Read lugbara Azita Amvizu 5 Bible Online

Azita Amvizu 5 - lugbara bible

Azita Amvizu 5

¹Musa nga Israeli omve i vu dria, nga ’yo yi tia, Israeli la! emi eri e’yo aziza piyi e’yo liza be mani yi olule o’du andru ’dorisi emi bilia ’diyi, emi ma ni yi ani, ma ovu mile be yi ’yezu indio

²Yehova Mungu amani azi ndra aziza ama be Horebua.

³Yehova azi mira aziza ’dori ama a’bipi be ku, te ama be, ama’i ovupi dria idriru o’du andru ’dorisi ’doyi.

⁴Yehova ’yo ndra emi be milia milia oni nderia, engazu aci ma aliarisi,

⁵de mani pa soria Yehova pi ma eselia emi be eru ’darisi, e’yo Yehovani ecezu emi dri; a’disiku emi ovu ndra urisi aci ma e’yosi, emi tuni ndra oni dria ku. Eri ’yo ndra kini:

⁶Ma Yehova Mungu mini, mi ofupi angu Misiriniasi, jo ati’baniasiri’i,

⁷Mi ma ovu Mungu azini be ku, kiri ma’i.

⁸Mi ma ede mi dri wura inzile inziri ku, kani wura i sipi afa ’bua ururi berile, kani afa nyakua, kani afa yi nyaku etiari ma aliari’i ti;

⁹mi ma osi mi kumuti yi drilia ku, mi nga azi yini ku, a’disiku ma Yehova Mungu miniri, ma Mungu a’yaruri, ma atapi ma e’yo onzi ofe yi ma anzi ma ruaa ’ba ma ngupi onzi ’diyi dri kpere a’bianzi nari kani suri vu,

¹⁰te ma asi ndriza ece ’ba ma lepi azita mani ma ta mbapi ’diyi dri kpere cazu alifu alifu.

¹¹Mi co Yehova Mungu mini ma ru toko toko ku; a’disiku Yehova ngani ’ba eri ru copi toko okori ku pirini e’yo kokoru ku.

¹²Mi inzi o’du sabatoni, tani mbazu alaru ekile Yehova Mungu minirini azile mi tiarile.

¹³Mi ma nga azi o’du azia, mi ma ’ye azi mini dria;

¹⁴te o’du aziriri ovu sabato Yehova Mungu minirini; o’du nderisi mi ma nga azi aluni ku, mi’i, mi mvi pie, mi zi pie, ati’bo mini agupiruri pie, ati’bo mini zanaruri pie, ti mini pie, akanya mini pie, anyapa mini pie, ani’bo ovupi aku miniari pie dria; ’dini ati’bo mini agupiruri pi ma li ava ati’bo mini zanarori be tro tro mile.

¹⁵Mi ma ega ’dani e’yo mini ndra ovuzu ati’boru angu Misiria, Yehova Mungu minirini mi ofuzu angu nderiasi dri okporuri pisi wu ejuzaruri beri; e’yo ’disi Yehova Mungu mini azi ndra ani mi ma mba o’du sabatoni ma ta,

¹⁶Mi inzi mi ati pi mi andri be, ekile Yehova Mungu minirini azile mi tiarile; o’du mini ma ovu ani kakau, e’yo mini ma ovu ani drilebaru angu Yehova Mungu minirini fele mi driri ma alia.

¹⁷Mi ’di ’ba ku.

¹⁸Mi ’ba vini ali ku.

¹⁹Mi ogu afa ku.

²⁰Mi eza vini ’ba azini ma ru inzosi ku.

²¹Mi ’ba viru li ’ba azini ma okusi ku; ’ba azini ma jo ma ava ma va mi ku, amvu erini pie, ati’bo erini agupiruri pie, ati’bo erini zanaruri pie, ti erini pie, akanya erini pie, kani afa ngoni ’ba azinini ovuzu yi be ’diyi ti.

²²Yehova ’yo ndra e’yo ’diyi o’duko urusi oni nderi ma dria, ’ba emini ongulumuru ’diyi ma tia dria, aci pi ma aliasi, iriti pie, angu asepi iniciciruri pie; te eri ereni ndra azini drinia ku. Eri si ndra e’yo nde ’diyi oni ’bararu iri ’diyi ma ruaa, nga yi fe ma dri.

²³Te eri nga eca ’dini, emi ka ndra o’duko engapi angu biza ma aliasiri eri, de onini nga veria acisiria, emi esi ma vu ogogo, emi ’ba dria suruti emini ma drileru ’diyi pi ’ba ’wara emini ’diyi be;

²⁴emi ’yo ndra kini, Mi ne, Yehova Mungu amaniri ece diza erini pi ama dri amboni be ’bo, ama eri vini o’duko erini engapi aci aliasiri ’bo; ama ndre vini o’du andru ’dorisi Munguni e’yo ’yoria ’ba be ra, te ti ’ba ovu ’dani idriru.

²⁵Te di ama ma odra curu’do ra a’di e’yosi ya? A’disiku aci ambo ’dori nga ama ve ra; ama ka o’duko Yehova Mungu amanirini eri dika, ama nga odra ani.

²⁶Te ’ba dria rua ari be ’diyi ma azi, Mungu idriruri ma o’duko eripi ra erini e’yo ’yoria aci aliasi, ekile amani erilerile, ovupi ’dani idriruri a’di’i ya?

²⁷Mi si ogogo mi’i, mi eri e’yo dria Yehova Mungu amanirini ngale ’yole ’diyi; mi olu ama tia e’yo dria Yehova Mungu amanirini ngale ’yole mi tia ’diyi; ama nga e’yo ’diyi eri ra, yi ’ye ra indi.

²⁸Yehova eri ndra e’yo emini ma o’duko, emini e’yo ’yoria ma be; te Yehova nga di ’yo ma tia kini, Ma eri e’yo suru ’dorini, yini ’yole mi tia ’diyi ma o’duko ’bo; yi ’yo e’yo dria ’yini ’yole ’diyi ’yeke.

²⁹Yi ka te ovu asi ’dinileri be ma ruzu azini azita mani ’diyi ma ta mbazu dria ’dani, ’yeke fo, ’dini e’yo yini ma ovu yi ma anzipi be drilebaru ’dani ’dani!

³⁰Mi mu ’yo yi tia, Emi mvi hema emmia,

³¹Te mi’ini, mi so nga pa ma ageia ’dia, ma nga ani azita dria mini ngale imbale yi dri ’diyi pi ma e’yo ’yo mi tia e’yo aziza pie, e’yo liza pie dria, yi ma ’ye yi ani angu: mani fele yi dri ovuzu yi ma afarori ma alia beni,

³²E’yo ’disi emi ma ’ba emi asi e’yo ’yezu ekile Yehova Mungu eminirini azile emi tiarile; emi ma oja emi kalaa dri ndia kani dri ejia ku.

³³Emi ma aci geri dria Yehova Mungu eminirini azile emi driri ma alia, emi ma ovu ani idriru, e’yo emini ma ovu drilebaru, emi ma fe o’du emini ovuzu angu emini ngale ’dule eminiruri ma alia ’diyini idrizu drile kakau.