Read lugbara Azita Amvizu 33 Bible Online

Azita Amvizu 33 - lugbara bible

Azita Amvizu 33

¹Asi ndriza Musa ’ba Mungunirini asi ndriza ’bazu anzi Israelini ’diyi ma dria de nga eri drani nga kuri ’di.

²Eri ’yo kini, Yehova enga ndra Sinaia, eri ibi enga Seiriasi cazu yi vu; eri di diza be engazu oni Paraniasi, eri enga ndra ’ba alatararu alifu mudri ’diyi ma eseliasi, eri ma dri ndiria azita vepi acileri indi yi dri.

³Ada, eri suru ’bani ’diyi le avasi; ’ba alatararu erini ’diyi dria yi eri ma dria; yi ri va eri ma palaa; yi alu alu nga e’yo mini ’yole ’diyi a’i ra.

⁴Musa azi ndra ama dri azita, ovupi ’ba ongulumuru Yakoboni ’diyi ma awurusoruri.

⁵Eri ovu ndra opiru Yesurunia, ’ba suru ma drilia ’diyini yi okuria tualu, suruti Israelini ’diyi be dria.

⁶Mi ku Rubeni ma ovu idriru, ma dra ku, te ’ba erini ma ovu were.

⁷Yudaniri eri ’di, eri ’yo kini: Yehova la, mi eri o’duko Yudani, mi ji eri ’ba erini ’diyi vu fo. Eri ma ngulupi ’di a’di i ma drisi; mi ma ko eri ma aza a’di ’dizu ari’ba erini ’diyi be.

⁸Levi ma e’yosi eri ’yo kini, Tumimu mini pi Urimu mini be yi ovu ’ba mini leleri be, ’ba mini o’bile Masaa, agata gazu eri be yi Meribaariari’i;

⁹’yopi i ati pi ma e’yosi andri be kini, Ma ndreni yi ku-ri; eri a’ini vini i ma adripi ku, nini anzi i ma ngulupini ku indio A’disiku yi ’ba yi asi e’yo mini ma dria ’bo, yi mba aziza mini ma ta ra.

¹⁰Yi nga Yakoboni imba e’yo liza minisi, Israelini azita minisi; yi nga obiese vele veri pi ’ba mi drilia, edeta vele piri be, pari mini yini edeta edezuri ma dria.

¹¹Yehova, mi ’ba asi ndriza afa erini ma dria, mi a’i azi erini ’yele drisiri fo; mi ma oso ’ba engapi eri ruaa ’diyi pi ma opile lekeke, ’ba eri ngupi onzi ’diyi be, yi ma enga ani dika ku.

¹²Benyamini ma e’yosi eri ’yo kini, ’Ba Yehovani lele avasiri nga adri e’yo ’yaasi eri ma eri opi eri ci etu zu, eri adri gbudri erini ma eselia.

¹³Yusufu ma e’yosi eri ’yo kini, Yehova ma ’ba asi ndriza angu erini ma dria, afa onyiru tu agapi ra ’bua ’diyi pisi, andrali pie, miri aliru etinia eleri pie,

¹⁴efi etuni fele kazu onyiru tu agapi ra ’diyi pie, afa onyiru tu agapi ra zopi mba vusi mba yusi ’diyi pie,

¹⁵afa ’wara ’wara oni izu oku ’diyini pie, afa onyiru tu agapi ra ani were ’dani ’dani ’diyia ’diyi pie,

¹⁶afa onyiru tu agapi ra nyakua ’diyi pie, afa gapi alenia tre ’diyi be, asi anzuru ’ba ovupi ndra jerearini feleri pie. Asi ndriza ’diri ma emu Yusufu, ma dria, eri ma emu ’ba ndra yini esele cole i adripi be nduri ma dri olu’bua.

¹⁷Eri ma tiago tile okori, diza opiniri erini, o’yu eriniri odru ma o’yuni; eri nga ani suru dria mi cazu kpere wudrikuru ma kalatini asizu ’diyia; yi ’ba alifu mudri alifu mudri Efiraimuni, yi ’ba alifu alu alifu alu Manaseni.

¹⁸Zebuluni ma e’yosi eri ’yo kini, Zebuluni la, mi ma ovu ayikosi fuza minisi; Isakari la, mi ma ovu ayikosi hema minisi.

¹⁹Yi nga ’ba omve muzu oni dria; ’dale yi nga edeta e’yo kililirurini ’diyi ede, a’disiku yi nga afa gapi miri ma alia treri ndru, lonyi zizaru cinya ma alia ’diyi indio

²⁰Gadi ma e’yosi eri ’yo kini, ’Ba fepi Gadini ezuzuri ovu drilebaru! Eri ovu ekile kamiandrirurile, eri wu pi osi dri olu’bu be.

²¹Eri pe esele okori i ma ngulupiniru, a’disiku yi mba esele ’ba azita fepirini ma ta ’daa; eri emu ’ba ’ba drilia ’diyi be tualu, eri ’ye e’yo liza kililiru Yehovaniri, azini e’yo liza erini ’diyi Israeli be.

²²Dani ma e’yosi eri ’yo kini, Danini kamimvani ibipi embupi Basaniari’i.

²³Nafutali ma e’yosi eri ’yo kini, Nafutali la, mi trapi asi basi, gapi tre asi ndriza Yehovanisiri, woko etuni ’derialeruri pi ma ovu esele mini woko uruleruri be.

²⁴Aseri ma e’yosi eri ’yo kini, Aseri ma ovu drilebaru anzisi; eri ma adripi ma a’i eri ra, eri ma su i pa odu alia.

²⁵Ringili mini nga ovu ayani azini molani; okpo mini nga ovu o’du minini ovulerile.

²⁶Yesuruni la, ’ba azini Munguleni yo, tupi acipi ’bu ma dria mi aza kozu, ’bu iriti beri ma dria diza erini opinirisiri’i.

²⁷Mungu ’dani ’daniri pari mini adrizuri’i, wu ’dani ’dani ’diyi ovumi etia. Eri omi ari’ba amve mi driliasi, eri kini, Mi ja yi ma dri ra,

²⁸Te Israeli, yi adri yini e’yo ’yaasi, yi a’di Yakoboniri ini a’dule, angu anya pini ovuzu alenia patiefi ma su beri ma alia; ada, andralini oti ’bu eriniarisini.

²⁹Israeli la, mi ovu ayikoa! A’dini mile suru Yehovani paleniriruni ya? Eri’i gombere mi aza kopiri’i, eri sei diza mini agapi turiniri’i! Ari’ba mini ’diyi nga yi ngulupi ’ba ele mi palaa; mi nga pari yini uruleru ’diyi otu pasi.