Read lugbara Azita Amvizu 3 Bible Online

Azita Amvizu 3 - lugbara bible

Azita Amvizu 3

¹Vutinia ama oja ama muzu uru geri Basaniarisi; te Ogi opi Basaniari efu ama vu omba ’bazu, eri’i ’ba erini pie dria, omba ’bazu Edreia.

²Te Yehova ’yo ma tia, Mi ma ’ye urisi eri ma e’yosi ku; a’disiku ma fe eri mi dria ’bo, ’ba erini ’diyi pie dria, angu erini pie; te mi nga eri ’ye ekile mini Sihoni opi Amorini ovupi Hesiboniari ’yelerile.

³’Dini Yehova Mungu amani fe di Ogi opi Basaniari ama dria vini indi, ’ba erini ’diyi pie dria; ama ofu yi kpere ’ba alunini acezu ci eri dri ku.

⁴Ewu nderisi ama opa aku ambo ambo erini ’diyi dria-aku ambo ambo erini ’diyi ma eselia aluni amani opale yi driasi kuni yoyi aku ambo ambo kali azia angu dria Arigobua pie, opi nyaza Ogini nyale Basaniari’i.

⁵Aku nde ’diyi yi aku ambo ambo abi kaliru izuru pi be, kalitile pie, katala pie, azini drinia aku karakarau kali kokoru ’diyi indi.

⁶Ama ja yi dri teketeke, ekile amani ’yele Sihoni opi Hesiboniari vurile, aku ambo ambo ovupi ’ba be ’diyi dri jazu dria teketeke, okuyi pie, anzi nyiri pie dria.

⁷Te ama opa anyapa dria ama dri, afa aku ambo ambo alia ’diyi be dria amaniru

⁸Ewu nderisi ama opa angu opi iri Amorini ovupi Yoridani tia ’aa’dasi ’diyi ma driasi, engazu e’bu Arinonia cazu kpere oni Herimonia

⁹(’ba Sidonia ’diyi omve Herimoni nde ma ru Sirioni’i, te ’ba Amorini ’diyi omve eri Seniri’i),

¹⁰ama o’du vini aku ambo ambo angu senderuria ’diyi dria, Gileadi dria pie, Basani dria pie, cazu Saleka pia Edrei be, yi aku ambo ambo opi nyaza Oginiri ma alia Basania ’diyi.

¹¹(’Ba Refaini ndra acepi jolokoru ’diyi ma eselia ace di lu kiri Ogi Basaniari’i a’dule; mi ne, gbolo eriniri ndra gbolo ayaruri’i; gbolo ovuni nga Raba Amoni anziniria ’dani ku ya? Oconi wuale oromi, walani wuale su, wuale ’baniri vusi.)

¹²Ewu nderisi ama pa ndra angu ’dori nya amaniru; ma fe ndra angu nde ’ba Rubenini piyi dri ’ba Gadini be, e’dozu Aroeri a’bu Arinoni ma tiaria, azini angu oniru Gileadiari ma ali tualu aku ambo ambo alenia ’diyi be;

¹³te ma fe Gileadi ma ali acepiri suru ali Manaseni dri, Basani opi nyaza Oginiri be dria, ada angu Arigobuari dria. (’Ba omve Basani nderi dria angu ’ba Refainini.

¹⁴Yairi ’ba Manaseni pa ndra angu Arigobuari dria, cazu ’ba Gesurini ’diyi pi ma lokiria ’ba Maakatini be, eri omve angu nde ’diyi, ada Basani, Havoti-yairi, ru ini vusi, kpere o’du andru’dorisi.)

¹⁵Ma fe ndra Gileadini Makiri dri.

¹⁶Ma fe vini angu ’ba Rubenini ’diyi pi dri ’ba Gadini ’diyi be, engazu Gileadia cazu kpere a’bu Arinonia, lokiriniri a’bu nde ma agaduaria, cazu kpere yi ara Yaboki i ovupi Amoni anzi ma kalatiaria;

¹⁷ma fe vini Arabani indi, lokiriniri i Yoridani’i, engazu Cineretia cazu miri Arabaaria, ’di Mid A’iruri’i, oni Pisiga ma angu lureruri ma etia etuni efurialeru.

¹⁸Ewu nderisi ma azi ndra emi tia kini, Yehova Mungu emini fe emi dri angu ’diri nyazu eminiru ’bo; emi nga zo, afa ombani be emi ruaa, adripi emini anzi Israelini ’diyi ma drilia, emi ’ba ombani ’diyi dria.

¹⁹Te oku emini piyi nga awu nga aku ambo ambo emini mani fele emi dri ’bo ’diyi ma alia ’de, anzi emini pie, anyapa emini pie (ma ni emi anyapa be tre),

²⁰cazu kpere Yehovani ngazu ava liza fezu emi adripi dri ekile emi dririle, yini ngazu angu Yehova Mungu eminirini fele yi dri Yoridani ma tia ’aa’dasiri nyazu indi; ewu nderisi emi dria alu alu nga di emvi angu nde mani fele emi dri emi afaruria ndo.

²¹Ewu nderisi ma azi vini Yosua tia kini, Mi ndre milesi ’bo e’yo dria Yehova Mungu minirini ’yele opi iri ’diyi ma ruaari ra; Yehovani nga vini opi nyaza dria emini ngazu agazu yi vu ’diyi ’ye ’dinile tro tro.

²²Emi ma ovu urisi yi ma e’yosi ku; a’disiku ’ba a’di ’dipi emisiri Yehova Mungu eminiri’i.

²³Ewu nderisi ma ’ba ndra matu Yehova vu kini,

²⁴Opi Yehova la! Mi e’do ambo miniri pi ecezu ati’bo mini dri, dri okporu miniri be ’bo; te adrou ’bua kani nyakua ecopi azi ngapi mileni, kani ’yeta amboru ’yepi mileni a’di’i ya?

²⁵Kirikiri mi fe mani zozu, ma matu ’ba mi vu, ma ma ne angu onyiru Yoridani ma tia ’aa’dasiri pi, oni onyiru nderi pie, Lebanoni pie fo!

²⁶Te Yehova ovu ma be aokosi emi ma e’yosi, erini ma ku; Yehova nga ’yo ma tia, ’Di ma fu dri mi dri; mi ’yo e’yo ’diri ma tia dika ku.

²⁷Mi tu Pisiga ma dri mbiliria, mi enga mi mile luzu etuni ’derialeru, azini woko andraleruria, azini woko uruleruria, azini etuni efurialeru, mi lu mi milesi; te mi ngani Yoridani ’diri zo ku.

²⁸Te mi ma azi azita Yo sua dri, ma imba eri ma asi, ma fe vini okpo eri dri; a’disiku eri nga zo suru ’dori ma drilia, eri nga fe yini angu mini ngale ndreleri nyazu yiniru ra.

²⁹’Dini ama awu ku e’bua, pari otizaru Beti-peori beri ma alia.