Read lugbara Yohana 10 Bible Online

Yohana 10 - lugbara bible

Yohana 10

¹Ma ’yo emi tia ndi ndi, ’ba fipi lico kabilo vileri ma tilesi ku te tupi geri azinisiri, ’ba nde eri oguouni azini ’ba afa opapiri indi.

²Te ’ba fipi tilenisiri eri ’ba kabilo ocepiri’i.

³’Ba tileni ma agei tepiri nga zi eri drini; kabilo yi nga o’duko erini eri ra, eri omve i ma kabilo ’diyi rusi rusi, eri ce yi dri amve.

⁴Eri ka kabilo ini ofu dria amve ’bo, eri mu yi drilia, kabilo nga eri ma vuti bi, yini eri ma o’duko nile rarisi,

⁵Yi ngani ani’bo ma vuti bi ku, te yi nga apa erisi, yini o’duko ani’bani nile kurisi.

⁶Yesu ’yo e’yo o’beza ’diri yi tia, te yi vani e’yo erini ’yole yi tia ’diyi ma eli ku.

⁷Yesu nga ’yo ani yi ria dika kini, Ma ’yo emi tia ndi ndi, ma jotile kabiloniri ma’i.

⁸’Ba dria emupi ma drilia oko ’diyi yi ogouni azini ’ba afa opapi ’diyi; te kabilo erini yi ku.

⁹Ma jotileni; ’ba azini ka fi ma vurisi, eri nga i pa ra; eri nga fi eri nga fu, eri nga iribi isu ra.

¹⁰Oguou emuni e’yo azinisii ku, emu kiri oguzu, ’ba ’dizu, ’ba dri jazu a’dule; te ma emu yi ma ovu ani idri be, yi ma ovu eri be tu aga ra.

¹¹Ma ’ba kabilo ocepi bari. ’Ba kabilo ocepi bari idri ini ku kabilo ma e’yosi.

¹²’Ba azi ngapi oyasi ovupi ’ba kabilo ocepiri’i ku, kabiloni ovuzu eri ma ngulupini kuri, erini ’balau ndreta emuria eri ku kabiloni, eri apa apa, ’balauni nga yi obi, nga yi ere ra.

¹³Eri apa erini ovule kiri ’ba azi ngapi oyasiri’irisi, azini kabilo ma e’yoni eri vale kurisi.

¹⁴Ma ’ba kabilo ocepi bari; ma ni kabilo mani ra, mani ’diyi ni vini ma ra,

¹⁵ekile ma Atini ma nile ra, mani vini ma Atini nilerile; azini ma idri mani ku kabilo ma e’yosi.

¹⁶Kabilo azini mani indi ovupi kabilo jo ’dirini ku ’diyi; le ma ma eji yi indi, yi nga o’duko mani eri ra. Ngulumuniri nga ovu alu, ’ba ocepiri alu.

¹⁷E’yo ’dirisi ma Ati le ma ra, mani idri mani kule va, ’dini ma ma e’du eri dika benirisi.

¹⁸’Ba aluni pani idri mani ma driasi ku, te ma ’ba eri va ma drisi ceni. Ma okpo indi eri ’bazu va, azini ma okpo indi eri e’duzu dika. Azita ’diri ma a’i ma Ati dri,

¹⁹Agata nga efu dika ’ba Yahudini ma eselia e’yo ’diyisi.

²⁰’Ba karakarau yi eselia ’yo ra, Eri orindi onzi be, eri aza aza; emi eri eri a’disi ya?

²¹’Ba azini yi ’yo ra, E’yo ’diyi ovuni ’ba orindi onzi berini ’yoleniri’i ku. Orindi onzi eco ’ba mile kokoruri ma mile zizaru ra ya?

²²O’du ’dasi omu hekalu fezu Mungu driri Yerusalemua indi;

²³isu eri ewu anguni ambizuri; azini Yesu aci hekalua Sulemani ma jobileko enasi.

²⁴’Ba Yahudini ace eri agei kuru ani, nga ’yo eri tia kini, Mi fe nga ama asini aba ewu ngopi ya? Mi ka ovu Kristo’i, mi olu ama tia mgba.

²⁵Yesu nga e’yo omvi yi tia kini, Ma-olu emi tia ra, te emi a’ini ku. ’Yeta mani ’yele ma Ati ma rusi ’diyi yi nze e’yo eti masini;

²⁶te emi a’ini ku, emini ovule kabilo mani kurisi,

²⁷Kabilo mani yi o’duko mani eri ra, ma ni yi ra, yi ma vuti bi indi;

²⁸azini ma fe yi dri idri ’dani ’daniri; yi ngani dri ja ’dani ’dani ku, azini ’ba aluni ngani yi pa ma dria okposi ku.

²⁹Ma Ati yi fepi ma driri aga dria; ’ba aluni ecopi vini yi papi ma Ati ma dria okposini yo.

³⁰Ama ma Ati be alu.

³¹’Ba Yahudini nga di ani o’du dika eri o’bezu.

³²Yesu nga e’yo omvi yi tia kini, Ma ece emi dri ’yeta onyi be kakau engapi ma Ati vu ’diyi; ’yeta ’diyi ma eselia emini ma o’bezu ani onisiri ngori ya?

³³’Ba Yahudini nga e’yo omvi eri tia kini, Ama o’beni mi ’yeta onyi berisi ku, te o’datasi; te mi’i, de mi ’bani, tinini mi ’bale Mungu’irisi.

³⁴Yesu nga omvi yi tia kini, Eri ovuni sizaru azita emini ma alia kini, Ma ’yo ra, emi munguni, ’dini ku ya?

³⁵Te eri ka ’ba e’yo Mungunini ecazu yi vu ’diyi omve munguru (te e’yo siza econi ovuzaru i toko ku),

³⁶emi di ’yo ’ba Atani ’bale alatararu, tini epele nyakuari ma e’yosi kini, Mi a’data o’da, ’dini, mani ’yale, Ma Mungu ma Mvi’i-risi ya?

³⁷Ma ka ’yeta ma Atini ’ye ku, emi ma a’i ma ku;

³⁸te ma ka yi ’ye ra, emi ka ma a’i ku ti, emi ma a’i ’yeta nde ’diyi; emi ma ni, emi ma va indi kini Ata eri ma alia, azini ma ovu Ata alia indi.

³⁹Yi ndru eri bizu dika, te eri fu yi driasi ra.

⁴⁰Eri fu mu dika Yoridani ma tia ’aa’dasi, pari ndra Yohanani baputizi fezu okoria, eri ovu ’daa.

⁴¹’Ba karakarau emu vunia; yi nga ’yo kini, Yohana ’yeni eceta aluni ku, te e’yo dria Yohanani ’yale ’ba ’diri ma e’yosi ’diyi yi adaru.

⁴²’Ba karakarau a’i eri ’daa.