Read lugbara Azita Amvizu 9 Bible Online

Azita Amvizu 9 - lugbara bible

Azita Amvizu 9

¹Mi eri e’yo fo, Israeli la! Mi Yoridanini zo andru, fizu suru amboru azini okporu mi agapi ra ’diyi ma angu pi nyazu, aku ambo ambo abi kaliru izuruni cazu kpere ’bua’diyi be,

²suru ’wangaraka izutili Anaki anziyiru, mini nile ra mini e’yoni erile kini, A’di eco pa sozaru Anaki anziyi ma driliani ya? ’diyi.

³E’yo ’disi mi ma ni andru kini eri’i dri cepi zopi mi ma drilia ekile ad afa evepi kinyikinyirileri eri Yehova Mungu miniri’i; eri nga yi dri ja ra, nga yi oze va mi drilia; ’dini mi nga yi odro amve, yi ma dri jazu mbele, ekile Yehovani ’yole mi tia ’borile.

⁴Yehova Mungu minirini yi omizu amve mi driliasi ’boria, mi ma ’yo mi asia kini, Yehova ofi ma angu ’diri ’duzu maniru e’yo onyiru manisi, ’dini ku; te Yehovani yi dro amve mi driliasi e’yo onzi yinisi.

⁵Mi fini angu yini ’duzu miniru e’yo onyiru minisi, kani mi asini ovule kililirurisi, ’dini ku; te e’yo onzi suru ’diyinirisi Yehova Mungu miniri odro yi mi ma driliasi, eri ma fe e’yo erini ndra oyoni sole mi a’bipi Iburahimu pi ma tia, Isaka pie, Yakobo pierini pa sozu kirikiri.

⁶E’yo ’disi mi ma ni Yehova Mungu miniri feni angu onyiru ’diri mi dri ’duzu miniru onyi minisi ku; a’disiku mi suru ombe mbaza beri’i.

⁷Mi ega e’yo ndra mini fezu aokoni engazu Yehova Mungu miniri ma asia roko driari, mi dri ma avi ani ku; engazu o’du mini efuzu angu Misiriasirisi ecazu emini efizu pari ’dori ma aliaria, emi le mbu Yehova ma ruaasi amve ’dani.

⁸Emi fe ndra vini aoko Yehovani engazu Horebua indi, Yehovani ovuzu ani aokosi emi vu, lezu emi dri jazu.

⁹Mani ndra turia oni dria muzu oni ’bararu ’diyi a’izu, yi oni ’bararu aziza Yehovani azile emi berini ’diyi, ma ovu ndra oni dria o’du kali su etusi inisi; ma nyani nyaka ku, ma mvuni yi ku indio

¹⁰Te Yehova fe ndra ma dri oni ’bararu iri, drileju Mungunini e’yo osizu yi ma driani ’diyi; si e’yo dria Yehovani ’yole emi tia oni dria aci aliasi o’du okuzanirisi ’diyi yi ma ruaa ci.

¹¹Eri eca ndra ’dini, o’du kali su etusi inisi ’diyi ka yi de ra, Yehova fe ndra ma dri oni ’bararu nde ’diyi iri, yi oni ’bararu azizani ’diyi.

¹²Yehova nga di ’yo ma tia kini, Mi nga, mi si ’doarisi va mbele; a’disiku ’ba mini, mini ofule ejile Misiriasi ’diyi eza yi ’bo; yi oja yi kalaa, geri mani azile yi driri kuzu mbele; yi ede yi dri wura inzile inziri aya akapi acisirisi ’bo.

¹³Yehova ’yo vini ma tia kini, Ma ndre suru ’diri ’bo, te yi ’ba ombele be mbazaru ’diyi;

¹⁴mi ku nga ma, ma ma ja yi dri ani, ma ma ini yi ma ru ’bu etiasi; te ma nga mi ’ba ovuzu suru okporu azini amboru yi agapi rariru.

¹⁵Ka’dini ma nga di ma oja sizu oni driarisi va, de onini ve acisi ve ve; te oni ’bararu azizani iri ’diyi ma dria ci.

¹⁶Ma ndre ra, te mi ne, emi ’ye onzi Yehova Mungu eminiri vu ’bo; emi ede emi dri kojamva ma wura aya akapi acisirisi; emi oja emi kalaleru ’bo, geri Yehovani azile emi driri kuzu mbele.

¹⁷Te ma nga oni ’bararu iri ’diyi o’du dri irisi, yi o’bezu va, yi ofuzu emi ma milia ra.

¹⁸Ma nga di ma eco va Yehova ma drilia, ekile okorile, o’du kali su etusi inisi; ma nyani nyaka ku, ma mvuni vini yi ku, e’yo onzi dria emini ezale, emini e’yo ovupi onzi Yehova ma miliari ’yele, fezu eri ma aokoni engazurisi.

¹⁹A’disiku ma ovu urisi Yehova ma aoko pi ma e’yosi adra erini aciruri be, aokoni eri nyale erini lezu ani emi dri jazurisi. Te Yehova eri vini e’yo mani ewu nde ’darisi ra.

²⁰Te Yehova ovu aokosi tu Aroni vu, le ani eri ma dri ja ra; ma zi vini Mungu Aroni ma e’yosi ewu nde ’darisi indi.

²¹Ma nga di ezata eminiri ’du, eri kojamva emini edeleri’i, ma nga eri eve acisi, nga eri odi eri ’izu furaru inikini ekile irifurale; ma da furani yi raza ibipi erapi oni driarisi vari ma alia.

²²Emi fe ndra vini aokoni Yehovani nyazu Tabera pia, Masa pie, Kibiroti-hatava pie dria.

²³Yehovani emi ti peria engazu Kadesibarineasi, ’yozu kini, Emi tu angu mani fele emi dri ’bori ’duzu eminiru, etu ndesi emi mbu amve azita Yehova Mungu eminirini gazu si, emi a’ini Munguni ku, emi erini o’duko erini ku indi.

²⁴E’dozu troa o’du ndra mani emi nizurisi, emi ovu ’ba mbupi Yehova ma ruaasi amve ’diyiru ’dani.

²⁵’Dini ma eco ma va Yehova ma drilia o’du kali su etusi inisi, o’du mani ma ecozu va ’diyi, Yehovani ’yole i nga emi dri ja rarisi.

²⁶Ma zi Yehova tia kini, Opi Yehova la! mi ja ’ba mini, mi ma yilaru, mini onzele ambo minirisi, mini ofule ejile Misiriasi dri okporu minirisi ’diyi ma dri ku fo!

²⁷Mi ega ati’ba mini Iburahimu pi ma e’yo, Isaka pie, Yakobo pie; mi lu asi mbaza ’ba ’diyini ku, kani ezata yini, kani e’yo onzi yini ku indi fo,

²⁸angu ndra mini ibizu ama ofuzuri kazu ’yozui ’dini ku kini, Yehova ofu yi yi ofuzu roko dria, erini ecole yi jile angu! erini azile ndra yi driri ma alia kurisi, azini vini erini yi ngule onzirisi.

²⁹De yi ovu ’ba mini, mi ma yilaru, mini ndra ofule okpo amboru minirisi, azini wu ejuzaru minirisi ’diyi.