Read lugbara Yohana 12 Bible Online

Yohana 12 - lugbara bible

Yohana 12

¹ O’du azia de nga omu agaza ’ba drilesirini ecazu kuria, Yesu nga emu Betania, pari Lazaro Yesuni engale ’ba draza ma eselia rini ovuzuria.

²Yi a’di eri dri nyaka ondre beri omuru ’daa; Marita nga omu nde ma azini, te Lazaro ovu ’ba ripi eri be nyaka tia ’diyi ma azi.

³Mariamu nga lu’bu odu arikariru alaru ’bani jele aje ambosiri beri ’du, nga Yesu ma pa efi ani, eri nga pani ini dribi i ma driarisi; odu nde ma aji nga ga jo ma alia tre.

⁴Te Yudasi Isikariote, ’ba erini imbale ’diyi ma azi alu (’yepi eri ma o’di nyapiri) nga ’yo ra,

⁵Ozini odu ’diri silingi turu nasi fezu ’ba aliarioru ’diyi dri ku a’disi ya?

⁶Eri ’yoni e’yo ’diri erini ’ba alioru ’diyi lelerisi ku, te erini ovule oguounirisi, a’disiku erini ovuria jurua be, eri adri afa ’bale alenia ’diyi o’du ra.

⁷Yesu nga ’yo ani, Mi ku eri, eri ma mba eri ma ta kpere o’du ma sazuri tezu.

⁸Te ’ba alioru ovu emi be etuzu ’dani, te ma ovuni emi be etuzu ’dani ku.

⁹’Ba ongulumuru kakau ’ba Yahudini ma eselia ’diyi ka eri kini eri ’daa, yi emu ra, te Yesu ma e’yosi a’dule ku, te yi ma ndre Lazaro erini engale ’ba draza ma eseliari alu indi.

¹⁰Te ’ba kuhani amboru ’diyi yi ’ba e’yo otu Lazaroni fuzu indi,

¹¹a’disiku erisi ’ba Yahudini kakau yi fu mu Yesuni a’izu.

¹²Drusi ’ba ongulumuru kakau emupi omua ’diyi ka eri kini Yesuni emu Yerusalemua,

¹³yi ’du ndende ma arakala, fu mu dri fuzu eri be, yi nga otre uru kini, Hosana! ’Ba emupi Opi ma rusiri ma ovu inzizaru, eri Opi Israeliniri’i!

¹⁴Te Yesu ka akanyamva isu ra, eri nga tu ri drinia; ekile erini ovule sizarurile,

¹⁵Mi ru ku, Zioni zi la; mi ndre, Opi mini emu emu erini riria akanyamva ma dria!

¹⁶’Ba erini imbale ’diyi vani e’yo diri okorisi ku; te Yesu ka diza ini isu ’bo, yi nga e’yo ega yi asia ndo kini e’yo ’diyi ovu sizaru eri ma e’yosi, azini kini yi ’ye e’yo ’diyi eri vu.

¹⁷’Ba ongulumuru ovupi eri be erini Lazaroni omveria gule aliarisi, azini erini eri engaria ’ba draza ma eseliarisi ’di yi nze e’yo eti erisi.

¹⁸E’yo ’disi ’ba ongulumuru yi fu mu dri fu eri be, yini erile kini eri ’ye eceta ’diri ’borisi.

¹⁹’Ba Farisaini nga ’yo yi eselia ani, Emi lu, emi ’yeni afa aza kozaruni ku; mi ndre, wudrikuru dria fu mu eri vutisi.

²⁰Isu ’ba Girikini ma azi ’diyi indi ’ba tupi mupi ’diyi ma eselia, muzu Mungu inzizu omu nde ma alia.

²¹’Ba ’diyi emu Filipo engapi Betesaida Galiliari ma aliari vu, yi zi eri tia kini, Opi, ama le Yesuni ndre,

²²Filipo emu e’yoni olu Andarea tia; Andarea pi emu Filipo be e’yoni oluzu Yesu tia.

²³Yesu nga e’yo omvi yi tia kini, Etu eca ’bo, ’dini Mvi ’bani ma isu diza ani.

²⁴Ma’yo emi tia ndi ndi, anyaefi ka ’de nyakua, ka dra ku, eri nga ovu a’dule; te eri ka dra ra, eri nga efi ka kakau.

²⁵’Ba i ma idri lepiri, eri nga avi eri dri ra, te ’ba i ma idri ngupi nyaku ’doriari nga eri ma ta mba ecazu idri ’dani ’daniri vu.

²⁶’Ba azini ka azi ’ye ma dri, eri ma bi ma vuti; azini pari mani ovuzuria, ’daa ’ba ma azi ’yepiri nga ovu alu indi; te ’ba azini ka azi ’ye ma dri, ma Atini nga eri inzi ra.

²⁷Curu’do ma asini oti oti ma di ngori ’yo ya? Ata, mi pa ma etu ’dirisi. Te e’yo ’disi ma eca bani etu ’diri vu.

²⁸Ata, mi fe mi ru ma ovu dizaru. O’duko nga di enga ’bua ani, kini, Ma ’ba eri dizaru ’bo, ma nga eri ’ba dizaru dika.

²⁹’Ba ongulumuru pa osopi ogogo, o’duko nde eripi ’diyi, nga di ’yo kini ovi fini. ’Ba azini kini, Malaika ’yo e’yo eri beni.

³⁰Yesu omvi e’yo ’yo ra, O’duko ’diri emuni ma e’yosi ku, te emi ma e’yosi.

³¹Curu’do e’yo liza nyaku ’diriniri indi, curu’do yi nga ambo nyaku ’dori ma dri cepiri ’be amve.

³²Te ma’i, yi ka ma ’du uru, nyaku ma drilesi, ma nga ’ba dria ose ma ngulupi vu.

³³Te eri ’yo e’yo ’diri, dra erini ’yezu drazuri ma e’Yo ecezu.

³⁴’Ba ongulumuru omvi e’yo eri tia ani, Ama eri e’yo azita ma alia kini Kristoni ovu ’dani ’dani. Mi ’yo te ngoni ngoni kini yi ma nga Mvi ’bani ’du uru ya? Mvi ’bani ’diri eri a’di’i ya?

³⁵Yesu nga ’yo yi ria ani, Ewu dizani ovuzu nga emi eselia indiri ace were. Emi ad de dizari nga emi vu indi, ini kazu emi isuzu ku; ’ba acipi ini aliari nini pari ini muzuri ku.

³⁶De dizari nga emi vu indi, emi a’i diza nderi, ’dini emi ma oja emi anzi dizaniru beni. Yesu ka e’yo ’diyi ’yo ’bo, eri nga fu yi vurisi, mu i zizu ra.

³⁷Te eri ka tro tali ’ye yi milia kakau ’dopi ti, yi a’ini eri ku;

³⁸’dini e’yo nabi Isayani ’yoleri ma ’ye i paria ani, kini: Opi, a’di a’i e’yo amani olulerini ya? Dri Opini e’da i a’di dri ya?

³⁹Te e’yo ’disi econi yini a’izaru ku, a’disiku Isaya ’yo dika kini,

⁴⁰Eri obi yi ma mile ci, eri ’ba yi ma asi mbazaru ’bo, yi kazu ndrezu yi ma milesi ku, yi kazu e’yo nizu yi ma asisi ku, i yi kazu yi ojazu mani yi atizu ani i ku.

⁴¹Isaya ’yo ndra e’yo ’diri erini diza erini ndrelerisi, erini vini e’yo ’yole erisirisi.

⁴²Ka adri ’dini ti, i ’ba ’waa ma eselia ’ba kakau a’i eri, ra te yi e’dani eri ku ’ba Farisaini ma urisi, yi kazu yi odrozu pari i ’bani yi okuzuria ku:

⁴³te yi le diza ’bani feleniri aga diza Munguni feleniri ra.

⁴⁴Te Yesu eri nga tre uru ’yo, ra, ’Ba ma a’ipiri, eri a’ini ma ku, te ’ba ma ti epepiri’i.

⁴⁵Azini ’ba Ima ndrepiri eri ndre ’ba ma ti epepiri.

⁴⁶Ma emu nyakua diza nyakuniru, ’dini ’ba dria alu alu ma a’ipiri ma ovu ini alia ’dani ku.

⁴⁷Te ’ba azini ka e’yo mani ’yoleri eri ra, ka tani mba ku, ma lini e’yo erini ku; a’disiku ma emuni e’yo nyakuni lizu ku, te nyaku nde pazu.

⁴⁸’Ba ma gapi si e’yo mani a’ipi kuri, ’ba e’yo lipi driniari indi; e’yo mani ’yoleri, e’yo nderi nga eri ma e’yo li o’du ewuni asizurisini.

⁴⁹A’disiku ma ’yoni e’yo ma drisi ku; te Ata ma ti epepiri azi ma dri e’yo mani ngale ’yoleri pi e’yo mani ngale oluleri beni.

⁵⁰Ma ni ra azita erini eri idri ’dani ’daniri. ’Dini e’yo mani ’yole ’diyi, ma ’yo ekile Atani ’yole ma tia ’borile.