Read lugbara Azita Amvizu 15 Bible Online

Azita Amvizu 15 - lugbara bible

Azita Amvizu 15

¹Eli aziriri vusi dria, erini asiria, mi ma adi e’yo ti ra.

²Geri e’yo ti adizuri ’di: ’ba dria mari fepi ’diyi alu alu ma adi mari ini fele i agyi driri ma ti ra; eri ma a’i mari nde omvizu i dri i agyi pi vu i adripi be ku, a’disiku eku e’yo ti adiza Yehovaniri ma e’yo ’bo

³Te mi eco mari a’izaru omvizu mi dri ani’bo vurisi ra; te afa mini ngoni ngori ka ovu mi adri vu, mi dri ma adi eri ma ti ra.

⁴Te ka’dini ti, ’ba alioru ’diyi ngani ovu emi eselia ci ’dini ku (a’disiku Yehovani nga asi ndriza ’ba mi vu ada, anga Yehova Mungu minirini fele mi dri ovuzu miniruri ma alia),

⁵te kiri mi ka Yehova Mungu miniri ma o’duko eri asi driasi ka, asi ’bazu azita mani azile mi dri o’du andrusi ’dori ’yezu dria.

⁶Te Yehova Mungu miniri nga asi ndriza ’ba mi vu, ekile erini azile mi tia ’borile, mi nga afa fe mariru suru kakau dri, te mi ngani mari nya ku; mi nga ovu opiru suru kakau ma drilia, te yi ngani ovu opiru mi drilia ku.

⁷’Ba alioru ka ovu emi ma eselia ci, aku azinia angu Yehova Mungu minirini fele mi driri ma alia, ka ovu adripi mini ’diyi ma azi alu, mi ma ’ba mi asi mbazaru ku, mi dri ma mba mi adri alioruri vu ku,

⁸te mi ma ayu mi dri eri vu ecekokoru, mari fezu eri dri fudri ci afa erini avani taleri ’yezu.

⁹Mi ma ne onyiru egata onzi kazu ovuzu mi asia ku, mini ani ’yozu kini, Ama eca eli aziri; eli e’yo ti adizuri ma tia ogogo ’bo; mi mile kazu ovuzu onzi mi adri alioruri vu ku, mini eri ndezu ani si, afa fezu eri dri aluni ku, erini ani awu wuzu Yehova vu mi ma e’yosi, e’yo nderi kazu ofuzu e’yo onziru mi dri ku.

¹⁰Mi ma fe eri dri ecekokoru, azini mi asi ma ovu candisi mini afa feria eri driria ku; a’disiku e’yo ’dirisi Yehova Mungu miniri nga asi ndriza ’ba mi vu azi mini ngaleri ma alia dria, azini e’yo dria mini dri suzu alenia ’diyi ma alia indio

¹¹Te ’ba alioru ’diyi ngani yi de angu ma aliasi ku; e’yo ’disi ma azi mi dri kini, Mi ma ayu mi dri mi adri vu ada, ’ba mini afa ava tapi ’diyi pie, ’ba mini alioru ’diyi pie dria angu mini ma alia.

¹²Yi ka mi ’bapi Ebraniouru, agupiru kani okururi, fe je mi dri, eri ka azi nga mi dri eli pi pi azia, eli aziririsi mi matru eri, fuzu mi vurisi ra.

¹³Te mi ka nga eri tru fuzu mi vurisi, mi ku eri ma mu dri be pirini ku;

¹⁴mi ma fe afa eri dri asi basi engazu anyapa o’biru mini ma eselia, engazu akuma mini anya cozuri ma dria, azini engazu pari mini zabibuefi ma su nzizuri ma alia indi; mi ma fe eri dri Yehova Mungu minirini asi ndriza fele mi dririle.

¹⁵Mi ma ega ’dani e’yo mini ovuzu ndra ati’boru angu Misiriari, azini e’yo Yehova Mungu minirini mi onzezuniri; e’yo ’disi ma di e’yo ’diri azi mi dri andru.

¹⁶Te eri nga eca ’dini, eri ka nga ’yo mi tia kini, Ma ngani fu mi vusi ku; erini mi lele ’ba mi vile joa ’diyi berisi, erini ovule mi be barisi,

¹⁷ka’dini mi nga aya si ndriri ’du, nga bini lu jotile ruaa, eri nga ani azi nga mi dri ’dani. Mi ma ’ye ati’bo zamvaru miniri vu tro tro ’dinile indio

¹⁸Mini eri truzu fuzu mi vurisi rari ma ovu mi dri e’yo ewaru ku; a’disiku eri nga azi mi dri eli pi pi azia ’bo, orodri fezu mi dri ’ba azi ngapi oyasi iri ’diyile. Te Yehova Mungu miniri nga di asi ndriza ’ba mi vu e’yo mini ’yele ’diyisi dria ra.

¹⁹Anyapa dria tile agoru oko ti mini ma eselia, azini kabilo mini ma eselia ’diyi, mi ma ’ba yi ndu alatararu Yehova Mungu miniri dri; mi ma ’ye azi aluni kojaa ti minini tile; okorisi ku, mi ma li kabilo otile oko kabilo mini ma eselia ’diyi ma ’biko ku.

²⁰Mi ma nya eri, mi’i ’ba mi vile joa ’diyi pie, eli vusi eli vusi pari Yehovani ngale peleria.

²¹Te nyebileko ka ovu ruania, ka aco aco, ka ovu mile kokoru, ka ovu nyebile onzi ngoni ngori be ti, mi ma fe eri edetaru Yehova Mungu miniri dri ku.

²²Mi ma nya eri aku mini ma alia; ’ba alatara kokoruri pi eco eri nyazaru ’ba alatararuri be, ekile ’bani nyajo pi nyale yere berile.

²³Te kiri mi ma nya kuni arini; mi ma osu eri va nyakua yile.