Read lugbara Azita Amvizu 31 Bible Online

Azita Amvizu 31 - lugbara bible

Azita Amvizu 31

¹Musa mu e’yo ’diyi ’yozu Israeli ma tia dria.

²Eri ’yo yi ma tia kini, Eli mani ca andru turu alu drini kali iri; ma econi fuzu azini efizu okorile ku. Yehova ’yo ma tia kini, Mi ngani Yoridani ’dori zo ku.

³Yehova Mungu miniri nga zo mi driliani; eri nga suru ’diyi ma dri ja mi driliasi ra, mi nga ani angu yini nya; te Yosuani nga zo mi driliani ekile Yehovani ’yolerile.

⁴Yehovani nga yi ’ye ekile erini ndra opi ’ba Amorini Sihoni pi ’yele Ogi berile, azini vini ekile erini ndra angu yini ezale, erini yi dri jazurile.

⁵Yehovani nga yi fe mi dri mi drilia, emi nga yi ’ye ekile azita dria mani azile emi tiarile.

⁶Mi ma ovu okporu asi agupinisi, mi ma ru ku, mi ma ’ye yisi urisi ku: a’disiku ’ba mupi mi beri Yehova Mungu miniri’i; eri ngani ece mi aza kozu ku, eri ngani vini mi ku ku.

⁷Musa nga di Yosuani omve, nga ’yo eri tia Israeli dria ma milia kini, Mi ma ovu okporu, asi agupinisi; a’disiku mi nga mu suru ’dori be fizu angu Yehovani ndra oyoni sole yi a’bipi be fezu yi driri ma alia; mi nga fe yi ma ’du angu nderi nyazu yiniru.

⁸’Ba mupi mi driliari Yehova’i; eri nga ovu mi be, eri ngani ece mi aza kozu ku, ngani vini mi ku ku; mi ma ovu urisi ku, mi asi ma oti vini ku.

⁹Te Musa si azita ’dori, fe eri Levi anziyi kuhaniru sanduku aziza Yehovanirini ojipi ’diyi pi dri, ’ba ’wara Israelini ’diyi be dria,

¹⁰Musa nga di azi yi dri kini, Eli aziriri vusi dria erini asiria, ewu pele eli e’yo ti adizuri ma aliarisi, omu nyale borokoari ma alia,

¹¹Israeli dria ka emu yi e’dazu Yehova Mungu miniri ma drilia pari erini ngale peleria, mi ma la azita ’dori Israeli dria ma drilia, yi ma bilia.

¹²Mi oku ’ba, agupiyi Okuyi ’be, anzi nyiri pie, ani’bo ovupi mi vile akuari pie, yi ma eri azini yi ma, oni ani, ma ru Yehova Mungu miniri, ma ’ba yi asi azita ’dori ma e’yo ’yezu dria;

¹³azini vini anzi yini, e’yo nipi nga ku ’diyi ma eri ani, ma oni Yeliova Mungu miniri ruzu beni, o’du dria emini ovuzu idriru angu emini Yoridanini zozu eri ’duzu eminiruri ma alia ’diyisi.

¹⁴Yehova nga di ’yo Musa tia kini, Mi ne, o’du mini ngazu drazuri eri ’ye eca eca; mi omve Yosuani, emi e’da emi hema ti ecizaniri ma alia, ma ma azi ani e’yo eri dri beni. Musa pi nga di mu Yosua be yi e’dazu hema ti ecizaniri ma alia.

¹⁵Yehova nga i e’da hema ti ecizaniri ma alia iriti pa sopi piriri ma alia; iriti nde pa sopi piriri so pa hema tilealeru.

¹⁶Te Yehova ’yo Musa tia kini, Mi ne, mi nga o’du ko mi a’bipi be; te suru ’dori nga enga muzu ali o’bazu Mungu ndu angu yini muzu ovuzu yi ma eseliaria ’diyi ma vuti bizu, yi nga ma ku ra, nga aziza mani azile yi be ’bori eza ra.

¹⁷Ka’dini acira mani nga di yi dria o’du nderisi,ma nga ani yi ku ra, ma nga ma mile zi yisi ra, ’ba nga yi ofu ra, onzi kakau azini candi kakau nga eca yi ma dria, yini ani ngazu ’yozu o’du nderisi kini, E’yo onzi ’diyi ecani ama ciria Mungu amanini ovule ama eselia kurisi ku ya?

¹⁸o’du nderisi ma nga mile mani zi ecekokoru’i e’yo onzi ciria yini ’yele ra yini yi ojazu Mungu andini ’diyi ma vuti bizurisi.

¹⁹E’yo ’disi curu’do emi si ongo ’dori emi dri, mi imba vini anzi Israelini eri nizu; mi ’ba eri yi ma tilea, ongo ’diri ma ovu ani e’yo mani ma eti nzepiriru anzi Israelini ma ruaa beni.

²⁰Te ma ka nga yi eji angu lesu pini gazu alenia anyuoso be tre, mani oyoni sole ndra yi a’bipi beri ma alia ’boria, yi ka nga nyaka nya trazu, osezu ani ’boria, yi nga yi oja Mungu andini vu azi ngazu yi dri, yi nga ma ede ede, nga aziza mani eza ra.

²¹Eri nga eca ’dini, onzi kakau azini candi kakau ka nga eca yi ma dria ’boria, ongo ’diri nga e’yo eti nze yi ma drilia ’ba e’yo eti nzepirile (a’disiku ori yini ma tilea, tavini ngani avi ku); a’disiku ma ni e’yo yini otule yi asia cucuru’do, de nga ma jini yi angu mani ndra oyoni soleri ma alia kuri ra.

²²E’yo ’disi Musa si di ongo ’dori o’du ’darisi ra, nga di anzi Israelini imba ani.

²³Yehova nga e’yo azi Yosua Nuni mvi dri, ’yozu kini, Mi ma ovu okporu asi agupinisi; a’disiku mi riga anzi Israelini ji angu mani ndra oyoni sole yi beri ma aliani; te ma nga ovu mi be.

²⁴Eri eca ’dini, Musa ka de azita ’dori ma e’yo sizu buku ma alia kpere yini asiria ’bo,

²⁵Musa azi ’ba Levini sanduku aziza Yehovanirini ojipi ’diyi ma tia kini,

²⁶Emi ’du buku azitani ’dori, emi ’ba eri aziza Yehova Mungu eminirini azileri vile sanduku ma ageia, eri ma ovu ani ’daa e’yo eti nzepiriru mi ruaa.

²⁷A’disiku ma ni e’yo mini mbuzu amveri pi ma e’yo, ombe teza mini be ra; mi ne, mani de ovuria nga idriru emi eselia o’du andru ’dorisi ti, emi mbu Yehova ma ruaasi amve ra; ka’dini mani ngaria draria ’boria, emi ngani mbu amve aga ra ku ya!

²⁸Emi oku ma vu ’ba ’wara suruti emini vusi ’diyi dria, ’ba amboru emini ’diyi pie, ma ma ’yo ani e’yo ’diyi yi ma bilia, ma ma omve ’bu pi nyaku be e’yo eti nzezu yi ma ruaa beni.

²⁹A’disiku ma ni ra, mani drazu ’bori ma vutia, emi nga emi eza teketeke ada, emi nga emi oja geri mani azile emi driri kuzu; e’yo onzini nga emi isu o’du vile ’diyisi, a’disiku emi nga e’yo ovupi onzi Yehova ma miliari ’ye’i, fezu eri ma adrani engazu azi emini ’yele drisi ’diyisi.

³⁰Musa nga di e’yo ongo ’dorini ’diyi olu dria kpere yini asiria, ’ba Israelini ongulumuru ’diyi ma bilea: