Read lugbara Azita Amvizu 32 Bible Online

Azita Amvizu 32 - lugbara bible

Azita Amvizu 32

¹Emi ’bu, emi co bile, ma nga e’yo ’yo; nyaku ma eri e’yo ma tilea ’diyi.

²Imbata mani nga oti ozoole, e’yo ’yoza mani nga ’ya ekile andralile, ekile lilima oyipi oyi ase ibiru ma driarile, ekile ozoo ’dipi afa idiza ma driarile.

³A’disiku ma nga ru Yehovaniri eku’i. Emi fe ambo Mungu amani dri!

⁴Kata nderi, azi erini ’yeleri ovu ezata kokoru; geri erini ’diyi dria ovu e’yo liza kililiru. Eri Mungu asi ada be, e’yo onzi kokoruri’i, eri kililiru, onyiru.

⁵Yi ’ye e’yo ovupi kililiru kuri eri vu, yi ovuni anzi erini ku, ’diri nyebileko yini; yi a’bianzi ambo be, lokiri be yi asia ’diyi.

⁶Emi Yehovani ofe ’dini ya, emi ’ba azazaru ondua koko ’diyi? Eri mi ati, mi jepi, mi ’bapi, fepi mini pa sozuri’i ku ya?

⁷Mi ma ega o’du drio ’diyi, ma dro asisile eli mi a’bipi kakau ’diyini ma dria; mi zi mi ati tia, eri nga e’yoni ece mi dri ra; mi zi ’ba ’wara mini ma tia, yi nga e’yoni olu mi tia ani.

⁸Mungu Uru Agapi Turi ka ndra awuruso fe suru ndu ndu ’diyi dri, eri ka ndra anzi ’bani ma esele co, eri si ndra lokiri suruni anzi Israelini ’diyi ma kalafe vusi.

⁹A’disiku yila Yehovani ovu ’ba erini ’diyi, Yakobo ovu awuruso pele eri ma afaruri’i.

¹⁰Eri isu ndra eri angu roko dria, asoko pirini afa asea ’diyini wuzuria; eri ace eri kuru, eri te eri ma agei,

¹¹Ekile ajini opile ajale jorovu ini ma driarile, azini erini opile oyale anzi erini driarile, ekile erini opile ajale walaru yi ’duzu uru, yi jizu opile ini ma driarile,

¹²’dinile Yehova a’dule ce ndra eri drini, Mungu nduni ovuni ndra eri be ku.

¹³Eri otu ndra eri pari uruleru wudrikurua ’diyi ma dria, ri ndra afa nyakuni kale ’diyi nya’i; eri endruzu anyuoso efupi oni ma ruaari pisi, odu efupi oni okporu ma ruaari be.

¹⁴Ti lesu butaruri pi, kabilo lesu pie, kabiloanzi osoru ’diyi pie, kabiloago Basania ’diyi pie, ndri pie, nganu ’wara onyiru turi piemi ri ndra vini patiefi ma su edele zabibu ma arisiri mvu’i,

¹⁵Te Yesuruni ose ra, nga otu pasi ra; mi ose ra, mi eca a’buzaru, rua be mulimuliru; etu nderisi eri ku di Mungu eri ’bapiri ra, eri ede Kata pata erinirini ede ede.

¹⁶Yi fe a’yani engazu eri ma asia Mungu nduni ’diyisi; yi fe vini adrani engazu eri ma asia e’yo ngule onzi ’diyisi.

¹⁷Yi ede edeta orindi onzi ’diyi dri, te Mungu dri ku, yi ede edeta adrou yini nile oko ku ’diyi dri, adrou efipi nga o’diru emi a’bipini rule ndra ku ’diyi.

¹⁸Mi egani Kata mi tipiri ma e’yo ku, Mungu mi tipiri ma tavi avi mi dri ’bo.

¹⁹Yehova ndre e’yo nderi ra, nga yi ngu ani onzi, a’disiku eri ma anzipi ezopi be fe aokoni eri nyazu.

²⁰Eri ’yo ra kini, Ma nga ma mile zi yisi ra, ma nga yi ma asizani nga ovu ngoni yari ndre ra, a’disiku yi ovu a’bianzi ambo be tu ’diyi, anzi ovupi a’ita be yi ma alia aluni ku ’diyi.

²¹Yi fe a’yani engazu ma asia afa ovupi munguru kurisi ra; yi fe aokoni ma nyazu afa toko toko yini ’diyisi. Ka’dini ma nga fe a’yani engazu yi ma asia ’ba ovupi sururu ku ’diyi ma e’yosi; ma nga fe aokoni yi nyazu suru ondua kokoruri ma e’yosi.

²²A’disiku acini ti kole adra manisi ’borisi, eri angu ve kpere ’bile drani ma eti valeruria, eri nyaku pi eve afa erini kaleri be, eri oni amboru ’diyi ma eti du acisi ra.

²³Ma nga onzi odro yi ma dria nguru nguru; ma nga ’ye mani ca de dria yi ma ruaa;

²⁴yi nga oyi abirisi, aciolu pi nga yi ove dria ra dri jaza okangalikaruri be; ma nga nguru piyi ma ti pe yi ocizu sisi, afa acipi aci irifura ma alia ’diyi be yi ozazu ’yokosi.

²⁵Amveleru seini nga ’ba ofuni, jo aliza alialeru e’yo uriuriruri’i, karilau pi ma dri jazu aliria be, odekua ba ndrupiri pi mbazau ozoforo be driari be.

²⁶Ma eco ndra ’yo ra kini, Ma nga yi ere ziri, ma nga egata ’bani yi ma e’yo egazuri ini ’ba ma eseliarisi ra,

²⁷te lu ma ’ye urisi ari’ba kazu aoko fezu ku, ’ba omba ’bapi yi be ’diyi kazu e’yo kililiru kuri egazu ku, yi kazu ’yozu ku kini, Enga ama dri uru tu, Yehova ’yeni e’yo ’diri driani ku.

²⁸A’disiku yi suru e’yo amaza kokoru, e’yo vaza yi alia aluni yo.

²⁹Yi ka te ovu onduaru e’yo ’diri vazu, ’yeke fo! yi ma asiza vileri ma e’yo egazu!

³⁰Kata yini ka ndra yi fe ozizu ku, Yehova ka ndra yi fe ari’ba dri ku, ’ba alu eco ’ba alifu alu ma vuti drozaru ngoni ngoni ya, ’ba iri eco fezu ’ba alifu mudri ’diyini apazu ngoni ngoni ya?

³¹Te kata yini ovuni Kata amanirile ku, ekile ari’ba amani yi ma ngulupini e’yoni lilerile.

³²Te zabibu pati yini enga zabibu pati Sodomuari pi ma ruaa, eri amvu Gomoraa ’diyini; zabibu efi yini yi zabibu efi oji drazani ’diyi, zabibu efi yini kapi nguluru ’diyi ovu okangalikaru;

³³zabibu su yini ovu enyata uriniri’i, azini ’boroa ma ’yu yiki kokoruri’i.

³⁴Mbani afa ’diri ma ta ma be, ku lomureru tini opizaru ci pari mani lonyi mani ma ta mbazuria ku ya?

³⁵Arioti omvizuri e’yoni mani, panga ofeza be, ewu yi ma pani ngazu onzozurisi; a’disiku o’du ecoko yinirini eca ogogo, e’yo ngapi ecapi yi ma dria ’diyi nga emu mele.

³⁶Te Yehovani nga ’ba ini ’diyi ma e’yo li, nga i oja yiki ’bazu ati’ba ini ma ria, eri ka ne okpo yini de i ’bo, azini ’ba aceni aluni ku, kani aruru kani aruru kuri ti.

³⁷Eri nga di ’yo kini, Adrou yini ’diyi ngoa ya? Kata yini asi ’bazu drinia,

³⁸edeta yini edele ’diyi ma oso nyapi, edeta yini edele afa mvuzasi ’diyi ma patiefi ma su mvupi ’diyi ngoa ya? Emi ku yi ma enga emi aza kozu, yi ma te emi ma agei yi’i fo

³⁹Emi ne, ma’i, ada ma’i, ma eri’i, Mungu azini yo pe lu ma; ma fu ma’i, ma vini idri fe ma’i; ma ’ba ebi ’bo, ma vini ati ra; ’ba ecopi ’ba papi ma driasini aluni yo.

⁴⁰A’disiku ma dri mani enga ’bualeru, ma ’yo, Ekile mani ovule idri be ’dani ’danirile,

⁴¹ma ka sei mani dipi minyiminyiri ma si ji, ma ka e’yo liza bi drisi, ma nga arioti omvi ma ari’ba dri, ma nga panga ofe ’ba ma ngupi onzi ’diyi dri.

⁴²Ma nga fe ’ye mani ma ati arisi, sei manini nga za nya raari ’ba ofule kai ’diyi pini ’ba obile ati’baru ’diyi be, rapi ambo ari’ba ma drilia ’diyi ma driarisi.

⁴³Emi suru ndu ndu ’diyi la! emi ma ovu ayikosi ’ba erini ’diyi be tualu; a’disiku eri nga arioti ofe ati’ba erini ’diyi ma arisi, eri nga arioti omvi ari’ba erini ’diyi ma ruaa, eri nga e’yo onzi ede angu erini pi dri ’ba ini ’diyi be.

⁴⁴Musa nga di emu ongo ’diri ma e’yo oluzu dria ’ba nde ’diyi ma bilea, yi Yosua Nuni mvi be.

⁴⁵Musa nga de e’yo ’diyi dria oluzu Israeli ma tia dria,

⁴⁶eri ’yo yi tia kini, Emi ’ba emi asi e’yo dria mani eti nzele emi tia o’du andru ’dorisi ’diyi ma dria, emi ma azi yi emi anzipi tia, yi ma ne onyiru yi ma ’ye ani azita ’dori ma e’yo dria beni.

⁴⁷A’disiku e’yo ’diri ovuni emi dri e’yo tokoni ku, te eri idri eminiri’i, azini e’yo ’dirisi emi nga ewu emini ovuzu idriruri fe i esezu izu angu emini Yoridanini zozu eri duzu eminiruri ma alia.

⁴⁸Yehova ’yo Musa tia o’du nde ’darisi kini,

⁴⁹Mi tu di oni Abarimu ma dria, kpere Nebo angu Moabua otizaru Yeriko beria; mi ma lu angu Kanani mani fele anzi Israelini dri ovuzu yiniruri;

⁵⁰mi ma dra oni mini tuzu driniari ma dria, muzu ’ba mini odrapi ’bo ’diyi vu, ekile mi adri Aronini drale oni Hori ma dria muzu ’ba ini odrapi ’bo ’diyi vurile;

⁵¹a’disiku emi eza e’yo ma vu anzi Israelini ’diyi ma eselia yi Meribaa Kadesiari roko Ziniaria; a’disiku emi ’bani ndra ma alatararu anzi Israelini ’diyi ma eselia ku.

⁵²Te mi nga angu nderi ndre milesi mi drilia; te mi ngani fi ’dale angu mani fele anzi Israelini driri ma alia ku.