Read lugbara Yohana 19 Bible Online

Yohana 19 - lugbara bible

Yohana 19

¹Pilato nga di Yesuni ’du ji, co ninisi.

²Asikari nga oci ekila okuru, su eri dria, nga vini eri esu bongo ondrala kondralarisi;

³yi nga emu eri vu, kini, Mi zi mi ci ci, Opi Yahudini lou! Yi nga eri sa urisi.

⁴Pilato fu amve dika, ’yo yi ria kini, Mi ndre, ma eri ofu emi vu ’di, emi ma ni ani ma isuni ezata eri ma alia aluni ku.

⁵Yesui nga di fu amve ani, oci okururi be dria azini bongo ondralakondralaruri be ruaa. Pilato ’yo yi tia, Mi ndre, agu nderi!

⁶Kuhani amboru ’diyi pi yi vile asikari ’diyi be ka eri ndre ra, yi nga oyu uru kini, Ma di eri pati ruaa, ma di eri pati ruaa! Pilato nga ’yo yi tia, Emi ngulupi ma ji eri dizu pati ruaa emi’i, te maruni ma isuni ezata eri ’ma alia aluni ku.

⁷’Ba Yahudini nga e’yo omvi eri tia, Azita amani indi, azita ’diri le eri ma dra ra, erini i ngulupi ’bale Mungu ma Mvarurisi.

⁸Pilato ka e’yo ’diri eri ra, uri bi di eri aga ra

⁹eri fi dika riidri e’yo lizuria, eri ’yo Yesu tia, Mi ibi enga ngoa ya? Te Yesu omvini e’yo eri tia ku.

¹⁰Pilato nga ’yo eri tia ani, Mi ’yoni ma ria ku ya? Mi nini ma okpo be mi truzu, azini ma okpo be mi dizu pati ruaari ku ya?

¹¹Yesu omvi e’yo eri ria kini, Okpo mini afa azini ’yezu ma ruaani yo, ka ovu fezaru mi dri engazu ’bua ku; ’dini ’ba ma ejipi fepi mi driri ma ezata aga ra.

¹²Engazu ’disi Pilato nda geri eri truzu ra, te ’ba Yahudini yi oyu uru kini, Mi ka ’ba ’diri tru ra, de di mi agyi Kaisarini yo; ’ba dria alu alu i ’bapi opiruri mbu Kaisari ruaasi amve.

¹³Pilato ka di e’yo ’diyi eri ra, eri nga Yesuni ji amve, nga ri va oguna e’yo lizuri ma dria, pari ’bani omvele Oni Otiza’iria, te Ebrania tisi eri Gabata’i.

¹⁴Isu o’du ’dari eri Edeza agaza ’ba drilesiriari’i; etu eca ekile aziale. Eri nga ’yo ’ba Yahudini ma tia, Mi ndre, Opi eminiri!

¹⁵Yi nga otre uru ani, Ma ji eri ’dale, ma ji eri ’dale, ma di eri pati ruaa! Pilato nga ’yo yi tia, Ma Opi eminiri di pati ruaa ya? Kuhani amboru yi nga e’yo omvi, Opi amani yo pe lu Kaisari’i,

¹⁶Eri nga di eri fe yi dri ani dizu pati ruaa.

¹⁷Yi ji Yesu ani, erini pati alaza i ngulupini jiria, eri fu mu pari ’bani omvele ’Ba dri fala’iria, yini omvele Ebrania tisi Gologota’iri.

¹⁸Yi di eri pati ruaa ’daa, yi di ’ba azini iri eri be tualu, alu kala aluria, alu kala aziniria, Yesuni yi eselia agadua,

¹⁹Pilato si e’yo eri ma e’yo e’dazuri, ’ba eri pati alaza ma dria; e’yo siza ovu ’dini, YESU ’BA NAZARETIA, OPI YAHUDINIRI’I.

²⁰’Ba Yahudini kakau nga e’yo e’daza ’diri la, a’elisiku pari yini Yesuni dizu pati ruaari ovu ogogo aku amboru ma ageia; yi si e’yo siza nde Ebrania tisi, Rumi tisi, Giriki usi.

²¹Kuhani amboru ’ba Yahudini ma drilia ’diyi nga ’yo Pilato ma tia ani, Mi si, Opi Yahudiniri’i ’dini ku, te mi si, Eri ’yo ra kini, Ma Opi Yahudiniri.

²²Pilato nga e’yo omvi, E’yo mani sile ’bori ma si te de ’bo.

²³Asikari ka Yesuni di pati ruaa ’bo, yi nga bongo erini o’du awa tindi su asikari alu alu vusi; yi nga koti erini ’du ’dini indi. Isu baka mile bongo ecizuri koti ruaa yo, yi ca ndra eri engazu uru kpere ele bongo aluru;

²⁴yi nga ’yo yi eselia ani, Ama osi eri ku, te ama nya eri odrisi ’bezasi, ama nga ’ba ’dupiri a’eli’i yari ni ani. ’Dini e’yo siza ma ’ye i, kini, Yi awa bongo mani yi eselia, yi ’be odrisi koti mani nyazu. Asikari ’ye ani ’dini.

²⁵Te andri erini pi oso pa pati alaza Yesuni ma ageia, andri ma amvi pie, Mariamu oku Kileopa vileri pie, Mariamu Magadaleni pie.

²⁶Yesu ka i andrini ndre, ’ba erini imbale erini leleri be erini pa soria ogogo, eri ’yo i andri tia, Oku la, mi ndre, mi mvini ’eli!

²⁷Eri nga eli ’yo ’ba erini imbaleri ma tia, Mi ndre, mi andrini ’di! Engazu etu ’dasi ’ba erini imbale nderi ’du eri ji i vile joa.

²⁸E’yo ’diri ma vutia, Yesuni niria kini e’yo dria ’ye yi de ’bo, e’yo siza ma ’ye i ani, nga ’yo ra, Yi avijo fu ma ra.

²⁹Isu yi ’ba te patiefi su drazaru imvu ma alia tre ’daa; yi nga afa ezekezeru su patiefi su takari ma alia, nga eri su pati sia, ’ba tilenia ani.

³⁰Yesu ka patiefi su drazari a’i ’bo, eri ’yo ra, De i ’bo; eri nga i dri elu, ku orindi ini fuzu ra.

³¹O’du ’darini ovule Edezanirisi, ’ba Yahudini nga zi Pilato tia ma onyo yi ma pa, ma otru yi jizu, yi ma avu kazu ovuzu pati alaza ma dria o’du sabatonisi ku (te o’du sabatoni ’dari eri o’du amboni)

³²Asikari nga emu ani, nga ’ba okori pi ma pa onyo ’ba azini yiru dile eri beri be;

³³te yi ka eca Yesu vu, ka ndre ra eri dra kai ’bo, yi onyoni pa erini ku.

³⁴Te lasikari alu nga ejeni so ajusi, coti ari pi ’ba ra yi be ra ra.

³⁵’Ba ndrepi rari nze e’yo nderi ma eti ’bo-e’yo eti erini nzeleri eri adaru, eri ni ra eri e’yo adaruri ’yo-emi ma a’i ani beni.

³⁶Te e’yo ’diyi ’ye yi e’yo siza ma ovu ’yezaru ani, kini, Yi ngani fala erini nye aluni ku.

³⁷Te dika e’yo siza azini kini, Yi nga ’ba yini soleri ndre.

³⁸E’yo ’diyi ma vutia, Yusufu ’ba Arimateaari, eri ’ba Yesuni imbaleri, te di ndindiru erini ’ba Yahudini rulerisi, eri a’i Pilato tia i ma ’du avu Yesuni ji; Pilato nga a’i ra. Eri emu ani, avuni ’du ji ra.

³⁹Nikodemu nga emu alu indi, eri ’ba ndra emupi oko eri vu inisiri’i, eri nga ajinguru arikariru osale nzo beri eji, ekile ratili turu alule ’dipi.

⁴⁰Yi ’du di avu Yesuni, nga eri oti bongo emverusi afa arikariruri be, ekile ’ba Yahudiniri adrile ’ba avu salerile.

⁴¹De amvu indi pari yini eri dizuria, azini gule o’diru ’ba sazu nga alenia kuri indi amvu nde ma alia.

⁴²Erini ovule ’ba Yahudini ma o’du Edezanirisi, azini gule nderini ovule ogogorisi, yi nga di Yesuni ’ba ’daa.