Read lugbara Azita Amvizu 10 Bible Online

Azita Amvizu 10 - lugbara bible

Azita Amvizu 10

¹Etu nde ’darisi Yehova ’yo ma tia kini, Mi opa oni iri ekile ndra oko ’dayile, mi etu ma vu oni dria, mi ede vini sanduku patisi indi.

²Te ma nga e’yo ndra sile oni ’bararu oko mini ofule ’dayi ma dria ’diyi si oni ’bararu nde ’diyi ma dria, te mi ma o’ba yi sanduku nderi ma alia.

³’Dini ma ede sanduku asarau patisi, ma opa oni iri ’bararu ndra oko ’dayile, ma tu oni dria oni ’bararu iri ’diyi be ma dria.

⁴Eri nga di azita mudri si oni nde ’diyi ma dria, ekile ndra sile okorile, azita nde Yehovani ndra ’yole emi tia oni dria aci aliasi o’du okuzanirisi ’diyi; Yehova nga di yi fe ma dri.

⁵Ma nga di ma oja sizu oni driasi va, ma nga oni ’diyi o’ba sanduku mani edeleri ma alia; yi ’daa nga ci ekile Yehovani azile ma tiarile.

⁶(Anzi Israelini aci ndra engazu Beeroti Bene-yaakaniasi cazu Mose-raa. Aroni nga dra ’dale, sa eri ’daa indi; te mvi Eleazari nga azi kuhanini nga eri ma pariani.

⁷Engazu ’daarisi yi aci cazu Gudigodaa, azini engazu Gudigodaa cazu Yotibata angu ovupi yi raza nyiri beria.

⁸Ewu nderisi Yehova nga suru Levini ope ndu sanduku aziza Yehovanirini lizu, yini pa sozu Yehova ma drilia azi ngazu eri dri, asi ndriza fezu ’ba dri ru erinisi, ecazu kpere andru.

⁹E’yo ’disi Levi ovuni esele be, kani awuruso be, adripi ini ’diyi be tualu ku; Yehovani awuruso eriniruni, ekile Yehova Mungu minirini ndra ’yole eri tiarile.)

¹⁰Ma awu oni dria o’du kali su etusi inisi, ekile ewu okorisirile, Yehova nga e’yo mani eri ewu ’dirisi indi; Yehova leni ani mi dri jazu ku.

¹¹Yehova nga ’yo ma tia kini, Mi nga, mi ko dri muzu ’ba ’diyi ma drilia, yi ma fi ani angu mani ndra oyo sole yi a’bipi ma tia fezu yi driri ma alia, eri ’duzu ani yiniru.

¹²Te di Israeli la, e’yo Yehova Mungu minirini lele mi vuri ngoni ya, pe lu Yehova Mungu miniri ruzu, acizu geri erini ’diyi ma alia, eri lezu avasi, azi ngazu Yehova Mungu miniri dri mi asi driasi, azini mi orindi driasi,

¹³azita Yehovani ’diyi pi ma ta mbazu, e’yo aziza erini be, mani azile mi dri andru mi; ’yezu ani onyiru ’diyiri’i ku ya?

¹⁴Mi ne, ’bu pi ’bu ’buniri be yi afa Yehova Mungu minirini ’diyi, nyaku afa alenia ’diyi pie dria;

¹⁵te ti, Yehova ovu ndra ayikosi mi a’bipi pi vu yi lezu avasi, pe vini a’bianzi yini yi ma vutia ’diyi indi, bani emi’i, aga suru azini ’diyi dria ra, ekile o’du andru ’dorisirile.

¹⁶E’yo ’disi emi li enyiriko emi asi driliari ’bani agele lilerile, emi ovu ombe mbaza be dika ku.

¹⁷A’disiku Yehova Mungu eminiri eri Mungu Mungu azini ’diyi ma driliarii, Opi opini, Mungu amboru okporu luriuriru, ’ba opepi ku, afa ti razuri a’ipi kuri’i.

¹⁸Eri awuziou pi ma e’yo li kililiru, imvoanzi be, eri ani’bo le avasi, eri dri nyaka pi fezu afa suza be.

¹⁹Ka’dini emi ma le ani’bo ani; a’disiku emi ovu ndra ani’baru angu Misiriaria.

²⁰Mi ma ru Yehova Mungu miniri; mi ma nga azi eri dri, mi ma ebi mi eri be, oyo sozu eri ma rusi indi.

²¹Eri ovu inzita miniri; eri Mungu mini e’yo ambo uriuriru mini ndrele mi milesi ’diyi ’yepi mi driri’i.

²²Mi a’bipi sipi Misiria ’diyi yi ndra ’ba kali aziri; te curu’do Yehova Mungu miniri fe mini ezuzu kakau ekile ’bi’bio ’bua ’diyile.