Read lugbara Yohana 20 Bible Online

Yohana 20 - lugbara bible

Yohana 20

¹Azio’du alurisi Mariamu Magadaleni eri emu gulea drio, de nga angu atini ku, nga ndre yi gu oni gule tiarisi ’bo.

²Eri nga nzu ongusi ani, emu Simoni Petero pi vu, ’ba azini Yesuni imbale leleri be, eri ’yo yi tia, Yi ’du Opini gulearisi ra, te ama nini pari yini eri ’bazuri ku.

³Petero nga di fu ’ba erini imbale aziniri be, yi bi geri muzu gulea,

⁴’Ba iri ’diyini nzuria tualu, ’ba erini imbale aziniri aga Peteroni ongusi ra, ca gule tia oko;

⁵eri avu aleni luzu, ndre bongo emveruni aria ko’bo ’daa, te eri fini ku.

⁶Simoni Petero nga di vini eca indi, erini vutini biria, eri nga fi gule alia ra; eri ndre bongo emveruni aria ko’bo ’daa,

⁷ndre vini kitambala ndra ovupi eri ma driari, kitambala nde ovuni bonge emveru be tualu ku, te ovu trazaru a’dule pari inia.

⁸’Ba erini imbale azini te ecapi gule tia okori nga di fi ra, ndre ra, a’i ra.

⁹Te yi vani nga e’yo siza kini eri ma enga ’ba draza ma eselia rari ku.

¹⁰’Ba erini imbale ’diyi nga mvi aku yinia dika,

¹¹Te Mariamu so pa gule tia amve awu be, erini wuria, eri nga avu luzu gule alia;

¹²eri ndre malaika iri bongo emveru be yi ruaa yini riria, aluri drinialeru, aziniri panialeru, pari te Yesu ma avuni lazuria.

¹³Yi ’yo eri tia, Oku, mi wu a’disi ya? Eri ’yo yi tia, Yini Opi mani ’dule rarisi, te ma nini pari yini eri ’bazuri ku.

¹⁴Eri ka ’yo ’dini, eri nga ti ja ngukualeru, nga Yesuni ndre pa soria, te eri nini eri Yesu’i ku.

¹⁵Yesu nga ’yo eri tia, Oku, mi wu a’disi ya? Mi a’dini nda ya? Te eri’i, erini egaria i asia kani eri ’ba amvu ’yapiri’i yani, nga ’yo eri tia, Opi la, mi ka eri ’du ji mi’i, mi olu mani pari mini eri ’bazuri fo, ma nga eri ’du beni.

¹⁶Yesu nga ’yo eri tia, Mariamu. Eri nga i oja, ’yo eri tia Ebrania tisi, Raboni (efini, ’Ba ’ba Imbapiri),

¹⁷Yesu nga ’yo eri tia, Mi bi ma ’dani ku, a’disiku ma tuni nga Ata vu ku; te mi mu adripi mani vu, mi ’yo yi tia, ma tu ma Ati vu, emi Ati vu indi, Mungu mani vu, Mungu emini vu indi,

¹⁸Mariamu Magadaleni nga emu e’yo olu ’ba erini imbale ’diyi ma tia kini, Ma ndre Opini ’bo; kini eri ’yo i tia e’yo ’diyi ra.

¹⁹Azio’du alu ’dari ma ondresi, jotileni de ovuria opizaru pari ’ba erini imbale ’diyini yi okuzuria yini ’ba Yahudini rulerisi, Yesu emu pa so yi eselia, nga ’yo yi tia, Asi anzuru ma ovu emi vu.

²⁰Eri ka e’yo ’diri ’yo ’bo, eri ece yi dri i ma dri piyi i ma eje be. ’Ba erini imbale ’diyi nga ovu ayikosi ani yini Opini ndrelerisi.

²¹Yesu nga di ’yo yi tia dika ani, Asi anzuru ma ovu emi vu. Ekile Atani ma ti epelerile, ma pe emi ti ’dinile indi.

²²Eri ka e’yo ’diri ’yo ra, eri nga ava vu yi ma dria, nga ’yo yi tia, Emi a’i di Orindi Alatararu,

²³’Ba dria alu alu ma e’yo onzi emini kule ra ’diyi, yi ma ovu kuzaru yi dri; ’ba dria alu alu ma e’yo onzi emini kule ku ’diyi, yi ovuni kuzaru yi dri ku.

²⁴Te Toma, ’ba alu ’ba mudri drini iri ’diyi ma eselia omvele Ejoruri, ovuni yi be etu Yesuni ecazurisi ku.

²⁵’Ba erini imbale azini ’diyi nga ’yo eri tia, Ama ndre Opini ’bo. Te eri ’yo yi tia, Ma ka musumari ma pamvu ndre drinia ku, azini ma ka ma dridrile su musumari ma pamvua ku, ma ka ma dri su ejenia ku indi, ma ngani a’i aluni ku.

²⁶O’du aro ma vutia, ’ba erini imbale ’diyi nga yi oku jo alia dika, Tomani de yi be indi. Yesu emu de eci jotile ci, eri so pa yi eselia, kini, Asi anzuru ma ovu emi vu.

²⁷Eri nga di ’yo Toma tia, Mi eju mi dridrile ’doa, mi ndre ma dri; mi eju mi dri, mi su eri ma ejea; mi ma ovu a’ita kokoru ku, te a’ita be.

²⁸Toma nga e’yo omvi ’yo tinia, Opi mani, Mungu mani indi

²⁹Yesu nga ’yo eri tia, Mini ma ndrele ’borisi mi di a’i ani ’di; te ’ba ma a’ipi rua ndrekokoru ’diyi yi drile barunini.

³⁰Yesu ’ye eceta azini kakau ’ba erini imbale ’diyi ma milia, yini sile buku ’diri ma alia ku ’diyi;

³¹te si ’diyi emini a’izu ani Yesu eri Kristo Mungu ma Mvi’i, azini emini a’iria emi ma ovu ani idri be eri ma rusi.