Read lugbara Azita Amvizu 18 Bible Online

Azita Amvizu 18 - lugbara bible

Azita Amvizu 18

¹’Ba Levini kuhaniru, ada suruti Levini dria ’diyi, ma ovu afa yini be, kani awuruso be, Israelile ku; yi ma nya yini edeta ’bani evele Yehova dri ’diyi, awuruso eriniri be.

²Yi ma ovu vini awuruso be yi adripi ma eselia ku; Yehovani awuruso yini, ekile emi ’yole yi tia ’borile.

³Afa fele kuhanini engazu ’ba vu, engazu ’ba edeta fepi ’diyi vuri ’di, ka ovu tini kani kabiloni: yi ma fe kuhani dri wu, siso iri tro, iribijo pie.

⁴Mi ma fe vini eri dri anyadri okori, patiefi ma su okori pie, odu okori pie, kabilo ’biko lile okori pie dria.

⁵A’disiku Yehova Mungu miniri pe eri ’bo, suruti mini ma eselia dria, eri ma so pa ani azi ngazu Yehova ma rusi, eri’i anzipi be ’dani ’dani.

⁶’Ba Levini ka nga efu aku mini Israeli dria ma eselia ’diyi ma azi alu, erini adrizu ovuzuri ma aliasi, eri ka nga emu avasi i ma asi driasi ecazu pari Yehovani ngale peleria,

⁷eri nga di azi nga Yehova Mungu eriniri ma rusi, ekile adripi erini ’ba Levini pa osopi ’daa Yehova ma drilia ’diyi driani ’yelerile.

⁸Yi ma ovu afa be nyazaru tro tro, tro tro, te drinia afa erini isule erini afa i atini kule awitaruri ozilerisiri ma ovu erini ’dani.

⁹Mi ka nga fi angu Yehova ’Mungu minirini fele mi driri ma alia ’bo, e’yo ngule onzi suru ’dayini adrile ’yele ’diyi, mi ma oni yi ’yezu ku.

¹⁰’Ba ma isu emi eselia ’ba i mvini kani i zini fepi agazu aci alesiri pi aluni ku, ’ba acife ndripiri pie, ’ba andri ndripiri pie, ’ba ’ba enapi enatasiri pie, oleou pie,

¹¹’ba ori owipiri pie, ojoou adrou ma o’duko zipiri pie, ojoou pie, ojoou e’yo zipi ’ba draza ma tiari pie dria.

¹²A’disiku ’ba dria alu alu e’yo ’diyi ’yepi ’diyi ovu afa ngule onziriru Yehova dri; azini e’yo ngule onzi ’diyi ma e’yosi Yehovani yi odro emi driliasi ’di.

¹³Mi ma ovu ezata kokoru Mungu miniri ma milia.

¹⁴Te suru mini ngale yi ma angu nyale ’diyi adri yi bile co ’ba andri ndripi ’diyi pi vu ’ba acife ndripi ’diyi be; te mi’i, Yehova Mungu miniri a’ini mini ’yezu ’dinini ku.

¹⁵Yehova Mungu miniri nga mi adripi ma azi alu fe engazu nabiru mi dri mi eselia ekile male--emi ma co bile eri vu-

¹⁶ekile e’yo dria mini a’ile ndra Yehova Mungu miniri dri Horebua, o’du okuzanisi, kini, Mi fe ma ma eri o’duko Yehova Mungu manirini dika ku, ma ma ndre vini aci amboru ’dori dika ku, ma kazu drazu ku, ’dinirile.

¹⁷Yehova nga di ’yo ma tia kini, Yi ’yo e’yo yini ’yole ’diri ’yeke.

¹⁸Ma nga nabi ekile mileri fe engazu yi dri adripi yini ma eselia; ma nga e’yo ’yoza mani ’diyi o’ba eri ma tilia, eri nga e’yo dria mani azile eri dri ’diyi olu yi tia ra.

¹⁹Te eri nga eca ’dini, ’ba azini ka le e’yo mani erini ngale olule ma rusiri eri ku, ma ma ngulupini nga ariotini ofe eri ruaa ma’i.

²⁰Te nabi ripi e’yo olupi i drisi ambosi ma rusiri, nabi nderi nga dra ra.

²¹Mi ka ’yo mi asia kini, Ama nga e’yo Yehovani ’yole kuri ni ngoni ngoni ya?-

²²nabi azini ka e’yo olu Yehova ma rusi, te e’yo erini oluleri ka i ’ye ku, ka eca ’dini ku, ka’dini e’yo nderi ovu e’yo Yehovani ’yole kuri’i; nabi nde olu e’yo nderi i drisi ambosi, mi ’ye erisi urisi ku.