia dria.

⁴⁰Yesu ka emvi ra, ’ba ongulumuru nga eri a’i ayikosi, yi driani ovule eri tele terisi.

⁴¹Mi ndre, agu nga emu ra, runi Yairo’i, eri ’ba amboro pari ’bani yi okuzuria; eri eco i va Yesu ma palaa, nga matu ’ba eri vu kini eri ma emu fi jo inia,

⁴²a’disiku eri ovu zamva erini be alu ilipiliru, eli be dria mudri drini iri, te eri ’ye dra dra. Te erini muria, ’ba ongulumuru omi eri ci ci.

⁴³Oku ovupi azo arini razu ruaniari be eli mudri drini iri, afa erini fepi depi dria ojou dri ti, ruanini ecozu atizu ani ojou aluani dri kuri,

⁴⁴nga emu geri eri ngukuarisi, nga bongo erini ma ti elo; coti ari raza erini nga nzu ra.

⁴⁵Yesu kini, A’di elo ma ruani ya? ’Ba dria ka ga si, Petero nga ’yo ra, Ambo la, ’ba ongulumuru ga mi ageia tre, yi mi rua omi omi!

⁴⁶Te Yesu ’yo ra, ’Ba azini elo ma rua ra; mani nile kini okpo fu ma ruaa ’borisi.

⁴⁷Oku ka ndre ra kini i econi i zizaru ku, eri emu rua yaza be, nga i eco va eri drilia, nga e’yo eti fepi ini eri rua elozuri olu ’ba ongulumuru ma milia dria, e’yo i ruani atizu cotiri be,

⁴⁸Eri ’yo eri tia, Ma zi, a’ita mini pa mi ’bo; mi mu di asi anzuru be.

⁴⁹De erini nga e’yo ’yoria, ’ba azini engapi ’ba amboru pari ’bani yi okuzuriari ma joari nga emu ra, nga ’yo kini, Mi zi dra ’bo; mil ecandi ’Ba ’ba Imbapiri dika ku.

⁵⁰Te Yesuni e’yo nde eriria, omvi e’yo tinia kini, Mi ru ku; mi a’i lu kiri’i, eri nga ovu pazaru ra,

⁵¹Eril ka di eca akua ’bo, eri a’ini ’ba azinini fizu i be ku, pe lu Petero pi, Yohana pie, Yakobo pie, zamva mal ati pi andri be a’dule.

⁵²’Ba driani awu wuria azini lulu garia erisi, eril ’yo fa, Emi wu ku; eri drani ku, te eri o’du ko.

⁵³Yi ogu eri ogu ogu, yini nile kini eri dra te ’borisi.

⁵⁴Te eri bi eri dri, nga eri omve kini, Zamva, mi enga uru.

⁵⁵Orindi erini emvi ra, eri enga perepere uru; eri azi ’ba ma fe afa nyaza eri ’dri.

⁵⁶’Ba eri tipi ’diyi osu tu; te eri azi yi tia kini yi ma olu e’yo ovupi ’yezaru ’diri ’ba aluni ma tia ku.