Read lugbara Azita Amvizu 28 Bible Online

Azita Amvizu 28 - lugbara bible

Azita Amvizu 28

¹Eri nga eca ’dini, mi ka nga bile co asi alusi Yehova Mungu miniri ma o’duko erizu, asi ’bazu azita erini mani azile mi tia o’du andru ’dorisi ’diyi ’yezu dria, ka’dini Yehova Mungu miniri nga mi ’ba uru aga suru wudrikurua ’diyi dria ra

²Asi ndriza ’diyi dria nga eca mi dria, nga mi isu ra,mi ka nga o’duko Yehova Mungu minirini eri raria.

³Mi nga ovu asi ndriza be akua, mi nga ovu vini asi ndriza be amvua.

⁴Ori efupi mi ruaari pi nga ovu asi ndriza be, afa nyaku minirini kaleri pie, mi anyapa ma ori pie, mi ti ma ezuza pie, kabilo mini ma anzi pie.

⁵Afazu mini pi nga ovu asi ndriza be wari mini mikate itizuri be.

⁶Mi nga ovu asi ndriza be mini efiria, mi nga ovu vini asi ndriza be mini furia indi.

⁷Yehovani nga fe ari’ba mini engapi mi ruaa ’diyi ma ovu ndezaru mi drilia; yi nga efu mi vu geri alusi, te yi nga yi ere apazu nzuzu mi drilia geri azirisi.

⁸Yehovani nga asi ndriza azi mi dria afa ero mini ma alia ’diyisi, azini e’yo mini mi dri ’bazu yi vu ’diyisi dria indi; eri nga asi ndriza fe mi dri angu Yehova Mungu minirini fele mi driri ma alia.

⁹Yehovani nga fe mini ovuzu ’dani suru alatararu ma ngulupiniriru, ekile erini oyoni sole mi berile, mi ka nga azita Yehova Mungu minirini ’diyi ma ta mba, acizu geri erini ma aliaria.

¹⁰Suru dria wudrikurua ’diyi nga ne ’ba omve mi Yehova ma rusi; yi nga ani ’ye misi urisi.

¹¹Te Yehovani nga fe mini gazu tre afa onyi besi, ori efupi mi ruaari pisi, mi anyapa ma ori pie, afa nyaku minirini kaleri pie, angu Yehovani oyo sole mi a’bipi tia fezu mi driri ma alia.

¹²Yehovani nga pari ini onyiru lonyi ta mbazu ’buari ma ti zi mi dri, ozoo fezu ’dizu ewu vusi ewu vusi angu mini ma dria, asi ndriza ’bazu azi mini ’yele drisiri ma dria dria; mi nga afa fe mariru suru kakau dri, te miruni ngani mari ’du ku.

¹³Yehovani nga vini mi ’ba ovuzu driru, te sobiru ku; mi nga ovu kiri drileru, mi ngani ovu ele ku; mi ka nga azita Yehova Mungu minirini mani azile mi dri o’du andru ’dorisi ’diyi eri ra, asi ’bazu yi ta mbazu ’yezu raria,

¹⁴mi ka nga mi oja e’yo mani azile mi dri andru ’diyi ma azi aluni kuzu, mini muzu kalaa dri ndia, kani dri ejia, Mungu azini ’diyi ma vuti bizu, yi ma azi ngazu kuria.

¹⁵Te eri nga eca ’dini, mi ka le o’duko Yehova Mungu minirini eri ku, ka asi ’ba azita erini azini e’yo aziza erini mani azile mi tia o’du andru ’dorisi ’diyi ’yezu ku, ka’dini otrita ’diyi dria nga eca mi dria, nga mi isu ra.

¹⁶Mi nga ovu trizaru akua, mi nga ovu vini trizaru amvua.

¹⁷Afazu mini nga ovu trizaru, wari mini mikate itizuri be.

¹⁸Ori efupi mi ruaari nga ovu trizaru, afa nyaku minirini kaleri pie, mi ti ma ezuza pie, kabilo mini ma anzi pie.

¹⁹Mi nga ovu trizaru mini efiria, mi nga ovu vini trizaru mini furia indi.

²⁰Yehovani nga otrita pi ma ti pe mi ma dria, asi otiza pie, egaza ’bani egazu mi ma driari pie, e’yo dria mini mi dri ’bazu vunia ’yezuri ma alia, cazu kpere yini mi ezazu teketeke, mini dri jazu mbeleria, ’yeta mini ma e’yo onzi, mini ani ma kuzurisi.

²¹Yehovani nga fe azo muani i ebizu mi ma ruaa, cazu kpere erini mi dri jazu angu mini fizu alenia eri ’duzu miniruri ma aliasi.

²²Yehovani nga mi co noi pisi, rua driza pie, azo ’ba rua opipi opiri pie, driza aciruri pie, sei pie, oli aciru afani ’wizuri pie, ozoo afa emapiri pie; yi nga mi vuti dro cazu kpere mini dri jaria,

²³’Bu mi drilia ururi nga ovu molani, azini nyaku mi pa ageleari nga ovu ayani.

²⁴Yehovani nga ozoo mi vile anguari oja furaru irifurale; eri nga esi ’buarisi va mi dria gu gu gu, cazu mini dri jaria ra.

²⁵Yehovani nga vini fe ari’ba minini mi ndezu ombasi yi ma drilia; mi nga fu a’di ’dizu yi be geri alusi, te mi nga mi ere apazu nzuzu yi drilia geri azirisi; yi nga ri mi o’be ’dole ’dale suru dria wudrikurua ’diyi ma eselia.

²⁶Te mi avuni nga ovu zaru aria ’bua ’diyi dri dria, azini vini anyapa nyakua ’diyi dri indi; te ’ba ngapi yi dropini yo.

²⁷Yeho-vani nga mi co apipi Misiria ’diyi pisi, apipi ofupi acereru ’diyi pie, isisiri ’ba rua fupi furi pie, ayiribe pie, mini econi ani atizaru ku.

²⁸Yehovani nga vini mi co aza pisi, azo mileni drazuri pie, asi otiza pie;

²⁹mi nga ad parapara etu agaa biririsi, ’ba mile koko ’diyini adrile acile parapara angu biza ma aliarile, azini mi ngani ovu drilebaru geri minia ku; ’ba nga kiri mi inza, nga afa mini opa ’dani, te ’ba ngapi mi aza kopini yo.

³⁰Mi nga e’do oku je ra, te ’ba azini nga la erisini; mi nga jo si, te mi ngani ovu aleniani ku; mi nga zabibu isi amvua, te mi ngani efini nya ku.

³¹Yi nga ti mini so mi milia ’de, te mi ngani zani nya ku; yi nga akanya mini pa ambosi mi driarisi, te yi ngani eri omvi mi dri ku; yi nga kabilo mini ’diyi ofe mi ari’ba dri, te ’ba mi papini yo.

³²Yi nga mi anzipi pi fe mi ezopi be juru dri, de mini yi neria milesi, mi mileni nga oro mini yi ma mile gale ti o’du driarisi; mi ngani eco e’yo aluni ’yezaru mi dri ma okposi ku.

³³Suru ambo mini nile kuri nga afa nyaku minini kale ’diyi, azini afa dria mini isule mini azi ngalerisi ’diyi nya ra; te yi nga kiri mi dri otu mi inzazu ’dani;

³⁴’dini mi nga ofu ’ba azazaru e’yo mini nele mi milesi ’diyisi.

³⁵Yehovani nga mi co kumuti pia, pa be, apipi onzikanyaru mini ecozu ani atizu ku ’diyisi, engazu mi pa agelea cazu mi dri olu’bua kurubu.

³⁶Yehovani nga mi ji, opi mini ngale ’bale mi driliari be, suru mini; nile mi a’bipi be oku nga kuri vu; ’dale mi nga azi nga adrou edele patisi azini onisi ’diyi dri.

³⁷Te mi nga ofu ’ba dri osutaru, o’dukoru, azini ajidimararu, suru dria Yehovani ngale mi dri cele yi vu ’diyi ma eselia.

³⁸Ririani mi nga ori i amvua afazu ambosi, te loriani mi nga tini oku afazu weresi; a’disiku ombini nga eri nyani,

³⁹Mi nga zabibu isi amvua, mi nga ruani ede ra, te mi ngani suni mvu aluni ku, mi ngani vini kapi ’diyi oti ku; a’disiku iriakani nga eri nyani,

⁴⁰Mi nga ovu mizeitu pati be angu mini ma alia dria, te mi ngani oduni efi mi ruaa ku; a’disiku mizeitu mini ’yapi ’diyi lu va.

⁴¹Mi nga ezoanzi azini agupianzi oti, te yi ngani ovu mini ku; a’disiku yi nga mu ati’baru,

⁴²Pati mini dria, afa nyaku minirini kale ’diyi be, nga ovu ombi ma afaru.

⁴³Ani’bo ovupi mi eseliari nga ri tu uru uru aga mi ra; te miruni nga si ele ele.

⁴⁴Eri nga afa fe mi dri mariru, te mi ngani afa fe eri dri mariru ku; eri nga ovu drini, te mi nga ovu sobini,

⁴⁵Otrita ’diyi dria nga emu mi dria, nga mi vuti dro, nga mi isu ra, cazu mini dri aria, a’disiku mini Yehova Mungu miniri ma ti erile kurisi, mini azita erini pi ma ta mbale e’yo aziza erini, erini azile mi dri ’diyi be kurisi.

⁴⁶E’yo ’diyi nga ovu ecetaru azini e’yo osutaru mi ma ruaa ori mini be ’dani ’dani.

⁴⁷Mini ndra azi ngale Yehova Mungu miniri dri nyonasi azini ayiko asiansi, afa driani ovule trerisi, kurisi,

⁴⁸e’yo ’disi mi di nga azi nga mi ari’ba Yehovani ngale ti pele a’di ’dizu mi be ’diyi dri ra, abirisi, yi avijosi, rua be pililiru, wuzu afa dria ma akosi; eri nga kulumbu ayaru eci mi ombelekoa, cazu erini mi dri jazuria.

⁴⁹Yehovani nga suru mini yi ma ti nile kuri eji mi dria engazu wudrikuru ma ,kalatini asiria, ekile ajini salerile,

⁵⁰suru mile be ombaru, ngapi asipi ’ba deza ma e’yosi ku, ngapi vini yiki ’bapi ’ba o’di ’diyi vu kuri’i;

⁵¹yi nga anyapa mini ma ori nya ra, afa nyaku minirini kaleri be, cazu mini dri jaria; yi ngani vini anya pi ku mi ’dri ku, patiefi ma su pie, odu pie, ti mini ma ezuza pie, kabiloanzi mini pie, cazu yini fezu mini dri jazuria ra.

⁵²Yi nga mi ti tu ku kali mini ’diyi ma alia, cazu abi kaliru mini izu okporu, mini asi ’bazu yi ma dria ’diyini yi asuzu va angu mini ma alia dria; yi nga mi ti tu ku kali mini ma alia dria, angu Yehova Mungu minirini fele mi dri ’bori ma alia dria.

⁵³Mi nga ori efupi mi ngulupi ma ruaa ’diyi nya, mi anzipi Yehova Mungu minirini fele mi dri ’diyi pi ma za mi ezopi be, omba mi ari’bani mi acezu kuru, yini mi omizu ci ciri ma alia.

⁵⁴Agupi emi eselia ovupi rua be menemene okpo kokoru turi ma mileni nga ovu onzi i adri pi vu, oku i agatiari pie, anzi ma joloko acepi eri dri ’diyi pie;

⁵⁵’dini eri ngani i ma anzi ini nyale ’diyi ma za fe yi ma azi dri aluni ku, a’disiku afa azini aceni eri dri ku, omba mi ari’bani mi acezu kuru, yini mi omizu ci ciri aku mini dria ma aliari ma alia.

⁵⁶Oku emi eselia ovupi rua be menemene okpo kokoru, lepi i pa agele ’bapi nyakua ku eri ma ruani ovule menemene azini okpo kokorurisiri ma mileni nga ovu onzi agupi i agatiari pi vu, mvi pie, zi pie,

⁵⁷odekua erini efupi i ma pa cseliari pie, anzi erini ngale otile ’diyi pie, a’disiku eri nga yi nya ndindiru afa driani ovule yorisi, omba mi ari’bani mi acezu kuru, yini mi omizu ci ci aku mini dria ma aliari ma alia.

⁵⁸Mi ka mi asi ’ba ku azita ’dori ma e’yo, sile buku ’dori ma alia ’diyi dria ’yezu, mini ani ru dizaru uriuriru ruzu, runiri ’di, YEHOVA Mungu MINIRI,

⁵⁹ka’dini Yehovani nga eji mi dria azini ori mini ma dria dra muaru osutaru, mua amboru fupi mbele ku ’diyi, azini azo okporu fupi mbele ku ’diyi.

⁶⁰Eri nga vini azo Misiria mini ’yele yisi urisi ’diyi dria eji mi ma dria; yi nga yi iri ku mi ruaa.

⁶¹Vini indi Yehovani nga azo dria azini dra dria ’bani sile buku azita ’dorini ma alia ku ’diyi eji mi ma dria, cazu mini dri jaria.

⁶²Ka tro emi ovu ndra kakau ekile ’bi’bio ’bua ’diyi ma kalafele ti, emi nga ace lamiru; mini Yehova Mungu miniri ma ti erile kurisi.

⁶³Eri nga eca ’dini, ekile Yehovani ovule ndra ayikosi emi ’yezu onyiru azini fezu emini ezuzurile, ’dini Yehovani nga ovu ayikosi fezu emi orini avizu azini emi dri lazu; vi nga emi onze pi pi angu mini fizu alenia eri ’duzu miniruri ma aliarisi ra.

⁶⁴Yehovani nga mi ere suru dria ma eselia, engazu wudrikuru ma kalati aluria cazu kpere wudrikuru ma kalati aziniria; ’dale mi nga azi nga adrou edele patisi azini onisi, mini nile mi a’bipi be oku nga ku ’diyi dri,

⁶⁵Suru nde ’diyi ma eselia mi ngani ava liza isu ku, mi ngani vini pari ande lizu mi pa agele ’bazuri isu ku; te ’dale Yehovani nga mi dri asi oyaza pi fe, mile o’deza pie, candi asi dezuri pie;

⁶⁶idri miniri nga ri ale co idri pi ma eselia dra be mi milia; mi nga ovu urisi inisi etusi ’dani, mi ngani idri mini ma e’yo ni adadaru ku.

⁶⁷O’bitisi mi nga ’yo, Ka te ondreni ’yeke fo! azini ondresi mi nga ’yo, Ka te o’bitini ’yeke fo! uri amboru mi asiari ma e’yosi, azini vini e’yo mini nele mi milesirisi.

⁶⁸Yehovani nga mi ji Misiria dika ogurusi, muzu geri mani ndra ’yole kini mi ngani eri ne dika kuria; ’dale emi nga emi fe ozi ari’ba emini dri ceni ati’ba agupiru azini ati’ba okuru, te ’ba ngapi emi jepini aluni yo.