Read lugbara Azita Amvizu 6 Bible Online

Azita Amvizu 6 - lugbara bible

Azita Amvizu 6

¹Azita pi, e’yo aziza ’diyi pie, e’yo liza ’diyi pie, Yehova Mungui eminirini azile emi imbazu, emi ma ’ye yi ani angu emini zozu ’aa’dasi eri ’duzu eminiruri ma alia ’diyi yi ’di;

²mi ma ru Yehova Mungu miniri, mi’i mi mvi pie, mi mvi ma mvi pie, emini ani e’yo liza erini, mani azile emi tia ’diyi pi ma ta: mbazu dria, azita erini ’diyi pie, o’du mini ovuzu idriru ’diyisi dria; ewu mini ma idri i ani izu beni.

³’Dini mi eri, Israeli la, mi ndre onyiru mi ma ’ye yi: e’yo mini ma ovu ani drilebaru, emi ma ezu ani tre beni angu lesu pini gazu alenia tre anyu beri ma alia, ekile Yehova Mungu emi a’bipinirini azile mi tiarile.

⁴Mi eri, Israeli la: Yehova Mungu amaniri eri Yehova alu;

⁵te mi ma le Yehova Mungu miniri mi asi driasi, mi orindi driasi, mi okpo driasi indio

⁶E’yo mani azile mi tia o’du andru ’dorisi ’diyi ma ovu mi asia;

⁷mi ma imba yi asi alusi anzi mini dri, etini nzezu mini riria jo mini ma alia, mini aciria geria, mini laria va, azini mini engaria uru.

⁸Mi ma ombe yi ecetaru mi dri agelia, azini afa a’diza mi andretiariru.

⁹Mi ma si yi jotile mini ma kalaa irile irile, azini vini kalitile mini ’diyi ma ruaa.

¹⁰Te eri nga eca ’dini, Yehova Mungu miniri ka nga mi ofi angu erini azile ndra mi a’bipi Iburahimu pi dri, Isaka pie, Yakobo pie fezu mi driri ma alia, yi aku ambo ambo onyiru mini sile mi’i ku ’diyi,

¹¹azini jo afa onyiru driani gazu alenia tre tre, mini fele gazu mi’i ku ’diyi, azini yi ’bile gazaru, mini gale mi’i ku ’diyi, azini amvu zabibuni ’diyi pi mizeitu pati ’diyi be, mini isile mi’i ku ’diyi, mi ka nga nya, mi ka nga tra ra;

¹²etu nderisi mi ma ne onyiru mi ma avi Yehova mi ofupi angu Misiriasi, jo ati’baniasiri’i ku.

¹³Te mi ma ru Yehova Mungu miniri; ma nga azi eri dri, ma so oyo eri ma rusi.

¹⁴Mi ma bi adrou ma vuti ku, suru mi ageia ’diyi ma adrou i ma azi;

¹⁵a’disiku Yehova Mungu mini ovupi mi eseliari eri Mungu a’yaruri’i; aoko Yehova Mungu minirini kazu dizu mi ruaa, erini ani mi dri jazu nyakuasi, ’dini ku.

¹⁶Emi ma o’bi Yehova Mungu emini ekile emini eri o’bile ndra Masaarile ku.

¹⁷Emi ma mba azita Yehova Mungu eminirini, erini azile mi tia ’diyi pi ma ta, e’yo eti nzeza erini ’diyi pie, e’yo aziza erini ’diyi pie dria.

¹⁸Mi ma ’ye e’yo ovupi kililiru azini onyiru Yehova ma milia ’diyi, e’yo mini ma ovu ani drilebaru, mi ma fi ani angu onyiru Yehovani oyoni sole mi a’bipi ma tia,

¹⁹ari’ba mini dria odrozu amve mi driliasiri ma alia, eri ’duzu miniru.

²⁰Mi mvi ka nga mi zi etu droziirisi kini, E’yo eti nzeza ’diyi pi, e’yo aziza ’diyi pie, e’yo liza ’diyi pie, Yehova Mungu amanirini azile mi tia ’diyi ma efi ngoni ya?

²¹mi nga di ’yo mi mvi ma tia, Ama ovu ndra ati’baru Farauni Misiria; te Yehova ofu ama Misiriasi dri okporu turisi;

²²Yehova ece vini ndra ama milia eceta piyi e’yo osutaru ’diyi be, amboru azini nzizaru tu, Misiri pi ma dria, Farau pie, ori’ba erini ’diyi pie dria;

²³eri ofu ndra ama ’daasi ra, ama ofizu, azini angu erini ndra oyoni sole ama a’bipi tiari fezu ama dri.

²⁴Yehova azi ndra ama ’dri ama ma ’ye e’yo aziza ’diyi dria, Yehova Mungu amaniri ruzu, amani ani drileba isuzu ama ngulupi dri ’dani, ’dini eri ma mba ani ama ta idriru, ekile etu andru ’dorisirile.

²⁵Ama ka ndre onyiru ama ’ye azita ’dori dria Yehova Mungu amaniri ma drilia, ekile erini azile ama tiarile, ’yezu ’diniri nga ovu e’yo kililiruni ama dri.