Read lugbara Azita Amvizu 22 Bible Online

Azita Amvizu 22 - lugbara bible

Azita Amvizu 22

¹Mi ka mi adri ma ti pi ndre kabilo be, de avi avi, mi ma zi mi ekile mi ndre yi kule ku; mi ma ece yi drozu mi adri vu ku.

²Te mi adri ka ovu mi be ogogo ku, kani mi nini eri ku, mi ji di eri emi vile, mi vile joa, eri ma ovu mi be ’daa kpere mi adrini eri ndaria; mi nga di eri omvi eri dri.

³Mi ma ’ye vini ’dini akanya erinisi; mi ma ’ye ’dini bongo erinisi; mi ma ’ye ’dini afa avipi mi adripi dri erini avile, mini isule ’diyisi dria; mi ma zi mi ekile mi ndre yi kule ku.

⁴Mi ka mi adri ma akanya ne kani ti erini, de e’de va geri tia, mi ma zi mi ekile mi ndre yi kule ku; mi ma ece ku eri ma aza kozu yi engazu dika.

⁵Oku ma su afa suza agupiniri i ruaa ku, agupi ma su vini bongo suza okuniri i ruaa ku indi; a’disiku ’ba e’yo ’dinile ’diyi ’yepiri ovu afa Yehova Mungu minirini ngule onziri’i.

⁶Mi ka aria jorovu isu mi drilia geria, patisia kani nyakua, anzi be kani gbe be alenia, azini andri avu anzi dria kani gbe ma dria, mi ma omvu andri pi tualu anzi be ku;

⁷mi ma ku andrini mu ra, te mi eco anzini wuzaru mini ra; ’dini e’yo mini ma ovu onyiru, azini ewu mini ovuzu idriruri ma ovu izuru.

⁸Mi ka jo o’diru si, mi ma bi abi jo dri mini ma kalaasi, ’ba kazu e’dezu driniasi, ari omvizu jo mini ma dria ’dini ku.

⁹Mi ma ri ori suruti iri amvu zabibuni miniri ma alia ku, ’ba kazu afa kapi ’diyi opazu dria ku, ori mini rileri pi efi kaza zabibuni be iri tro.

¹⁰Mi ma fe ti pi akanya be ma se e’bu amvu ’yazu tualu ku.

¹¹Mi ma su bongo cale osazaru kabilo ’biko pisi pamba beri ku.

¹²Mi ede bongo mini mi rua a’buzuri ma kalati su ’diyi ma ti ma ovu yaliyaliru.

¹³’Ba azini ka oku je, ka fi eri vu, te vutinia ka eri ngu onzi,

¹⁴ka e’yo drinzaru ’yo eri ruaa, ajini dizu onzi, ’yozu kini, Ma ’du oku ’dori ra, te mani firia vunia ma isuni e’yo ecepi eri isuni nga yi agupi azini be ku, ’diniri ku.

¹⁵Aliria ma ati pi andri be ma o’du afa ecepi aliria ’diri pi isuni nga yi agupi azini be kuri, ma ofu yi ji ’ba ’wara aku ndea ’diyi vu kalitilea.

¹⁶Aliria ma atini nga ’yo ’ba ’wara ’diyi ma tia kini, Ma fe ndra ma zini agupi ’dori dri okuru, te ngu eri onzi;

¹⁷te mi ne, eri ’yo e’yo drinzaru eri ruaa, ’yozu kini, Ma isuni mi zi ma ruaa e’yo ecepi eri isuni nga yi agupi azini be kuri ku. Te di, afa ecepi ma zi isuni nga yi agupi azini be kuri yi ’di. Yi nga di bongo nderi aja ’ba ’wara aku ndea ’diyi ma milia.

¹⁸Te ’ba ’wara aku ndea ’diyi ma ’du agu ’diri eri imbazu kalisi;

¹⁹ma li eri ma dria sekeli dahaburu turu alu, fezu aliria ma ati dri, erini aliria Israeliniri ma aji dilerisi; eri ma ovu oku eriniru ’dani; eri econi eri drozaru ku kpere erini draria.

²⁰Te e’yo nderi ka ovu adaru, ka e’yo ecepi eri isuni nga yi agupi azini be kuri isu aliria ma ruaa ku ada,

²¹ka’dini ma ofu di aliria nderi i ati ma jotilea, azini agupi aku erinia ’diyi ma o’be eri onisi kai, a’disiku erini e’yo azazaru ’yele Israeli eselia, erini ofule awuouru i ati ma joarisi; mi ma nze e’yo onzi mi eseliarisi ’dini.

²²Yi ka agu isu erini laria oku ’ba azininisi, ma odra iri tro ra, agu lapi oku nderisiri pi oku nde be; mi ma nze e’yo onzi Israeli eseliasi ’dini.

²³’Ba ka zamva aliriaru aguni e’dole jele ’bori isu aku amboru alia, ka la erisi,

²⁴ka’dini emi ma eji yi iri tro aku nde ma kalitilea, emi ma o’be yi onisi kai ra, aliria nderi de vini eri aku amboru ma alia ti, erini lulu gale kurisi, azini agupi nderi erini drinza fele i agyi ma oku dririsi; mi ma nze e’yo onzi emi eseliarisi ’dini.

²⁵Te ’ba ka aliria aguni e’dole jele ’bori isu asea, eri ka eri bi okposi, ka la erisi, ka’dini ma fu kiri agu nde lapi erisiri’i.

²⁶Te mi ma ’ye aliria nderi aluni ku; te aliria nderi ma ruaa e’yo onzi erini drazuni yo, te e’yo ’diri si ekile aguni engazu i agyi ruaa eri ’dizu kairile;

²⁷a’disiku eri isu eri asea, aliria ’bani e’dole jeleri oga lulu ti, ’ba eri papini yo.

²⁸Agu azini ka zamva nga i isupi agupi be ku, ’bani e’dole nga jele kuri isu, ka eri bi ra, ka la erisi, ’ba azini ka yi isu ra,

²⁹ka’dini agu lapi erisiri ma fe sekeli dahaburu kali towi zamva nderi ma ati dri, eri nga ovu oku eriniru, erini drinza fele eri dri rarisi; eri econi eri drozaru ku kpere erini draria.

³⁰Agu ma ’du i ma ati ma oku iniru ku, ma otru i ati ma afa pililiru ku.