Read lugbara Azita Amvizu 26 Bible Online

Azita Amvizu 26 - lugbara bible

Azita Amvizu 26

¹Eri nga eca ’dini, mi ka fi angu Yehova Mungu minirini fele mi dri awurusoruri ma alia, ka: eri nya miniru ovuzu alenia ’bo, i

²mi ma ’du afa kaza nyakuni kale, mini okule angu mini Yehova Mungu minirini fele mi driri ma alia ’diyi dria ma azi kapi drile okori, mi ma ’ba eri abaka ma alia, ma mu pari Yehova Mungu minirini ngale pele fezu i ma runi ovuzu ’daaria.

³Mi ma mu kuhani ngapi ovupi o’du nde ’dayisiri vu, ma ’yo eri tia kini, Ma e’yo ece o’du andru ’dorisi Yehova Mungu miniri ma tia, kini ma efi angu Yehovani ndra oyoni sozu ama a’bipi tia fezu ama driri ma alia di ’bo.

⁴Kuhanini nga di abaka a’i mi driarisi, eri ’bazu va pari edeta edezu Yehova Mungu minirini ma drilia.

⁵Mi ma omvi e’yo Yehova Mungu miniri ma drilia kini, Ma a’bini ’ba Suriani ndra ’yepi avipi rari; eri si ndra Misiria, ovu ’daa, yi lamiru, yi ma kalafe ga; ’dale eri ofu sururu, ambo, okpo be, ’ba be karakarau.

⁶Te ’ba Misiria ’diyi ’ye ndra ama onzi, inza ama, ’ba azi ati’boni okporu ama dria.

⁷Ama nga di owu Yehova Mungu ama a’bipiniri ma tia, Yehova nga di o’duko amani eri ra, nga inzata amani pi ne azi ati’boni okporu amani ngaleri pie, ecandiza yini ama dri otuzu vari pie;

⁸Yehova ofu ani ama Misiriasi dri okporurisi azini wu ejuzarurisi, e’yo uriuriru turi pisi, eceta pie, tali osutaru ’diyi pie;

⁹eri ofi ndra ama pari ’dori ma alia, fe ama dri angu ’dori, angu lesu pini gazu alenia anyuoso be treri’i.

¹⁰Te curu’do, mi ne, Yehova la, ma eji afa nyaku mini fele ma dririni kale drile okori ’do. Mi ma ’ba eri va Yehova Mungu miniri ma drilia, mi ma inzi di Yehova Mungu miniri ma drilia;

¹¹mi ma ovu ayikosi afa onyiru dria Yehova Mungu minirini fele emi dri ori’ba mini be ’bo ’diyisi, mi’i, ’ba Levini pie, ani’bo ovupi mi eseliari pie dria.

¹²Mi ka nga de afa kaza mini ma esele mudri ma azi aluri fezu eli narisi ’boria (te eli nderi eri ’bani afa ma esele mudri ma azi aluri fezuri’i), mi ma fe di eri ’ba Levini pi dri, ani’bo pie, imvoanzi pie, awuziou pie, yi ma nya ani aku mini ’diyi ma alia yini trazu beni.

¹³Mi ma ’yo Yehova Mungu miniri ma drilia kini, Ma ofu afa alatararu ’diyi ma vile joarisi ra, ma fe vini yi ’ba Levini pi dri, ani’bo pie, imvoanzi pie, awuziou pie ’bo, azita dria mini azile ma driri vusi; ma ezani azita mini azile ma dri ’diyi ma azi aluni ku, ma dri avini vini yisi ku;

¹⁴ma nyani afa nde ’diyi ma azi mani awu wuria dra tia ku, ma ’duni afa ’diyi ma azi pari aziniria mani ovuria alatara kokoruria ku, ma feni vini afa ’diyi ma azi ’ba drapi ’borisi ku; ma eri Yehova Mungu maniri ma ti ra, ma ’ye ekile e’yo dria mini azile ma tia ’diyile ’bo,

¹⁵Mi lu ’bu pari alatararu mini ovuzuriarisi va, mi fe asi ndriza ’ba mini Israelini ’diyi pi dri, nyaku mini fele ama dri ’bori be, ekile mini oyoni sole ama a’bipi tiarile, angu lesu pini gazu alenia anyuoso be treri’i.

¹⁶O’du andru ’dorisi Yehova Mungu mini azi mi dri e’yo aziza ’diyi pi ’yezu e’yo liza ’diyi be; e’yo ’disi mi ma mba yi ma ta yi ’yezu mi asi driasi azini mi orindi driasi.

¹⁷O’du andru ’dorisi mi e’da Yehovani Mungu miniru ’bo, azini mi a’i kini mi ma aci geri erini ’diyi ma alia, e’yo aziza erini ’diyi pi ma ta mbazu azita erini pie, e’yo liza erini ’diyi pie, azini mi ma eri eri ma ti indi;

¹⁸azini vini o’du andru ’dorisi Yehova e’da mi ovu suru ndu i ma ngulupiniriru, ekile erini azile mi tiarile, azini kini mi ma mba azita ini dria ’diyi ma ta,

¹⁹azini kini eri nga mi ’ba uru aga suru azini erini o’bale ’diyi dria ra ru inzizaruri pisi, ru kuza pie, inzita pie, mi ma ovu ani suru alatararu Yehova Mungu miniri dri, ekile erini ’yole ’borile.