Read lugbara Azita Amvizu 11 Bible Online

Azita Amvizu 11 - lugbara bible

Azita Amvizu 11

¹E’yo ’disi mi ma le Yehova Mungu miniri avasi, ma mba e’yo erini azileri ma ta, e’yo aziza erini ’diyi pie, e’yo liza erini ’diyi pie, azita erini ’diyi pie ’dani.

²Andru emi ma ni ’di: a’disiku ma ’yoni di emi ma anzi e’yo nde nipi ku ’diyi ma tia ku, anzi nde ’diyi ndreni imbata acoasi Yehova Mungu eminiriniri pi ma e’yo ku, ambo eriniri pie, dri okporu eriniri pie, wu emi ejuzaruri pie,

³eceta erini ’diyi pie, ’yeta erini erini ndra ’yele Misiria Farau opi Misiriari pi ma ruaa angu erini be dria ’diyi;

⁴yi ndreni e’yo erini ’yele ndra asikari ongulumuru Misiria ’diyi ma ruaa, akanya yini pie, gari yini ombani ’diyi pieri ku; erini ndra fezu yi Miri Ekarurini yi a’buzu yini emi vuti droria, erini yi dri jazu ecazu kpere: o’du andru ’dorisi;

⁵ndreni e’yo erini ’yele ndra emi dri roko dria, cazu emini firia pari ’dori ma aliari ku;

⁶ndreni vini e’yo erini ’yele ndra Eliabu Rubeni mvi ma anzipi Datani pi ma ruaa Abiramu beri ku, nyakuni i tile azizu yi okizu pi pi, ori’ba yini ’diyi pie, hema yini ’diyi pie, afa idriru yi ma vuti bipi ’diyi pie dria, Israeli dria ma eselia;

⁷te emi’i, emi ndre ’yeta amboru Yehovani ’yele ndrari dria emi milesi ra.

⁸E’yo ’disi emi ma mba azita mani azile mi dri o’du andru ’dorisiri ma ta dria, emi ma ovu ani okporu, emi ma fi angu emini zozu vunia ’duzu eminiruri ma alia eri ’duzu eminiru beni,

⁹emi ma fe o’du emini ovuzu angu Yehovani oyoni sole emi a’bipi tia fezu yi dri a’bianzi yini be, angu nde lesu pini razu alenia anyu beri ma alia ’diyini yi idrizu izu.

¹⁰Te angu mini ’yezu fizu alenia eri ’duzu miniruri ovuni ekile angu Misiri eminiibizu efuzueri ma aliarile ku, pari ndra mini ori mini rizu, fezu yini i dazu drinia mi pasi, ekile amvu tibinirile;

¹¹te angu emini zozu vunia eri ’duzu eminiruri ovu angu oni pini e’bu beri, eri ozoo ’buari ma yi mvu’i,

¹²eri angu Yehova Mungu minirini tani mbaleniri’i; Yehova Mungu mini ma mile ovu drinia ’dani ’dani, engazu elini e’doria cazu elini i deria.

¹³Te eri nga eca ’dini, emi ka nga emi asi ’ba azita mani azile emi tia o’du andru ’dorisi ’diyi erizu, Yehova Mungu eminiri lezu avasi, azi ngazu eri dri emi asi driasi, azini emi orindi driasi,

¹⁴ka’dini ma nga ozoo emi vile anguriniri fe ewu erini vusi, ozoo okori pi ozoo ewadriniri be, mi ma oku ani anya mini pi, patiefi ma su mini pie, odu mini pie dria.

¹⁵Ma nga vini iribi fe nyamuko miniria anyapa mini dri, mi nga nya, nga tra ani ra.

¹⁶Emi ma te emi ma agei onyiru, e’yo kazu emi asi icizu ku, emi kazu emi ojazu ani kalaa, azi ngazu adrou dri yi inzizu ku,

¹⁷aoko Yehovaniri kazu dizu emi ruaa ku, eri kazu ani ’bu tile opizu ci ’dini ozoo ma ’di ku, nyaku ma ka efi ku, azini emi ma ja dri mbele angu onyiru Yehovani fele emi driri ma alia beni ’dini ku.

¹⁸E’yo ’disi emi ma mba e’yo mani ’yole ’diyi ma ta emi asia orindi eminisi; emi ma ombe yi vini ecetaru emi dri agelia, yi ma ovu vini afa a’diza emi andretiariru.

¹⁹Emi ma imba anzi emini e’yo ’diyisi, e’yo ’diyi eti nzezu mini riria jo mini ma alia, mini aciria geria, mini laria va, azini mini engaria uru indi.

²⁰Mi ma si yi lotile mini ma kalaa irile irile, azini kalitile mini ’diyima ruaa,

²¹’dini o’du emini azini anzi eminini ma idri yi izu angu Yehovani ndra oyo sozu fezu emi a’bipi driri ma alia, ekile o’du ’buni ovuzu nyaku dria’diyile.

²²A’disiku emi ka nga asi ’ba azita mani azile emi tia ’dori ma ta mbazu ’yezu, Yehova Mungu eminiri lezu avasi, acizu geri erini ’diyi ma alia dria, emi ebizu eri be,

²³ka’dini Yehovani nga suru ’diyi dria odro emi driliasi, emi nga suru amboru azini okporu emi agapi ra ’diyi ma angu nya ra.

²⁴Pari dria emi ma pa ageleni tuzu driniari nga ovu eminiru; lokiri emini nga ovu engazu angu rokoa cazu Lebanonia, azini engazu yi ara, ada Yi Ara Ufiratea cazu miri etu ’devualeruria.

²⁵’Ba aluni ngani eco pa sozaru emi drilia ku; Yehova Mungu eminiri nga uri emini pi o’ba ruta emini be angu dria emini ngale otule pasiri ma dria, ekile erini ’yole emi ria ’borile.

²⁶Mi ne, ma asi ndriza pi ’ba emi drilia andru triza be;

²⁷asi ndrizani emi ka nga azita Yehova Mungu eminirini, mani azile emi ria andru ’diyi eri ra,

²⁸te trizani emi ka nga azita Yehova Mungu eminirini eri ku, emi ojazu kalaa geri mani azile emi dri andruri kuzu, adrou emini nile nga ku ’diyi ma vuti bizu.

²⁹Eri nga ecea ’dini, Yehova Mungu miniri ka nga mi ji angu mini ’yezu muzu eri ’duzu eminiruri ma alia, mi nga asi ndriza nderi ’ba oni Gerizimu ma dria, te triza nderi mi nga ’ba oni Ebali ma dria.

³⁰Oni’diyi ovuni Yoridani ma ria ’aa’dasi ku ya, geri etu ’devualeruri ma vutia, angu ’ba Kananini ovupi Arabaa ’diyiniri ma alia, otizaru Giligali be, kumara pari Morea ’diyi ma ageia?

³¹Te emi ’ye Yoridanini zo, muzu fizu angu Yehova Mungu eminirini fele emi driri ma alia, eri ’duzu eminiru; emi nga eri ’du ra, nga ri alenia.

³²Emi ma ne onyiru emi ma ’ye e’yo aziza dria mani o’bale emi drilia andru, e’yo liza ’diyi be ’diyi.