Read lugbara Yohana 11 Bible Online

Yohana 11 - lugbara bible

Yohana 11

¹Agu alu eri ndra azoru, runi Lazaro Betaniari, aku nderi! Mariamu pini amvi Marita beri’i.

²Mariamu ’diri Opi ma rua efipi odusi eri ma pa inipi dribisiri’i; Lazaro azo beri eri ma adri’i.

³E’yo ’disi amvipi erini pe ani ’ba’i ti eri vu ’yozu, Opi, mi ndre, ’ba mini leleri eri azoru,

⁴Te Yesu ka e’yo eri ra, eri ’yo ra, Azo ’diri eri ’bani drazuri’i yo, te diza Mungunisi, Mvi Munguni ma isu diza erisi ani beni.

⁵Te Yesu le Marita pi, amvi be, Lazaro pie avasi.

⁶Eri ka eri ani kini eri azoru, eri ovu di pari erini ovuzuria o’du iri.

⁷Vilerisi eri nga di ’yo ’ba erini imbale ’diyi ma ria, Ama mu Yudiaa dika.

⁸’Ba erini imbale ’diyi nga ’yo eri ria, Rabi, curu’do ’ba Yahudini yi ndru mi o’bezu onisi yare; mi mu ’dale dika ya?

⁹Yesu nga e’yo omvi, Etu o’du aluni ovuni mudri drini iri ku ya? ’Ba ka ad etusi, kumu ngani eri pa si ku, erini diza nyaku ’dirini ndrelerisi.

¹⁰Te ’ba ka aci inisi, kumuni nga eri pa si ra, dizani ovule eri alia kurisi.

¹¹Eri ’yo e’yo ’diyi ra, te vilerisi eri ’yo yi tia, Ama agyi Lazaro ko o’du ’bo, te ma mu ra ma ma enga eri o’duasi beni.

¹²’Ba erini imbale ’diyi nga ’yo tinia ani, Opi, eri ka o’du ko ra, eri nga i pa ra.

¹³Isu de Yesu ’yo drata erini ma e’yo, te yi ega kini eri ava liza o’du kozasiri ma e’yo ’yo’i.

¹⁴Yesu nga di ’yo ani yi tia mgba kini, Lazaro dra ’bo.

¹⁵Ma ovu ayikosi emisi mani ovule ’daa kurisi, ’dini emi ma a’i ani beni; te ama mu di eri vu.

¹⁶Toma ’bani omvele Ejoruri ’yo ani i agyi Yesuni imbale ’diyi ma tia, Ama mu alu indi, amai ma odra eri be.

¹⁷Te di Yesu ka eca ra, eri isu de eri la gulea ca o’du su ’bo.

¹⁸Isu Betani ovu inyia Yerusalemu vu ogogo ekile mailo iri ’dipile

¹⁹’ba Yahudini kakau emu Marita pi vu Mariamu be, yi asi omizu adripi yini ma e’yosi.

²⁰Marita ka eri kini Yesuni emu emu, eri nga mu dri fu eri be, te Mariamu ri nga ini joa ’dani.

²¹Marita nga ’yo Yesu tia ani, Opi, mi ka ndra ovu ’doa, te’do adripi mani drani ku.

²²Te di curu’do ma ni ra kini e’yo ngoni ngori mini a’ile Mungu driri, Munguni nga fe mi drini.

²³Yesu nga ’yo eri tia, Mi adrini nga enga dika.

²⁴Marita nga ’yo eri tia, Ma ni ra eri nga enga dika engata o’du ewuni asizurisiri ma alia.

²⁵Yesu nga ’yo eri tia, Ma engatani, ma idrini indi; ’ba ma a’ipiri, ka dra ti, eri nga ovu idriru;

²⁶azini ’ba ovupi idriru ma a’ipiri ngani dra ’dani ’dani ku. Mi a’i ’diri ra ya?

²⁷Eri nga ’yo eri ria, E Opi; ma a’i ra kini mi Kristo, Mvi Munguni, emupi nyakuari’i.

²⁸Eri ka e’yo ’diri ’yo ’bo, eri nga fu mu i amvi Mariamuni omve ndindiru, kini, ’Ba ’ba Imbapiri eri ’doa ’do, eri mi omve.

²⁹Eri’i eri ka eri ra, eri enga mbele, mu vunia.

³⁰Te Yesu ecani nga de akua ku, te ovu nga ’dani pari te yini dri fuzu Marita beria.

³¹’Ba Yahudini ovupi Mariamu be joa, eri ma asi omipi ’diyi, ka eri ndre engaria mbele furia, yi bi eri vuti, yini osuria yi asia kini eri mu wuzu gulea ’daa.

³²Mariamu ka eca ani pari Yesuni ovuzuria, eri eco i va Yesu ma palaa, kini, Opi, mi ka ndra ovu ’doa, te’do adripi mani drani ku.

³³Yesu ka di ndre erini wuria, azini ’ba Yahudini emupi eri be ’diyini wuria indi, candi ga eri ma orindia tre, asini nga ota ota;

³⁴eri ’yo ra, Emi ’ba eri ngoa ya? Yi ’yo eri tia, Opi, mi emu ndre.

³⁵Yesu nga wu mindresi.

³⁶’Ba Yahudini nga ’yo ani, Mi ndre, le eri’doni!

³⁷Te ’ba azini yi eselia ’diyi ’yo ra, ’Ba ’ba mile kokoruri ma mile zipi ’diri, econi ndra erini e’yo ’yezaru ’ba ’dirini drazu ku, ’dinini ku ya?

³⁸De candini garia eri ma asia tre ’dini, Yesu nga ca gulea. Eri ovu oni ojini, gu oni tilenia ci.

³⁹Yesu ’yo ra, Emi gu oni amve. Marita, ’ba drapiri ma amvi, ’yo eri tia, Opi la, ngu curu’do ngu ngu avuni la ca o’du suni ’do.

⁴⁰Yesu nga ’yo eri tia, Ma ’yoni te mi tia kini mi ka a’i ra, mi nga diza Munguni ndre rari ku ya?

⁴¹Yi nga di oni gu amve ani. Yesu nga i mile enga uru, nga ’yo ra, Ata, ma ’yo awa’difo mi dri mini ma erile rarisi.

⁴²Ma ni ra mi ma eri etuzu, te ma ’yo ’ba ongulumuru pa osopi ageinia ’diyi ma e’yosi, yi ma a’i ani kini mi epe ma tini mi’i beni.

⁴³Eri ka e’yo ’diyi ’yo ’bo, eri nga tre o’duko urusi kini, Lazaro, mi efu amve ’doa

⁴⁴’Ba drapi ’bori nga efu ra, de drini pi pa be ovu nga otizaru bongo ’ba sazu ’biliarisi, oti vini mileni kitambalasi. Yesu ’yo yi tia, Emi ayu eri, emi ku eri ma mu.

⁴⁵’Ba Yahudini kakau emupi Mariamu vu, e’yo erini ’yeleri ndrepi ’diyi a’i eri ra;

⁴⁶te ’ba azini yi eselia nga fu mu ’ba Farisaini vu, nga e’yo Yesuni ’yeleri olu yi ria ra.

⁴⁷Kuhani amboru piyi ’ba Farisaini be nga ’ba e’yo amapi ’diyi oku ani, yi ’yo ra, Ama a’di ’ye ya? A’disiku ’ba ’diri eri eceta ’ye kakau.

⁴⁸Ama ka eri ku ’dini, ’ba dria yi nga eri a’i ra; ’ba Rumini yi nga emu ani, nga pari amani pi opa suru amani be ra.

⁴⁹Te ’ba alu yi ma eselia, Kaifa’i, ovupi kuhani amboru eli ’dasiri ’yo yi ria, Emi nini e’yo aluni ku;

⁵⁰azini emi egani vini aluni ku kini eri onyiru emi dri ’ba alu ma dra ’ba driasi, suru ma ja dri pi ku beni.

⁵¹Te eri ’yoni e’yo ’diri i ma ngulupi ma e’yosi ku, te erini ovule kuhani amboru eli ’dasirisi, eri e’yo Yesuni ’yezu drazu suru ndesiri ma e’yo ondri;

⁵²azini suru nderisi a’dule ku, te eri ma oku anzi Munguni yi erepi ndu ndu ’diyi tualu indi.

⁵³’Dini engazu o’du ’dasi yi nga di ’ba e’yo otu eri fuzu,

⁵⁴E’yo ’disi Yesu acini mgboru ’ba Yahudini ma eselia dika ku; te eri nga ’daarisi fu mu angu roko ageiaria, kpere aku omvele Efiraimu’iria; eri ovu ’daa ’ba erini imbale ’diyi be.

⁵⁵Isu ’ba Yahudini vile omu agaza ’ba drilesiri ovu ogogo; ’ba karakarau enga angu amveria, tu mu Yerusalemua de omu agaza ’ba drilesiri ecani nga ku, yini yi ’bazu alaru beni.

⁵⁶Yi nga Yesuni ndru ani, yini pa osoria hekalu ma alia, yi ’yo yi eselia, Emi ega ngoni ya? Eri ngani emu omua ku ya?

⁵⁷Isu kuhani amboru piyi ’ba Farisaini be fe azita ’bo, kini ’ba ka pari erini ovuzuri ni ra, eri ma ece e’yoni, ’dini yi ma bi eri ani beni.