Read lugbara Azita Amvizu 23 Bible Online

Azita Amvizu 23 - lugbara bible

Azita Amvizu 23

¹’Ba otufini drale rari, kani ’ba ageleni lile pi rari, ma fi ’ba ongulumuru Yehovani ’diyi ma eselia ku.

²Alimva ma fi ongulumu Yehovani ma eselia ku; cazu kpere a’bianzi yini a’bianzi mudri ’diyi ma vutia ’diyi vu, ’ba erini aluni ma fi ongulumu Yehovani ma eselia ku.

³’Ba Amonini kani ’ba Moabuni, ma fi ongulumu Yehovani ma eselia ku; cazu kpere a’bianzi yini a’bianzi mudri ’diyi ma vutia ’diyi vu, ’ba yini aluni ma fi ’ba ongulumuru Yehovani ma eselia ku ’dani ’dani;

⁴a’disiku yini ndra efule enya pie yi pie emi etozu geria, emini efuria Misiriasiria kurisi, azini vini yini Balamu Beori mvi, ’ba Petori Mesopotamiariari omvele oyasi mi trizurisi.

⁵Te ti, Yehova Mungu miniri a’ini ndra Balamu ma o’duko ’ku; te Yehova Mungu miniri oja ndra trita nde ovuzu mi dri asi ndrizaru, Yehova Mungu minirini i mi lele avasirisi.

⁶Mi ma nda asi anzuru yini kani drileba yini ku ewu mini ovuzu idrirurisi dria.

⁷Mi ma ngu Edomuouni onzi ku, te eri mi adri’i; mi ma ngu vini Misiriouni onzi ku, mi ndra ani’boru eri ma angua.

⁸A’bianzi otile yi dri a’bianzi na ’diyi ma vutia ’diyi eco fizaru ongulumu Yehovani ma eselia.

⁹Mi ka fu mu a’di ’dizu mi ari’ba be, ovuzu pari asikarini hema asozuria, mi ma mba mi ma ta afa onzisi dria.

¹⁰’Ba azini emi eselia ka ovu alatara kokoru afa efupi eri ma ruaa inisirisi, eri ma fu pari ’bani hema asozuriasi amve, eri ma fi pari ’bani hema asozuria ku;

¹¹te ondre ka eca ra, eri ma oji i rua yisi, te etu ka ’de ’bo eri eco fizaru pari ’bani hema asozuria ndo.

¹²Mi ma ovu pari be ci pari ’bani hema asozuri ma tia amveleru, mi ma fu vunia;

¹³mi ma ovu kafua be tualu afa mini ombani ’diyi be; eri nga ovu ’dini, mi ka nga mi aza ko amve ’daa, mi ma nga ’bile ga ani, ma oja mi dika nyaku kuzu afa efupi mi ruaari ma dria ci.

¹⁴A’disiku Yehova Mungu miniri aci pari mini hema asozuri ma eseliasi, mi pazu, ari’ba mini ofezu mi dri mi drilia; e’yo ’disi pari mini hema asozuri ma ovu alatararu, eri kazu e’yo ondiru ndrezu emi eselia erini ani i ojazu mi kuzu, ’dini ku.

¹⁵Ati’bo i ma opi kupi, apapi mi vuri, mi ma omvi eri opi erini vu dika ku;

¹⁶eri ma ovu mi be, mi eselia, pari erini pele aku mini ’diyi ma eseliaria, pari ovupi eri ma milia baria; mi ma inza eri ku.

¹⁷Israeli ezopi ma eselia, ’ba ali o’bapiri ma ovu ku, azini Israeli anzipi ma eselia, agupi lapi agupi azinisiri ma ovu ku indio

¹⁸Mi ma eji silingi alini, kani oce ma oya, Yehova Mungu miniri ma joa afa mini ndra oyo sozu aniri ofezu’i ku; a’disiku yi iri tro afa Yehova Mungu minirini ngule onzi ’diyi.

¹⁹Mi ma fe mi adri dri mari, ngazu omvizu ereni be mi dri drinia ku, kani silingini, kani nyakaruni, kani a’di afani ’bani adrile fele mariru ngazu omvizu ereni be driniari.

²⁰Mi eco mari fezu ani’bo dri ereni isuzu drinia ra, te mi adri dri mi econi mari fezu ereni isuzu drinia ku; ’dini Yehova Mungu miniri ma ’ba asi ndriza mi vu azi mini ngaleri ma alia dria, angu mini ngazu fizu alenia eri ’duzu miniruri ma alia.

²¹Mi ka oyo so Yehova Mungu miniri ma tia, mi ma ovu inzaouru afa ’nde ma fezasi ku; a’disiku Yehova Mungu miniri nga eri a’i mi vu ra lada; ’diniri nga ovu mini onziru.

²²Te mi ka ndra oyo so ku, ngani ovu mini onziru ku.

²³Mi ’ba mi asi e’yo efupi mi tilia ’diyi ’yezu, ekile mini oyo sole Yehova Mungu miniri dri, eri afa mini azile mi tisi ’fele ceniri’i.

²⁴Mi ka fi mi agyi ma amvu zabibuniri ma alia, mi eco zabibu mbezaru mini lelerile mini trazu, te mi ti yi ’ba afazu mini ma alia ku.

²⁵Mi ka fi anya mi agyi ma amvuari ma alia ra, mi eco sizaru mi drisi, te mi ma ’ba eli mi agyi ma anya lozu ku.