Read lugbara Yohana 16 Bible Online

Yohana 16 - lugbara bible

Yohana 16

¹Ma olu e’yo ’diyi emi tia ’bo, yi kazu emi fezu abazu ku.

²Yi nga emi odro jo ’bani yi okuzu ’diyiasi; ada etuni emu ra, ’ba dria emi ofupi ’diyi nga ega kini yi azi inzitaru ’ye Mungu dri.

³Yi nga e’yo ’diyi ’ye, yini ama nile ma Ati be kurisi.

⁴Te ma ’yo e’yo ’diyi emi tia ’bo, ’dini etu yiniri ka nga eca ra, emi ma ega kini ma olu ndra e’yo ’diyi emi tia ra. Ma ’yoni ndra e’yo ’diyi emi tia okorisi ku, mani mira nga ovule emi be indirisi.

⁵Te curu’do ma mu ’ba ma ti epepiri vu; te ’ba i aluni emi eselia ma zipi kini, Mi mu i ngoa ya?-ni yo.

⁶Te mani e’yo ’diyi ’yole emi tia ’borisi, candi ga ani emi asia tre.

⁷Te ma e’yo adaruri ’yo emi tia: mani muzu rari eri emi dri onyiru, te ma ka mu, ku, ’Ba ’ba Aza Kopiri ngani emu emi vu ku; te ma ka mu ra, ma nga eri ti epe emi vu.

⁸Eri ka emu ra, eri nga e’yo e’da kilili nyaku dri e’yo onzi pi ma e’yosi, e’yo kililiruri pie, e’yo liza pie dria:

⁹e’yo onzisi a’disiku yini ma a’ile kurisi;

¹⁰e’yo kililirurisi a’disiku mani mule Ata vu azini emini ngale ma ndrele dika kurisi;

¹¹e’yo lizasi yini opi nyaku ’dirini ma e’yo lile ’borisi.

¹²Ma ovu nga e’yo be kakau ’yozaru emi tia, te econi emini yi a’izaru curu’do ku.

¹³Te eri’i Orindi e’yo adaruniri ka nga emu ra’i eri nga emi dri ce e’yo adaru ma alia dria; te eri ngani e’yo ’yo eri drisi ku, te eri nga e’yo dria erini erile ’diyi ’yo’i, eri nga vini emi dri e’yo ngapi emupi ’diyi olu indi.

¹⁴Eri nga ’ba ma ma ovu dizaru, erini i ngale afa mani ma azi e’dule olule, emi tiarisi.

¹⁵Afa dria Atani ovuzu yi be ’diyi yi mani; e’yo ’disi ma ’yo te eri afa mani ma azi e’du olu emi tia.

¹⁶Ace were, emi ngani ma ndre ku; ace were dika, emi nga ma ndre ra.

¹⁷’Ba erini imbale ’diyi ma azi nga ’yo yi eselia ani, E’yo erini ’yole ama tia ’diri eri a’di e’yoni, kini, Ace were emi ngani ma ndre ku, ace were dika, emi nga ma ndre ra; azini, Mani mule Ata vurisi, ’diniri ya?

¹⁸Yi ’yo ani, E’yo erini ’yole, Ace were ’diri eri a’di e’yoni ya? Ama nini e’yo erini ’yoleri ku.

¹⁹Yesu ni yi le e’yo zi i tia, nga di ’yo yi tia kini, Emi e’yo ozi emi eselia mani ’yole, Ace were emi ngani ma ndre ku, ace were dika emi nga ma ndre ra, ’dinirisi ya?

²⁰Ma ’yo emi tia ndi ndi, emi nga awu wu lulu be, ’te nyakuni nga ovu ayikosi; emi nga ovu candi be, te candi eminiri nga i oja ayikoru.

²¹Mvaazo ka oku e’du ra, eri ovu candi be eri ma etuni ecalerisi; te eri ka di mva osi ’bo, eri egani rua suza ma e’yo dika ku, ayiko erini agupia osile nyakua ’bori ma e’yosi.

²²’Dinile emi ovu candisi curu’do; te ma nga emi ne dika, emi asini nga ovu ayikosi, te ’ba aluni ngani ayiko emini pa emi vusi ku.

²³O’du ’dasi emi ngani zita azini zi ma tia ku. Te ma ’yo emi tia ndi ndi, e’yo ngoni ngo emini zile Ata tiari, eri nga fe emi dri ma rusi.

²⁴Ecazu curu’do emi zini nga e’yo azini ma rusi ku; emi zi di, emi nga a’i ra, ayiko emini ma ga tre ani.

²⁵Ma ’yo e’yo ’diyi emi tia e’yo o’bezasi ’bo; te etuni nga emu ra, etu ndesi ma ngani asi e’yo ’yo emi tia e’yo o’bezasi ku, te ma nga e’yo Atani ’yo emi tia mgboru.

²⁶O’du ndesi emi nga e’yo zi ma rusi; te ma ’yoni emi tia kini ma nga Atani zi e’yo eminisi zi zi ’dini ku;

²⁷a’disiku Ata ma ngulupi le emi ra, emini ma lele ’bo, azini emini a’ile ’bo kini ma ibi enga Ata vurisi.

²⁸Ma ibi enga Ata vu, ma eca nyakua; dika ma nyaku ku ra, muzu Ata vu.

²⁹’Ba erini imbale ’diyi ’yo eri ria, Awa’dini, curu’do mi ’yo mgboru, mi ’yoni e’yo o’bezani ku!

³⁰Curu’do ama ni ra mi ni e’yo dria, leni ’ba azini ma zi e’yo mi ria ku; e’yo ’disi ama a’i ra mi ibi enga Mungu vu.

³¹Yesu nga e’yo omvi yi ria, Curu’do emi a’i ra ya?

³²Mi ndre, etuni emu ra, eca di ’bo, etu ndesi emi nga ovu erezaru, emi dria alu alu emiri emiri, emi nga ma ku a’dule; te ma ovuni a’dule ku, Atani ovule ma berisi.

³³Ma ’yo e’yo ’diyi emi ria ’bo, ’dini ma alia emi ma isu ani asi anzuru. Emi nga ovu inzata be nyakua ra; te ri emi imba emi asi okporu, ma aga nyaku ’bo.