Read lugbara Azita Amvizu 14 Bible Online

Azita Amvizu 14 - lugbara bible

Azita Amvizu 14

¹Emi Yehova Mungu eminiri ma anzi; emi ma osi emi rua imvosi ku, emi ma fa vini emi mile ongoro’bi mile ma eseliari ’ba drapi ’bo ’diyi ma e’yosi aluni ku indio

²A’disiku mi suru ovupi alatararu Yehova Mungu miniri driri, te Yehova pe mi aga suru ovupi nyakua ’diyi dria, ovuzu i ma afaru.

³Mi ma nya afa ngule onziri aluni ku.

⁴Anyapa emini ecole nyale ’diyi yi ’di: ti pi, kabilo pi, ndri pi,

⁵yere pi, nyajo pi, eba pi, ndri aseari pi, oborojo pi, loa pi, kabilo oni driari pie.

⁶Anyapa ma eselia, anyapa dria onyofi asipi asi, yi ma pa onyofini yi awazu iri iri, iribi ale amvipi ’diyi, emi eco yi nyazaru ra.

⁷Te ti, anyapa iribi ale amvipi ’diyi ma eselia, kani yi ma pa onyofini yi awazu iri iri ’diyi ma eselia, anyapa emini ecole nyale ku ’diyi yi ’di: ngamia pi, eto pi, ando pie, yi ovu alatarara kokoru emi dri a’disiku yi iribi ale amvi ra ’bo, bani yi ma pa onyofi asini yi ku.

⁸Azini ezoni vini alatara kokoru emi dri a’disiku eri ma onyofi asi ra ’bo, te amvini bani iribi ale ku. Emi ma nya yi ma za ku, ma elo vini yi ma avu ku.

⁹Afa ovupi yia ’diyi ma eselia, emini ecole nyale ra ’diyi yi ’di: e’bi dria ovupi opile be azini ongoro’bo be ’diyi emi eco nyazaru.

¹⁰Afa dria ovupi opile kokoru, azini ongoro’bo kokoru ’diyi emi ma nya ku; yi alatara kokoru emi dri.

¹¹Emi eco aria alatararu ’diyi nyazaru dria.

¹²Aria emini ecole nyale ku ’diyi yi ’di: aji pi, iru pi, aji yia kubukubururi pi,

¹³gu’bere pi, idridria pi, yuku piyi suruti yini vusi,

¹⁴koreke piyi suruti yini vusi,

¹⁵aria okondoruri pi, damanaka pi, yi aria pi, yuku pie sururi yini vusi,

¹⁶asikuu pi, elipidri pi, emaa pie,

¹⁷yiaria aroruaru pi, roke pi, aria e’bi nyapiri pie,

¹⁸kapia pi, otonoko piyi suruti yini vusi, ebaaria pi, ’bi’bia pie.

¹⁹Afa opilebi be acipi valesi ’diyi ovu emi dri alatara kokoru; emi ma nya yi ku.

²⁰Te emi eco aria alatararu ’diyi nyazaru dria.

²¹Emi ma nya afa aluni drapi drasi ceniri leu; te mi ceo eri fezaru ’ba emuza ovupi mi vile akuari dri, eri ma nyani, kani mi ceo eri je ani’bo dri je; a’disiku mi suru alatararu Yehova Mungu miniri dri. Mi ma a’di ndrimva andri ma lesusi ku.

²²Mi ma fe ori dria kapi mi vile amvua eli vusi eli vusiri ma esele mudri ’diyi ma azi aluri ecekokoru.

²³Mi ma nya anya mini pi ma esele mudri ’diyi ma azi aluri Yehova Mungu miniri ma drilia pari erini ngale pele runini adrizu ’daa ’daniria, patiefi ma su miniri pie, odu mini pie, anyapa tile oko ti mini ma eselia azini kabilo mini ma eselia ’diyi pie; mi ma ni ani Yehova Mungu miniri ruzu ’dani beni.

²⁴Te Yehova Mungu miniri ka nga asi ndriza fe mi dri ’boria, geri ka zo mi dri tu aga ra, mini ecozu ani afa nde jizu ku, a’disiku pari Yehova Mungu eminirini pele runini adrizu ’daarini ovule mi be ziririsi,

²⁵ka’dini mi ma je di ani silingi’i, mi ma ombe silingi nde ’diyi, mi ’du mi dria, mi mu pari Yehova Mungu minirini ngale peleria,

²⁶mi ma je afa mi asini leleri silingi nde ’diyisi, kani tini, kani kabiloni, kani patiefi ma suni, kani afa mvuza okari, kani afa mi asini leleri, ka a’dini ti; mi ma nya eri ’daa Yehova Mungu miniri ma drilia, mi ma ovu ayikosi ’ba mi vilei joa ’diyi be tualu.

²⁷Azini vini Leviou ovupi mi vile akuari tani ma avi ku, a’disiku eri ovuni afa ini be, kani awuruso be mile ku.

²⁸Eli nari vusi dria erini asiria, mi ma ofu afa mini ezupi eli nderisi ’diyi ma esele mudri ma azi aluri dria, ma o’ba iriidria kalitilia alialeru;

²⁹te ’ba Levinini ovule afa ini be kaniawuruso bemile kurisi,eri nga emu nyani, nga tra ani, ani’bo pie, imvoa pie, awuziou pie, ovupi kali mini ma alia ’diyi; ’dini Yehova Mungu miniri ma fe ani asi ndriza mi dri azi mini ’yele drisi ’diyi ma alia dria.