Read lugbara Azita Amvizu 1 Bible Online

Azita Amvizu 1 - lugbara bible

Azita Amvizu 1

¹E’yo Musani ’yole Israeli dria ma tia, Yoridani ma tia ’aa’dasi angu roko driaria, Araba Sufi vualeruria, Parani pi ma eselia Tofeli pie, Labani pie, Hazeroti pie, Dizahabu pie ’diyi yi ’di.

²Engazu Horebua acizu geri oni Seiriarisi cazu Kadesibarineaa eri aci ’du o’du mudri drini alu.

³Eri eca ’dini eli kali suri ma mba mudri drini aluri ma o’du alurisi, Musa ’yo anzi Israelini ’diyi ma tia ekile e’yo dria Yehovani fele eri dri azitaru yi dririle,

⁴erini Sihoni opi ’ba Amorini ’diyini ovopi Hesiboniari pi ofuzu Ogi opi Basania ovupi Asitaroti Edreiariari be ’boria.

⁵Musa e’do ndra azita ’diri ma efi ecezu, angu Moabu Yoridani ma tia ’aa’dasiria, ’yozu kini,

⁶Yehova Mungu amaniri ’yo ndra ama tia Horebua kini, Emi ovu oni ’dori ma dria o’du fudri ’bo;

⁷emi oja emi, emi bi aci dri kozu, emi mu angu oniru ’ba Amorini ’diyiniri pia, angu dria ovupi ageinia ’diyi be Araba pi ma alia, angu oniruri pie, angu eleri pie, angu uruleruri pie, angu miri tiari pie, angu ’ba Kanania ’diyiniri pie, Lebanoni pie, cazu kpere yi ara amboria, eri yi ara Ufirate’i.

⁸Mi ne, ma ’ba angu nde emi drilia ’bo; emi fi angu Yehovani azile ndra emi a’bipi Iburahimu pi ma tia, Isaka pie, Yakobo pie, fezu yi dri azini ori yini yi ma vutia ’diyi driri ma alia, eri ’duzu eminiru.

⁹Ewu nderisi ma ’yo ndra emi tia kini, Ma econi emi ’du ji ma’i a’dulesi ku;

¹⁰Yehova Mungu eminiri fe emi ezu ’bo, te mi ne, o’du andru ’dorisi emi ovu karakarau ekile ’bi’bio ’bua ’diyile.

¹¹Yehova Mungu emi a’bipiniri ma fe emi ezuzu dika dika pale alifu aga emini ovuzu curu’dori ra, ma ’ba vini asi ndriza emi ma dria ekile erini azile emi tia ’borile fo!

¹²Ma eco e’yo nziza emini pi ’duzu jizu, e’yo emini teriruri pie, agata gaza emini pie ma’i a’dulesi ngoni ngoni ya?

¹³Emi ma ope emi dri ’ba onduaru, ’ba e’yo vapi tu, ’bani nile ra ’diyi, suruti emini vusi, te ma nga yi o’ba emi drilia ovuzu ’ba emi dri cepi ’diyiru.

¹⁴Te emi omvi ndra ma tia kini, E’yo mini ’yoleri ovu onyiru ama dri; ’yezu ra.

¹⁵’Dini ma o’du ’ba ovupi suruti emini ma drilia, ’ba onduaru ’bani nile tu ’diyi, ma o’ba yi ani emi drilia, ’ba alifu alifu ma drilia, ’ba turu turu ma drilia, ’ba kali towi kali towi ma drilia, ’ba mudri mudri ma drilia, azini ’ba ambo ’diyi, suruti emini vusi.

¹⁶Ewu ndra ’darisi ma azi ’ba e’yo, emini lipi ’diyi tia kini, Emi ma eri e’yo adripi emini ma eselia ’diyi, emi ma li e’yo kililiru ’ba pini i adri be, ani’bo ovupi eri beri be indio

¹⁷Emini e’yo liria, emi ma ope ’ba tope ope ku; emi ma eri ’ba were azini ’ba amboru trotro; emi ma ovu urisi ’ba ma miletisi ku, a’disiku e’yo lizani Yehovani; e’yo azini ka emi ma ondua nde ra, emi ma eji eri ma vu, ma nga eri eri ra.

¹⁸Te ma azi ndra emi tia ewu ndra ’darisi e’yo dria onyiru emi dri ’yezu ’diyi.

¹⁹Ama ko ndra dri Horebuasi muzu angu rokoru amboru uriuriruri ma alesi dria, angu nde emini ndrele ndra emini muria geria angu oniru ’ba Amorini ’diyiniriari, ekile Yehova Mungu amanirini ama azilerile; ama nga di eca Kadesi-barineaa.

²⁰Ma ’yo ndra emi tia kini, Emi eca di angu oniru ’ba Amorini ’diyiniria ’bo, angu Yehova Mungu amanirini fele ama driri’i.

²¹Mi ne, Yehova Mungu miniri ’ba angu nderi mi drilia; mi tu, mi ’du eri miniru, ekile.Yehova Mungu mi a’bipinirini ’yole mi tia ’borile; mi ru ku, mi asi ma oti vini ku.

²²Emi dria alu alu nga ndra esi ma vu ogogo, ’yozu kini, Mi ku ama ma pe ’ba ti ama drilia angu ma orile gazu ama dri, e’yo omvizu ama vu dika geri amani ngazu tuzuri pi ma e’yosi, aku ambo ambo amani ngazu fizu yi ma alia ’diyi be

²³E’yo nderi fe ndra ayiko ma dri i tu, ma ’du ani ’ba emini mudri drini iri, ’ba alu alu suruti emini vusi ’diyi;

²⁴yi nga yi oja tuzu angu oniruria, nga ca a’bu Esikoliniria angu nderi i ma orile gazu.

²⁵Yi oti patiefi kapi angu ndeari ma azi yi dria, esizu yi be va ama vu, yi omvi e’yo ama tia kini, Angu Yehova Mungu amanirini fele ama driri eri angu onyiru.

²⁶Te ti, emi a’ini ndra tuzu ku, emi ga ndra azita Yehova Mungu eminirinisi, emi mbu ndra amve;

²⁷emi ri ndra one hema emini ma alia kini, Yehovani ama ngule onzirisi, eri ofu ama angu Misiriasi ra, ama fezu ’ba Amorini ’diyi ma dria, lama dri jazu.

²⁸Ama tu mu ngole ya? Adripi amani fe ama asini cazu, kini, ’Ba nde ’diyi ovu amboru azini izuru aga ama ra aku ambo ambo ’diyi ovu amboru kali okporu izutili cazu kpere ’bua ’diyi be; azini vini ama ndre ’ba Anakini ma anzipi ’dale indio

²⁹Etu ’dasi ma nga ’yo emi tia, Emi ma ovu urisi ku, emi ma ru yi ku.

³⁰Yehova Mungu emini mupi emi driliari nga a’di ’di emi drini, ekile e’yo dria erini ’yele emi idri emi milia Misiriarile,

³¹azini ekile erini ’yele angu rokoru ma dria, pari mini Yehova Mungu mini ndrezu erini mi ’duzu jizu ekile ’bani adrile i ma mva ’duzu jizurile, pari dri dria emini muzuria kpere emini ecazu pari ’dori ma aliariarile.

³²Te ti, e’yo ’diri ma alia emi a’ini ndra Yehova Mungu eminiri ku,

³³eri’i dri cepi emi drilia geria, pari emini ngazu hema emini asozuri ndazu, geri emini ngazu muzuri ecezu emi dri, ini be acisi, etu be iritisiri’i.

³⁴Te Yehova eri ndra e’yo emini ’yole ’diyi ma o’duko ra, ovu ani aokosi, nga ndra oyo so kini,

³⁵Adada ’ba aluni a’bianzi onzi ’diyi ma eseliari ngani angu onyiru ndra mani oyoni sozu fezu emi a’bipi driri ndre ’de ku,

³⁶pe kiri Kalebu Yefune mvini nga eri ndreni; ma nga angu erini tule i ma pasiri fe eri dri, anzipi be, a’disiku erini Yehovama vuti bile asi alusirisi!

³⁷Yehova ovu vini aokosi ma be emi ma e’yosi, ’yozu kini, Mi indi, mi ngani fi ’dale ku;

³⁸Yosua Nuni mvi, pa sopi mi miliari nga fini; ma omi eri ma asi, a’disiku eri nga fe Israelini angu nde nyazu awurusoruni.

³⁹Anzi nyiri emini, emini ’yole kini yi nga ofu afa opale ombaarile ’diyi, anzi emini e’yo onyiru nipi o’du andru ’dorisi e’yo onzi be ku ’diyi, yi nga fi ’daleni, ma nga angu nde fe yi dri, yi nga ani eri nya yi ma afaru.

⁴⁰Te emi’iruni, emi oja emi aci bizu imuzu angu rokoru ma dria, geri Miri Ekaru vualeruria.

⁴¹Etu nde ’darisi emi omvi ndra ma tia kini, Ama eza ezata Yehova vu ’bo; ama nga tu omba ’ba ra, ekile e’yo dria ndra Yehova Mungu amanirini ama azilerile. Emi agupi dria alu alu osu ndra afa ombani emi ruaa, emi ega ndra tuzu oni driari ma ewa yo.

⁴²Te Yehova nga ’yo ndra ma tia, Mi ’yo yi tia kini, Emi tu ku, emi ’di vini a’di ku, a’disiku mani ovule emi eselia kurisi; ari’ba emini kazu emi dri jazu ku.

⁴³’Dini ma ’yo emi tia, te emi erini ku; emi mbu azita Yehovani ma ruaasi amve, emi ’ye ambosi tuzu oni dria.

⁴⁴’Ba Amorini ovupi oni ’dati ma dria ’diyi efu emi vu a’di ’dizu, odro emi ra ekile anyuefini ’ba odrolerile, obi emi va Seiria cazu kpere Horimaa.

⁴⁵Emi emvi ndra awu wuzu Yehova ma drilia; te Yehova erini emi ma o’duko ku, coni vini bile emi vu ku indio

⁴⁶’Dini emi awi ndra ku Kadesia o’du kakau, o’du emini ndra ovuzu ’dale ’diyi vusi.