Read lugbara Yohana 18 Bible Online

Yohana 18 - lugbara bible

Yohana 18

¹Yesu ka e’yo ’diyi ’yo ra, eri fu ’ba erini imbale ’diyi be zozu yi were Kidironi ma tia ’aa’daasi, pari amvuni ovuzuria, eri fi alenia ’ba erini imbale ’diyi be.

²Isu Yudasi ’ba eri ma o’di nyapiri ni angu nderi indi; a’disiku Yesu piyi adri yi oku ’daa ’ba erini imbale ’diyi be pale kakau.

³Yudasi ka ’di asikari ongulumuru ’du ’bo, azini asikari kuhani amboru ’diyi pini ’ba Farisaini vile ’diyi be, yi nga emu ’daa tala piyi be, alaka pie, afa a’di ’dizu ’diyi pie dria.

⁴Yesuni e’yo dria ngapi yi ’yepi i ruaa ’diyi niria, eri fu mu, ’yo yi tia kini, Emi a’dini nda ya?

⁵Yi nga e’yo omvi eri tia, Yesu ’ba Nazaretiari’i. Yesu nga ’yo yi tia, Ma eri’i. Yudasi ’ba eri ma o’di nyapiri so pa yi be indi.

⁶Eri ka ’yo yi tia, Ma eri’i, ’dini, yi nga si vile ngukusi, nga o’de va nyakua.

⁷Eri nga zi yi tia dika ani, Emi a’dini nda ya? Yi nga ’yo ra, Yesu ’ba Nazaretiari’i.

⁸Yesu nga e’yo omvi, Ma ’yo te emi tia ma eri’i; te emi ka ma ndru’i, emi ku ’ba ’diyi ma mu.

⁹’Dini e’yo erini ’yoleri ma ’ye i ani, kini, ’Ba mini fele ma ’dri ’bo ’diyi ma azi aluni avini ma dri ku.

¹⁰De Simoni Petero ovu sei be, eri nga nze ra, eri nga kuhani amboru ma ati’bo ma bi dri ndiari ga, li eri va. Ati’bo nde ma ru Maliko.

¹¹Yesu nga di ’yo Petero tia ani, Mi omvi sei okporoa; okelea Atani fele ma driri, ma ngani eri mvu ku ya?

¹²Asikari ongulumuru ’diyi pi ’ba amboru yi dri cepi ’diyi pie, asikari ’ba Yahudiniri ayule ’diyi pie, bi di eri ra, ’i eri,

¹³jizu Anasi vu okorisi; te Anasi ovu Kaifa ma anyi’i, Kaifa nde kuhani amboru eli ’dasiri’i.

¹⁴Kaifa nderi ’ba e’yo amaza fepi ’ba Yahudini dri, kini eri onyiru ’ba alu ma dra ’ba driasiri’i.

¹⁵Te Simoni Petero nga Yesu vuti bi, ’ba erini imbaleri ma azi be. Isu ’ba nde erini imbaleri ni yi kuharu amboru be ra, eri fi ani Yesu be tualu kuhani amboru riidria,

¹⁶te Petero so pa jotilia amve. ’Ba nde erini imbale, te yi nipi kuhani amboru be rari fu ani amve, ’yo zamva jotile agei tepiri ma tia, nga Peteroni ofi joa.

¹⁷Zana jotile agei tepiri nga di ’yo Petero tia, Mi indi, mi ovuni ’ba agu ’dirini imbale ’diyi ma azi ku ya? Eri ’yo ra, Ma’i yo.

¹⁸Isu ati’ba piyi oso pa asikari ayule ayu ’diyi be, de yi edu aci olukuru ’daa anguni ambilerisi, yi de aci yuria; Peteroni yi be indi, pa soria aci yuria.

¹⁹Kuhani amboruri nga di zi Yesu tia ’ba erini imbale ’diyi ma ’e’yosi, imbata erini be.

²⁰Yesu nga e’yo omvi eri tia, Ma ’yo ’ba nyakua ’diyi ma tia mgboru; ma adri ’ba imba pari ’bani yi okuzuria o’du dria azini hekalua, pari Yahudi driani yi okuzuria; ma ’yoni e’yo oyokolosi aluni ku.

²¹Mi zi ma tia a’disi ya? Mi zi e’yo mani ’yole yi tiari ’ba ma eripi ’diyi ma tia; mi ndre, ’ba ’diyi ni e’yo mani ’yole ’diyi ra.

²²Eri ka e’yo ’diri ’yo ’bo, asikari yini alu pa sopi ogogori sa Yesuni drisi, kini, Mi e’yo omvi kuhani amboru ma tia ’dini ya?

²³Yesu nga e’yo omvi eri tia, Ma ka ’yo onzi, mi nze onzi nde ma eti’i; te ma ka ’yo ’yeke, mi sa ma a’disi ya?

²⁴Isu Anasi pe eri ti ’izaru Kaifa kuhani amboruri vu.

²⁵Isu Simoni Peteroni pa soria ad yuria. Yi nga ’yo eri tia, Mi indi, mi ovuni ’ba erini imbale ’diyi ma azi ku ya? Eri ga si, kini, Ma’i yo.

²⁶Ati’ba kuhani amboruni ma azi alu, eri ’ba Peteroni bini lile vari ma ori’ba, ’yo kini, Ma ndreni mi te eri be amvu ma alia ku ya?

²⁷Petero nga ga dika; coti a’nata nga cere ’be.

²⁸Yi nga Yesuni ofu Kaifa vurisi eri jizu riidri e’yo lizuria. Isu de eri angu trani. Yi ngulupi fini riidri e’yo lizuria ku, yi rua kazu ovuzu ezazaru afa onzisi ku, te yi ma eco agaza ’ba drilesiri nyazaru beni.

²⁹Pilato nga fu amve yi vu ani, nga ’yo ra, Asu emini sule agu ’diri ma ruaari ma e’yo ngoni ya?

³⁰Yi nga e’yo omvi, ’yo eri tia, ’Ba ’diri ka te ovu ’ba onzi ’yepi’iri ku, ama ejini te eri fezu mi dri ku.

³¹Pilato nga ’yo yi tia ani, Emi ma ’du di eri, ma li e’yo erini azita eminiri vusi. ’Ba Yahudini nga ’yo eri tia, Azita a’ini amani ’ba fuzu aluni ku.

³²E’yo Yesuni ndra ’yole geri erini ngazu drazuri ma e’yo ecezuri ma ’ye i ani.

³³Pilato nga fi dika riidri e’yo lizuria, nga Yesuni omve, nga ’yo eri tia, Mi Opi Yahudini ya?

³⁴Yesu nga e’yo omvi, Mi ’yo e’yo ’diri mi drisi, kani ’ba azini olu e’yo mani mi tiani ya?

³⁵Pilato nga e’yo omvi, Ma Yahudiouni ya? Suru mini pi kuhani amboru ’diyi be eji mi fe ma drini; mi ’ye a’dini ya?

³⁶Yesu nga e’yo omvi, Opi nyaza mani ovuni nyaku ’diria ku; opi nyaza mani ka te ovu nyaku ’diria, te’do asikari mani yi omba ’baria, ma ma ovu ani jizaru fezu ’ba Yahudini dri ku; te curu’do opi nyaza mani engani ’doa ku.

³⁷Pilato nga ’yo eri tia ani, Mi di opini ya? Yesu nga e’yo omvi, Mi ’yo te ra ma opini. Osi ma e’yo ’disi, e’yo ’disi ma eca nyakua ani, ’dini ma ma nze e’yo adaruri ma eti. ’Ba dria alu alu e’yo adaruni ’diyi yi ma o’duko eri ra.

³⁸Pilato nga ’yo eri tia, E’yo adaruri a’dini ya? Eri ka e’yo ’diri ’yo ’bo, eri fu amve dika ’ba Yahudini vu, eri ’yo yi tia, Ma isuni ezata erini ku.

³⁹Adriza eminiri vusi ma ma tru ’ba alu emi dri agaza ’ba drilesiri ma alia; emi le ma ma tru ani emi dri Opi Yahudiniri ya?

⁴⁰Yi nga di otre dika kini, ’Ba ’diri’i yo, bani Baraba’i! Isu de Barabani oguouni.