Read lugbara Azita Amvizu 13 Bible Online

Azita Amvizu 13 - lugbara bible

Azita Amvizu 13

¹Nabi ka nga enga mi eselia, kani ’ba orobini adrile obileri’i, te eri ka eceta kani e’yo osutaru ece mi dri,

²te eceta nderi kani e’yo osutaru nderi ka i ’ye tro tro ’dile ra, erini ndra ’yole mi tiari kini, Ama ma bi adrou azini mini nile nga ku ’diyi ma vuti, ama ma nga vini azi yi dri,

³mi ma eri e’yo nabi nderini ku, kani ’ba orobini adrile obile nderini ku; a’disiku Yehova Mungu eminiri emi o’bi ’di, lezu nizu ani kani emi le Yehova Mungu eminiri asi driasi azini orindi driasi yani.

⁴Emi ma aci Yehova Mungu eminiri ma vuti bizu, eri ruzu, azita erini ’diyi ma ta mbazu, emi ma eri o’duko erini, azi ngazu eri dri, emi ebizu eri be ’dani.

⁵Te ma fu nabi nderi ra, kani ’ba orobini adrile obileri’i, a’disiku erini mbuza Yehova Mungu eminiri ma ruaa amveri ma e’yo olule’irisi, Yehova emi ofupi ejipi angu Misiriasi, mi onzepi jo ati’baniasiri’i; te agu nde le mi se kalaa geri Yehova Mungu minirini azile mi dri acizu aleniari kuzu. Mi ma nze e’yo onzi mi eseliasi ’dini,

⁶Mi adri ayia ma mvaruri, kani mi mvi, kani mi zi, kani oku mi asi tiari, kani mi agyi ovupi ekile mi ngulupi ma orindileri ti, ka nga mi bile ewi oyokolosi, kini, Ama ma mu adrou ma azi ngazu, emini nile emi a’bipi be nga ku ’diyi,

⁷suru ovupi emi kalasi kuru ogogo kani ziri’diyi vile adrou, engazu wudrikuru ma kalati aluria cazu wudrikuru ma kalati aziniria;

⁸ka’dini mi ma a’i e’yo erini ’yoleri ku, mi ma eri e’yo erini ku indi, mi mile ma ovu yikisi eri vu ku, mi ma ku eri ya ku, mi ma oci eri ku;

⁹te mi ma fu eri ecekokoru; mi ’ba mi dri eri ma ruaa eri fuzu okoni mi’i, vutinia ’ba dria ma dri.

¹⁰Mi ma o’be eri onisi kpere erini draria kai, a’disiku eri le mi se Yehova Mungu miniri mi ofupi ejipi angu Misiriasi, jo ati’baniasiri kuzu.

¹¹Te Israeli dria yi nga e’yoni eri ra, nga ovu urisi, ngani e’yo onzi awa’dinile ’diri ’ye mi eselia dika aluni ku.

¹²Mi ka aku ambo Yehova Mungu minirini fele mi dri mini ovuzu yi ma alia ’diyi ma azi alu ma e’yo kuza eri, kini,

¹³’Ba tokotokoa ’diyi ma azi fumi eseliasi, se ’ba ovupi aku amboru yini ma alia ’diyi kalaa ’bo, kini, Ama ma mu adrou emini nile nga ku ’diyi ma azi ngazu,

¹⁴mi ma zi di e’yoni, etini ndazu, ozizu asi driasi; te mi ne, ka ovu adaru inzo kokoru, ’ye e’yo ngule onzi ’dinile ’diri mi eselia ra,

¹⁵ka’dini mi ma ofu ’ba ovupi aku ambo nderi ma alia ’diyi seisi ecekokoru, eri dri jazu seisi teketeke, ’ba dria alenia ’diyi pi, anyapa pie dria.

¹⁶Mi ma oku afa opale aku ndea ’diyi dria gbokoa, ma eve aku nderi acisi, afa opale alenia ’diyi be dria, ekile edeta vele pi Yehova Mungu miniri dririle; eri nga ovu abi pariru ’dani, yi ngani eri si dika ku.

¹⁷Afa trile tri dri jazu ’diyi ma aluni ma ebi i mi dri agelia ku; Yehova ma oja i ani adra ini okporuri kuzu, ma ece yiki mi vu, ma ’ba yiki aleruri mi dria, ma fe vini mini ezuzu, ekile erini oyoni sole ndra mi a’bipi ma tiarile,

¹⁸mini de o’duko Yehova Mungu minirini eriria, azita erini mani azile mi dri o’du andru ’dorisi ’diyi ma ta mbazu dria, e’yo ovupi onyiru Yehova Mungu miniri ma miliari ’yezu indi.