Read lugbara Azita Amvizu 19 Bible Online

Azita Amvizu 19 - lugbara bible

Azita Amvizu 19

¹Yehova Mungu miniri ka nga suru Yehova Mungu minirini ngazu angu yini fezu mi dri ’diyi ma dri ja ’bo, mi ka nga ovu yi ma paria, ovuzu aku yini ma alia azini jo yini ma alia,

²mi ma ope mi dri aku na ovuzu ndu, angu Yehova Mungu minirini fele mi dri ovuzu miniruri ma alia.

³Mi ma ofa geri mi dri, ma awa angu Yehova Mungu minirini fele mi dri ovuzu miniruri ma esele na, ’dini ’ba ’ba ’dipi ’diyi dria ma eco ani apazaru yi ma alia beni.

⁴’Ba ’ba ’dipi, ecopi apapi alenia i pazuri ma e’yo ’Ba agyini fupi aka, eri ngupi onzi okoni kuri-

⁵ekile ’ba ka mu ocea i agyi be eja gazu ogara be dria, erini pati garia ogarasi ogara tu i abe siarisi ra, ’de agyi ma ruaa, dra ani ra-eri ma apa aku ’diyi ma azi alua i pazu;

⁶’ba avu ofepiri, de eri ma asini draria adrasi, kazu agu te ’ba fupi ’diri ma vuti drozu eri isuzu, gerini ovule izururisi, kazu eri fuzu kai ku, de te e’yo erini drazuni yo, emi eri ngule onzi i asia okoni kurisi.

⁷E’yo ’disi ma azi mi dri kini, Mi ma ope mi dri aku na ’diyi ovuzu ndu.

⁸Te Yehova Mungu miniri ka nga angu mini ere walaru, ekile ndra erini oyoni sole mi a’bipi ma tiarile, eri ka nga angu dria erini ndra azile fezu mi a’bipi driri fe mi dri-

⁹mi ka azita mani azile mi dri o’du andrusi ’dori ma ta mba dria eri ’yezu, Yehova Mungu miniri lezu avasi, acizu ’dani geri erini ’diyi ma alia-ka’dini mi ma o’ba aku azini na aku teka na ’diyi be,

¹⁰yi kazu ’ba e’yo kokoru ’diyi ma ari adazu angu mini Yehova Mungu minirini fele mi dri awurusoruri ma alia ku, ari kazu mvizu ani mi dria ku.

¹¹Te ’ba azini ka i agyini ngu onzi, eri mbazu ndindiru, ka enga drinia eri cozu, erini drazu kai, ’ba nderi ka apa aku ’diyi ma azi alua,

¹²ka’dini ’ba ’wara aku erinia ’diyi ma pe ’ba ti eri ejizu engazu ’daarisi ra, ma fe eri ’ba avu ofepiri dri, eri ma dra ra.

¹³Mi ’ba mile ba eri vu ku, mi ma nze ’ba e’yo kokoru ’diyi ma ari Israeli ma eseliasi, e’yo ma ovu ani mi be onyiru.

¹⁴Awuruso mini ngale isule angu Yehova Mungu minirini fele mi dri ovuzu miniru ma aliaria, mi ma nze ’ba mi aku ejeleari ma alo angu awazu ’ba oku ’diyini dileri aluni ku.

¹⁵E’yo eti nzeza ’ba alunini nzeleri econi ’ba azini ndezaru ku ezata erini ma alia, kani e’yo onzi erini ma alia ku, e’yo onzi erini ’yeleri ka ovu ngoni ti; e’yo ma so pa ’ba iri kani ’ba na ’diyini e’yo eti nzelerisi.

¹⁶’Ba e’yo eti nzepi inzosiri ka enga asu suzu ’ba azini ma ruaa e’yo onzi ma e’yosi,

¹⁷ka’dini ’ba e’yo be yi eselia ’diyi ma so pa iri tro Yehova ma drilia, kuhani pi ma milia ’ba e’yo lipi ewu nderisi ’diyi be;

¹⁸’ba e’yo lipi ’diyi ma nda e’yoni asi driasi, te mi ndre, ’ba e’yo eti nzepiri ka ovu ’ba e’yo eti nzepi inzosiri, ka e’yo eti nze inzoru i adri ma ruaa,

¹⁹ka’dini emi ma ’ye eri ekile te erini egale ’yele i adri vurile; mi ma nze e’yo onzi mi eseliasi ’dini.

²⁰’Dini ’ba acepi ’diyi nga eri ra, nga ovu urisi, ma ’ye e’yo onzi ’dinile ’diri mi eselia dika ku beni.

²¹Mi ma ’ba mile ba vunia ku; idri pi ma obi dri idri be, mile pi mile be, si pi si be, dri pi dri be, pa pi pa be.