Read lugbara Luka 9 Bible Online

Luka 9 - lugbara bible

Luka 9

¹Eri omve ’ba mudri drini in ’diyi tualu, nga yi dri okpo pi fe e’yo ecozani be, orindi onzi ma dria azini azo atizu,

²Eri pe yi ti suru Munguniri ma e’yo oluzu, ’ba rua atizu indi.

³Eri ’yo yi tia, Emi ma ’du afa acitani aluni ku, kani kalini, kani juruani, kani enyani, kani silingini; emi ma ’du koti iri iri ku.

⁴Jo dria emini fizu aleniaria emi ma ovu ’daa, emi ma fu ’dasi.

⁵Te ’ba ka emi a’i ku, emini aku ’dari kuria emi ma we irifura emi paari ’daa, e’yo eti nzezu yi ma dria.

⁶Yi ko dri mu aku vusi aku vosi, e’yo bari oluzu, ’ba rua atizu angu drisi dria.

⁷Te opi Herode eri e’yo Yesuni ’yele ’diyi dria ra, eri aba tu e’yo ’ba azinini ’yole kini Yohana enga ’ba draza eselia ’borisi,

⁸te ’ba azini kini Eliya e’da ini, ’ba azini kini nabi ’ba oku drio ’diyi ma azi enga dikani.

⁹Herode nga ’yo ra, Ma li Yohana ma dri ma’i; te ’ba ’diri mani e’yo awa’dinile ’diyi erizu eri ma e’yosiri a’di’i ya? Eri le eri ndre ani.

¹⁰’Ba ti opele ’diyi ka emvi ra, yi olu eri tia e’yo dria yini ’yeleri. Eri nga i nze ’ba ini ’diyi be ’ba ma eseliarisi, nga yi ji aku omvele Betesaida’iria.

¹¹Te ’ba ongulumuru ka ni ra, yi mu vutinia; eri a’i yi ra, nga suru Munguni ma e’yo ’yo yi be, nga vini ’ba rua atiza lepi ’diyi ati ra.

¹²Etu si ka ’ba ambi ’bo, ’ba mudri drini iri ’diyi emu ra, nga ’yo eri tia, Mi pe ’ba ongulumuru ti mvizu, yi ma mu aku ama ageia ’diyi vusi angu ageiniari be, yi ma isu pari lazu, nyaka ndazu yi dri, a’disiku ama ovu ’doa angu roko driaria.

¹³Te eri ’yo yi tia, Emi fe yi dri nyaka nyazu emi’i. Yi ’yo ra, Afa amani ovuzu yi be ’diyi lu kiri mikate towi e’bi iri be a’dule-ama ka mu nyaka jezu ’ba ’doyi dria dri kuria.

¹⁴Te ’ba agupiru ’diyi yi kile alifu towile. Eri nga ’yo ’ba erini imbale ’diyi ma tia, Emi ma fe yi ma ri va eselesi eselesi, ekile ’ba kali towi kali towi.

¹⁵Yi ’ye ’dinile, yi fe yi ri va dria.

¹⁶Eri ’du mikate towi e’bi iri be ’diyi, eri nga i mile enga ’bua, nga asi ndriza a’i drinia, nga nyo fe ’ba erini imbale ’diyi dri ’bazu ’ba ongulumuru ma palaa.

¹⁷Yi nya ra, yi dria nga tra ra. Yi oku jolokoni acepi onyozaru ’diyi evu mudri drini iri.

¹⁸Eri nga eca ’dini, erini Mungu ziria a’dulesi, ’ba erini imbale ’diyi ovu eri be indi; eri zi yi tia kini, ’Ba ongulumuru kini ma a’di’i ya?

¹⁹Yi nga e’yo omvi, ’yo ra, Yohana baputizi fepiri’i; ’ba azini kini, Eliya’i; ’ba azini kini nabi oku drio ’diyi ma azi enga dikani.

²⁰Eri zi yi tia, Te emi’i, emi ’yo ma a’di’i ya? Petero nga e’yo omvi, ’yo kini, Mi Kristo Munguniri’i.

²¹Te eri imba yi okposi, eri azi e’yo yi dri yi ma olu e’yo ’diri ’ba aluni ma tia ku,

²²kini, Mvi ’bani ma isu candi kakau, ’ba ’wara piyi ma ga eri si kuhani amboru ’diyi pie, karani pie, yi ma fu eri ra, o’du nasi eri ma enga ’ba draza ma eselia dika.

²³Eri ’yo yi tia dria, ’Ba azini ka le ma vuti bi, eri ma ga i ma ngulupi si, eri ma ’du pati alaza iniri etu vusi eru vusi, eri ma bi ma vuti ani.

²⁴’Ba dria alu alu ka le idri ini pani, idri eriniri nga dri ja ra; te ’ba dria alu alu ka idri ini ma dri ja e’yo manisini, eri nga eri pa ra.

²⁵Te ’ba ka angu wudrikuru dria isu eri ma orodriru, te eri ma ngulupi ka dri ja ra, kani ovu ndezaru e’yo lizasi ra, e’yo ’diri nga eri aza ko ngoni ngoni ya?

²⁶Te ’ba ka ovu drinzasi masi azini e’yo mani ’yole ’diyisi, Mvi ’bani eri nga ovu drinzasi ’ba nde ’dirisi o’du erini emuzu diza eri ma ngulupi pini, Ata erini pie, malaika alatararu pieri berisi.

²⁷Te ma ’yo emi tia ndi ndi, ’ba pa sopi ’doa ’diyi ma azi indi, yi ngani dra ma aji ’bi ’de ku, de nga yini suru Munguni ndreria kuria.

²⁸Eri nga eca ’dini o’du aro e’yo erini ’yole ’diyi ma vutia, eri ’du Petero pi, Yohana pie, Yakobo pie, nga tu yi be oni dria Mungu zizu.

²⁹Erini Mungu ziria mile erini ma wura nga i oja ndu, bongo erini nga mve emve ndrindri dizaru.

³⁰Mi ndre, ’ba iri yi e’yo ’yo eri be, yi Musa pi Eliya be;

³¹yi e’da diza alia, yi nga asiza erini ngapi i ’yepi i paria Yerusalemuari ma e’yo ’yo.

³²Petero pi, ’ba ovupi eri be ’diyi pie, yi ma mile ovu o’du dri nzizaru, te yi ka di oru ’bo, yi nga diza erini ndre, azini ’ba iri pa sopi eri be ’diyi.

³³Eri nga eca ’dini, yini eri kuria Petero ’yo Yesu tia, Ambo la, onyiru amani ovuzu ’doa; mi fe ama si boroko na, alu mini, alu Musani, alu Eliyani-te eri nini e’yo erini ’yoleri ku.

³⁴Erini e’yo ’diyi ’yoria, iriti nga esi yi dria, endriniri nga yi a’bu ci; yini firia iriti alia uri nga yi bi ra.

³⁵Te o’duko nga efu iriti ma alia kini, ’Ba ’diri eri ma Mvi, mani peleri’i; emi eri e’yo erini!

³⁶O’duko ka de e’yo ’yozu ’bo, yi isu di Yesuni a’dule. Yi adri ciri o’du ’dayisi, yi oluni ’ba aluni tia afa yini ndreleri ma e’yo aluni ku.

³⁷Eri nga eca ’dini, drusi yini esiria oni driarisi va, ’ba ongulumuru kakau nga dri fu eri be.

³⁸Isu agu alu ’ba ongulumuru ma eselia eri nga otre uru kini, ’Ba ’ba Imbapiri, ma matu ’ba mi vu, mi ndre mva mani, eri mva mani alu ilipiliruri’i;

³⁹te mi ndre, orindi adri eri bi, eri nga di otre coti; eri rua nga ya ya, Kafuto emizu eri ma tilia, ka eri rua osi akazaru ’bo, orindi nde nga eri ku ewaru ndo.

⁴⁰Ma ’ba matu ’ba mini imbale ’diyi vu yi ma dro eri amve, te econi yini ku.

⁴¹Yesu nga e’yo omvi, ’yo kini, Emi a’bianzi a’ita kokoru emi ojapi onziru ’diyi la, ma nga ovu emi be ewu ngopi ma ecandizu emisi ya? Mi eji mvi mini ’doa.

⁴²Erini nga emuria, orindi nga eri rua asi ra, nga eri oya okposi indi. Te Yesu nga ega orindi onzi ma dria, nga mva ma rua ad ra, nga eri omvi fe ati dri,

⁴³’Ba dria yi osu tu okpo amboru Mungunirisi, De ’ba dria yini osuria e’yo dria erini ’yele ’diyisi, eri nga ’yo ’ba erini imbale ’diyi ma tia,

⁴⁴Emi fe e’yo ’diyi ma fi emi bilia; yi ’ye Mvi ’bani fe ’ba ma dria.

⁴⁵Te yi nini e’yo ’diri ku, e’yo ’diri ma eti ovu zizaru yi dri, yi ma va eri ku beni; yi ru e’yo ’diri zizu eri tia indi.

⁴⁶ Agata efu yi eselia, kini yi eselia ’ba amboru agapiri a’di’i ya.

⁴⁷Te Yesuni agata gaza yi asiari niria, eri nga mva were ’du, fe pa sozu i ageia,

⁴⁸nga ’yo yi tia, ’Ba azini ka mva ’diri a’i ma rusi, eri di ma a’i, te ’ba ma a’ipiri eri di ’ba ma ti epepiri a’i; a’disiku ’ba ovupi emi ’dria ma eselia werearu turi, ’ba ’diri eri ’ba amboruni.

⁴⁹Yohana nga e’yo omvi, ’yo ra Ambo la, ama ndre ’ba azini erini orindi onzi odroria mi rusi; ama oga eri dri si, erini mi vuti bile ama be kurisi.

⁵⁰Te Yesu ’yo eri tia, Emi oga eri ku; a’disiku ’ba emi dri arupi kuri eri ’ba fipi eminiruri’i.

⁵¹Eri nga eca ’dini, etu yini eri ’duzu ’buari ka ’ye eca ogogo, eri ’ba mile erini okporu muzu drile Yerusalemua.

⁵²Eri nga ojiou ma ti ope muzu i drilia; ’ba nde ’diyi nga mu ra, nga fi aku ’ba Samariaa ’diyinia, yi ma ede ani afa ku ngonde eri dri beni;

⁵³te ’ba aku ndea ’diyi a’ini eri ku, erini i mile ’bale muzu Yerusalemuarisi.

⁵⁴Te ’ba erini imbale Yakobo pi Yohana be ’diyi ka ndre ’dini, yi ’yo ra, Opi, mi le ama ma omve aci ma esi ’buarisi va yi dri jazu ya?

⁵⁵Te eri nga ti co vile, nga ega yi dria.

⁵⁶Yi mu aku azinia.

⁵⁷Yini muria geria, agu alu ngai ’yo eri tia, Ma nga mi vuri bi pari mini muzuria dria.

⁵⁸Te Yesu ’yo tinia, Obalako ovu ’bile yini be, aria ’bua ’diyi ovu jorovu yini be indi; te Mvi ’bani ma pari dri ’bazuri yo.

⁵⁹Eri nga ’yo ’ba aziniri ma tia, Mi bi ma vuti. Te eri ’yo ra, Opi, mi ku ma mu ma atini sa raka.

⁶⁰Te eri nga ’yo eri tia, Mi ku ’ba odraza ma osa ’ba odraza yi ma ngulupini ’diyini; te tiri fu mu suru Munguni ma e’yo olu’i.

⁶¹’Ba aziniri ’yo vini kini, Ma nga mi vuti bi, Opi; te tiri fe ma ma mu ’ba ovupi ma vile joa ’diyi azi raka.

⁶²Te Yesu nga ’yo eri tia, ’Ba i dri ’bapi e’bu tini seleri bipi, i ojapi i vuti nepiri, funi I dri fizu suru Munguniria aluni ku.