Read lugbara Yohana 14 Bible Online

Yohana 14 - lugbara bible

Yohana 14

¹Emi asi ma oti ku; emi Mungu a’i ra, emi a’i ma indi.

²Pari ’bani ovuzu ’diyi ovu ma Ati ma loa kakau; ka’dini yo, ma ndra olu emi tia ra, ma mu pari edezu emi dri.

³Ma ka mu, ka pari ede emi dri, ma nga emu dika, ma nga emi a’i ma vu, ’dini emi ma ovu pari mani ovuzuria alu indi.

⁴Emi ni: angu mani muzuri ma geri ra.

⁵Toma nga ’yo tinia, Opi, ama nini mi mu ngoari ku; ama di geriniri ni ngoni ngoni ya?

⁶Yesu nga ’yo tinia, Ma gerini ma’i, ma e’yo adaruni ma’i, ma idrini ma’i ’ba aluni cani Ata vu ku, pe lu kiri ma vurisi ka.

⁷Emi ka ndra ma ni ra, te’do emi ni ma Atini alu indi; te engazu curu’do emi ni eri ra, emi ndre vini eri ’bo indi.

⁸Filipo ’yo eri tia, Opi, mi ece ama dri Atani, ’diri nga dri fu ama dri.

⁹Yesu nga ’yo eri tia, Ma ovu di emi be ewu kakau ’dipi, te mi nini nga ma kiri ku ya, Filipo? ’Ba ma ndrepi ’bori, ndre Atani ’bo; mi ’yo te kini, Mi ece ama dri Atani-ri ngoni ngoni ya?

¹⁰Mi a’ini kini ma ovu Ata alia, Ata ovu ma alia indi ’dini ku ya? E’yo mani ’yole emi tia ’diyi ma oluni ma drisi ku; te Ata ovupi ma alia ’daniri eri ’yeta ini ’yeni.

¹¹Emi ma a’i kini ma ovu Ata alia, azini Ata ovu ma alia indi; ka ku emi ma a’i ma ’yeta nde ’diyi ma e’yosi.

¹²Ma ’yo emi tia ndi ndi, ’ba ma a’ipiri nga ’yeta mani ’yele ’diyi ’ye indi; eri nga vini ’yeta ’diyi agapi ra ’diyi ’ye, mani mule Ata vurisi.

¹³E’yo ngoni ngori emini zile ma rusiri, ma nga ’ye ra, ’dini Ata ma isu ani diza Mvi ma alia beni;

¹⁴emi ka e’yo ngoni ngori zi ma rusi ti, ma nga ’ye ra.

¹⁵Emi ka ma le ra, emi nga azita mani ’diyi ma ta mba ra.

¹⁶Azini ma nga zi Ata tia, eri nga emi dri ’Ba emi Aza Kopiri azini fe, eri ma ovu ani emi be ’dani ’dani,

¹⁷eri Orindi e’yo adaruniri’i, nyakuni ecole a’ile kuri, a’disiku yi ndreni eri ku, yi nini vini eri ku indi; te emi ni eri ra, erini ovule emi be ’dani, azini erini ngale ovule emi aliarisi.

¹⁸Ma ngani emi ku imvoanziru ku; ma emu emi vu ra.

¹⁹Ace were nyaku ngani ma ndre dika ku, te emi nga ma ndre ra; mani ovule idrirurisi emi nga ovu idriru indi.

²⁰O’du nde ’darisi emi nga ni ma ovu ma Ati alia, emi ovu ma alia, azini ma ovu vini emi alia indi.

²¹’Ba ovupi azita mani ’diyi be, yi ma ta mbapiri, eri ’ba ma lepiri’i; ’ba ma lepiri, ma Atini nga eri le ra, ma vini nga eri le indi, ma nga ma a ngulupi ece eri dri.

²²Yudasi (ovupi Isikariote kuri’i) ’yo eri tia, opi, a’di e’yo ’ye ini, mini mi ngulupi ecezu ama dri te nyaku dri ku ya?

²³Yesu nga e’yo omvi, ’yo eri tia, ’Ba ka ma le ra, eri nga e’yo mani ma ta mba ra; ma Atini nga Jeri le ra, ama nga emu eri vu, ama ga pari amani ovuzuri ede eri vu.

²⁴’Ba ma lepi kuri mbani e’yo mani ’diyi ma ta ku; e’yo emini erileri eri mani yo, te eri Ata ma ti epepirini.

²⁵E’yo ’diyi ma ’yo emi tia ’bo, mani nga ovuria emi beria.

²⁶Te ’Ba ’ba Aza Kopiri, Orindi Alatararu, Atani ngale tini epele ma rusiri’i, eri nga emi imba e’yo driasi, eri nga fe emi ma ega e’yo dria mani ’yole emi tia ’diyi ra.

²⁷Ma ku asi anzuru emi vu; ma fe emi dri asi anzuru maniri; te ma feni emi dri nyakuni felerile ku. Emi asi ma oti ku, emi ma ovu urisi ku indi.

²⁸Emi eri e’yo mani ’yole emi tiari kini, Ma mu ra, te ma emvi emi vu ra. Emi ka te ma le ra, emi te ovu ayikosi, mani mule Ata vurisi; a’disiku Ata aga ma ra.

²⁹Curu’do ma olu emi tia ’bo de nga e’yo nderi ’yeni i ku, ’dini eri ka nga i ’ye ra, emi ma a’i ani.

³⁰Ma ngani asi e’yo ’yo emi be kakau ku, opi nyaku ’dirinirini emulerisi. E’yo erini ma alia aluni yo;

³¹te nyaku ma ni ani ma le Atani ra, ma adri ’ye ekile Atani e’yo azile ma tiarile. Emi nga, ama mu ’doarisi ra.