Read lugbara Azita Amvizu 27 Bible Online

Azita Amvizu 27 - lugbara bible

Azita Amvizu 27

¹Musa pi ’ba ’wara Israelini ’diyi be nga di e’yo azi ’ba tia kini, Emi ma mba azita mani azile emi tia o’du andru ’dorisiri ma ta dria.

²Eri nga ovu ’dini, o’du emini ngazu Yoridanini zozu cazu angu Yehova Mungu minirini fele mi dririarisi, mi ma odro oni ambo ambo ’diyi, ma e’bura yi ma rua ivisi;

³mini zoria ’boria mi ma si azita ’diri ma e’yo dria yi ma ruaa, mi ma fi ani angu Yehova Mungu minirini fele mi driri ma alia, angu lesu pini gazu alenia anyuoso be treri’i, ekile Yehova Mungu mi a’bipinirini azile mi tia ’borile.

⁴Eri nga ovu ’dini, emi ka Yoridanini zo ’bo, emi ma odro oni nde mani yi ma e’yo azile mi tia andru ’diyi oni Ebalia, mi ma e’bura yi ma rua ivisi.

⁵Mi ma si pari edeta edezu Yehova Mungu miniri dri ’daa, pari edeta edezu sile onisiri’i; mi ma ’du afa ayaru azi ngazu yi ma ruaa aluni ku.

⁶Mi ma si pari edeta edezu Yehova Mungu miniri dri oni yi ma rua opale ku ’diyisi; mi ma ede di edeta vezaru drinia Yehova Mungu miniri dri;

⁷mi ma ede vini edeta asi anzuruni ’diyi, nyazu ’daa; mi ma ovu ayikosi Yehova Mungu miniri ma drilia.

⁸Mi ma si azita ’dori ma e’yo dria oni nde ’diyi ma ruaa kililiru, ma e’da ce.

⁹Musa pi ’ba Levini kuhaniru ’diyi be nga ’yo Israeli dria ma tia kini, Emi ovu ciri, emi eri fo, emi Israeli la: o’du andru ’dorisi mi ofu Yehova Mungu miniri ma ’baru ’bo.

¹⁰E’yo ’disi mi ma eri Yehova Mungu miniri ma ti, azita erini piyi ’yezu e’yo aziza erini ’diyi be, mani azile mi dri o’du andru ’dorisi ’diyi.

¹¹Musa nga e’yo azi ’ba nde ma tia o’du nderisi kini,

¹²’Ba ’diyi nga pa oso oni Gerizimu ma dria asi ndriza fezu ’ba dri, emini Yoridanini zozu ’boria: Simeoni pi, Levi pi, Yuda pi, Isakari pi, Yusufu pi, Benyamini pie.

¹³Te ’doyi nga pa oso oni Ebali ma dria ’ba otrizu: Rubeni pi, Gadi pi, Aseri pi, Zebuluni pi, Dani pi, Nafutali pie.

¹⁴’Ba Levini nga e’yo omvi, ’yozu ’ba Israelini ’diyi ma tia dria o’duko urusi kini:

¹⁵’Ba wura opale opari edepi, kani wura edele aya rap acisirisi, afa Yehovani ngule onzi, on duou ma dri pamvururi edepi, eri edrepi uru ndindiruri, ma ovu trizaru. ’Ba dria ma omvi e’yo, ma ’yo, Amena.

¹⁶’Ba i ati pi ’bapi i andri be tokori ma ovu trizaru. ’Ba dria ma ’yo, Amena.

¹⁷’Ba ’ba i jo ejeleari ma afa lokiri ecezuri ojapiri ma ovu trizaru. ’Ba dria ma ’yo, Amena.

¹⁸’Ba ’ba mile kokoruri ebabapi, fepi erini geri ini avizuri, ma ovu trizaru. ’Ba dria ma ’yo, Amena.

¹⁹’Ba ani’bo pi ma e’yo lipi onzi, imvoanzi pie, awuziou pieri ma ovu trizaru. ’Ba dria ma ’yo, Amena.

²⁰’Ba fipi i ati ma oku vuri ma ovu trizaru, a’disiku eri otru i ati ma afa pililiru ’bo. ’Ba dria ma ’yo, Amena.

²¹’Ba lapi anyapasiri, ka ovu anyapa ngoni ngori ti, ma ovu trizaru. ’Ba dria ma ’yo, Amena.

²²’Ba lapi i amvisi, kani ata ma mvani ya, kani ayiamvani yaniri ma ovu trizaru. ’Ba dria ma ’yo, Amena.

²³’Ba fipi i edri vuri ma ovu trizaru. ’Ba dria ma ’yo, Amena.

²⁴’Ba ’ba i ma jo ejeleari ’dipi ndindiruri ma ovu trizaru. ’Ba dria ma ’yo, Amena.

²⁵’Ba afa feza ’ba ti razu ’ba e’yo kokoruri fuzuri a’ipiri ma ovu trizaru. ’Ba dria ma ’yo, Amena.

²⁶’Ba azita ’dori ma e’yo ’bapi okporu yi ’yezu kuri ma ovu trizaru. ’Ba dria ma ’yo, Amena.