Read lugbara Azita Amvizu 24 Bible Online

Azita Amvizu 24 - lugbara bible

Azita Amvizu 24

¹’Ba azini ka oku je, ka eri eji ’bo, eri nga ovu ’dini, oku nde ka asi ndriza isu eri ma milia ku, erini e’yo dri fupi kuri isule oku nderi ma aliarisi, eri ma si eri dri waraga esele cozuri, ma fe eri dri, ma fe geri eri dri aku erini kuzu.

²Eri ka aku agu nderini ku ’bo, eri eco muzaru ovuzu agupi azinia ra.

³Agupi vileri ka eri ngu onzi, ka waraga esele cozuri si eri dri, fe eri dri, geri fezu eri dri aku erini kuzu, kani agupi vile eri jepi okururi ka dra ra,

⁴ka’dini agupi erini oko geri fepi eri dri muzuri econi eri omvi i vu okuru dika ku, yini eri ezale ’bori ma vutia; a’disiku e’yo ’dinileri ovu e’yo Yehovani ngule onziri’i, mi ma fe angu Yehova Mungu minirini fele mi dri awurusoruri ma ovu e’yo onzi be ku.

⁵Agupi azini ka oku eji o’diru, eri ma fu mu asikari ongulumuru ’diyi be ku, ’ba ma fe azi azini eri dri ku indi; eri ma ovu e’yo ’yaasi i vile lakua eli alu pi, ayiko fezu oku erini jeleri dri.

⁶’Ba aluni ma ’du oniandri kani onimva togboru ku; a’disiku ’diniri ’ba ma idri ’duzu togboru.

⁷’Ba ka ’ba azini isu erini adripi erini Israeliruri oguria, ka ’ye eri vu ati’bole, kani ka fe eri je ra, oguou nderi ma dra kai; mi ma nze e’yo onzi mi eseliasi ’dini,

⁸Ofu ka mi nya ra, mi mba mi ta, mi ’ba mi asi e’yo dria ’ba Levini kuhaniru ’diyini imbale mi tia ’diyi ’yezu; ekile mani azile yi tiarile, mi ma ’ba mi asi ’ye ’dinile.

⁹Emi ma ega e’yo Yehova Mungu minirini ’yele Miriamu vu geria emini efuria Misiriasiriari.

¹⁰Mi ka afa fe ’ba mi jo ejeleari dri mariru, ka ovu mari suruti ngoni ngori ti, mi ma fi jo erini ma alia afa erini ’duzu togboru ku.

¹¹Mi ma so pa amve, te ’ba mini afa fezu eri dri mariruri ma eji afa togboru nderi mi vu amve.

¹²Eri ka ovu alioni, mi ma la de afa togboru eriniri mi vu ci, ’dini ku;

¹³etuni ’derialeru mi ma omvi afa togboru eri dri ecekokoru, eri ma la afa suza inirisi, ma fe ani asi ndriza mi dri beni; ’diri nga ovu mi dri e’yo kililiru Yehova Mungu miniri ma milia.

¹⁴Mi ma inza ati’bo azi ngapi sentesi ovupi alioru afa kokoruri ku, ka tro mi adripiyi, kani ani’ba mi vile angua aku mini ma alia ’diyi ma azi ti;

¹⁵mi ma fe oya erini eri dri o’dunirisi ra, de nga etu ’deni ku (a’disiku eri alioni, eri ’ba i asi drinia ra); eri kazu muzu wuzu Yehova tia mi ma e’yosi ku, e’yoni kazu ovuzu mi dria e’yo onziru ku.

¹⁶Ma ofu atayi anzi ma e’yosi ku, ma ofu vini anziyi yi ma atapi ma e’yosi ku indi; ma ofu ’ba dria alu alu e’yo onzi yi ngulupinisi.

¹⁷Mi ma li ani’ba pi ma e’yo imvoanzi be onzi ku, ma ’du bongo awuziouni togboru ku;

¹⁸te mi ma ega ’dani e’yo mini ovuzu ndra ati’boru Misiria, Yehova Mungu minirini mi onzeze ’daarisiri; e’yo ’disi ma azi mi e’yo ’diri ’yezu.

¹⁹Mini afa kapi amvu miniari loria, mi ka anya ombeza alu ku amvua tavisi, mi ma atri dri eri e’duzu ku; eri ma ovu ani’ba piyi dri, imvoanzi pie, awuziou pie; Yehova Mungu miniri ma fe ani ali ndriza mi dri azi mini ’yele drisi ’diyi ma alia dria.

²⁰Mi ka mizeitu efi kapi pati mini sia ’diyi co, mi ma atri dri acepi arakalania ’diyi amvi dika ku; eri ma ovu ani’ba piyi dri, imvoanzi pie, awuziou pie.

²¹Mi ka zabibu efi amvu mini zabibuniria ’diyi oti, mi ma ti eri dika paleko iri ku; eri ma ovu ani’ba piyi dri, imvoanzi pie, awuziou pie.

²²Mi ma ega ’dani e’yo mini ovuzu ndra ati’boru angu Misiriari; e’yo ’disi ma azi mi e’yo ’diri ’yezu.